អ្នកប្រដាល់ធ្លាប់ឈ្នះ Floyd បច្ចុប្បន្ននៅត្រឹមបន្ទប់ជួល

2015-04-06 22:18:48
ចំនួនមតិ 0 | ចំនួនចែករំលែក 0

ចន្លោះមិនឃើញ

Floyd Mayweather គឺជាកំពូលអ្នកប្រដាល់មួយរូប ដែលមិនទាន់ស្គាល់ពាក្យថាចាញ់នោះទេ ក្នុងអាជីពរបស់ខ្លួន ប៉ុន្តែអ្នកប្រដាល់អាមេរិករូបនេះ ធ្លាប់ចាញ់លើកចុងក្រោយម្ដង ក្នុងការប្រកួតលក្ខណៈមិនទាន់ចូលអាជីព ក្រោមថ្វីដៃអ្នកប្រដាល់ប៊ុលហ្គារី Serafim Todorov ក្នុងការប្រកួតអូឡាំពិកឆ្នាំ១៩៩៦។ យ៉ាងណាមិញ បើក្រឡេកមកមើលជីវភាពបច្ចុប្បន្ន ឃើញថា Floyd គឺជាកំពូលកីឡាករដែលមានជាងគេបំផុតលើលោក ខណៈដែល Todorov វិញ សូម្បីតែផ្ទះក៏គ្មាននៅដែរ ពោលគឺត្រូវជួលបន្ទប់ផ្ទះល្វែង ដើម្បីរស់នៅ។

Floyd និង Todorov វ៉ៃគ្នានៅអូឡាំពិក ឆ្នាំ១៩៩៦

អ្នកប្រដាល់សញ្ជាតិប៊ុលហ្គារី Todorov ដែលធ្លាប់ជាកីឡាករជើងខ្លាំងបំផុតមួយរូបនោះ ធ្លាប់បានវ៉ៃឈ្នះ Floyd ដោយពិន្ទុ ១០ ទល់នឹង ៩ ក្នុងការប្រកួតវគ្គពាក់កណ្ដាលផ្ដាច់ព្រ័ត្រអូឡាំពិក ឆ្នាំ១៩៩៦ នៅទីក្រុង Atlanta ប៉ុន្តែជាលក្ខណៈមិនទាន់អាជីពផ្លូវការ (ពាក់មួក) ខណៈដែលពេលនោះ Todorov មានវ័យ២៧ឆ្នាំ រីឯ Floyd មានវ័យត្រឹមតែ ១៩ឆ្នាំប៉ុណ្ណោះ។

បើយោងតាមសារព័ត៌មាន Borden បានឲ្យដឹងថា លោក Todorov វ័យ៤៥ឆ្នាំ ដែលធ្លាប់បំបាក់ Floyd រូបនេះ បច្ចុប្បន្នកំពុងតែរស់នៅក្នុងជីវភាពមួយយ៉ាប់យ៉ឺនយ៉ាងខ្លាំង ដោយរស់នៅក្នុងបន្ទប់ជួល១ នៅជាន់ទី១ ក្នុងផ្ទះល្វែង៧ជាន់ នៅតំបន់ Pazardzhik នៃប្រទេសប៊ុលហ្គារី ជាមួយនឹងប្រពន្ធ ប្អូនថ្លៃស្រី និងកូនប្រុសម្នាក់ឈ្មោះ Simeon ខណៈដែលបន្ទប់ជួលនោះ មានតម្លៃ ៤៣៥ក្នុង១ខែ។ ជាងនោះទៀត សេចក្ដីរាយការណ៍ដដែល បានឲ្យដឹងទៀតថា អតីតអ្នកប្រដាល់ដ៏ល្បីរូបនេះ ទើបតែបាត់បង់ការងារ ជាមួយនឹងប្រពន្ធនៅផ្សារទំនើប១កន្លែងផងដែរ។

លោក Todorov បច្ចុប្បន្ន វ័យ៤៥ឆ្នាំ

ផ្ទះល្វែងដែលលោក Todorov ជួលបន្ទប់រស់នៅ

ពានរង្វាន់ ដែលអតីតអ្នកប្រដាល់ Todorov ធ្លាប់ទទួលបាន

ចំណែកឯ Floyd Mayweather វិញ តាំងពីចាញ់ Todorov លើកចុងក្រោយមក ២ទៅ៣ខែបន្ទាប់ អ្នកប្រដាល់វ័យ៣៨ឆ្នាំរូបនេះបានចូលជាអាជីពផ្លូវការ ដោយ៤៧ប្រកួត ពុំទាន់ចាញ់ម្ដងទេ និងមានចំណូលរាប់រយលានដុល្លារ ខណៈដែលអ្នកប្រដាល់លំដាប់ពិភពលោករូបនេះ នឹងឡើងសង្វៀនប៉ះ Manny Pacquiao នៅថ្ងៃទី០២ ខែឧសភាខាងមុខ ក្នុងតម្លៃមួយខ្ពស់បំផុតក្នុងប្រវត្តិសាស្ត្រប្រដាល់៕

-ចុចអាន៖ ល្បីថា សំបុត្រមើល Pacquiao និង Floyd ឡើងដល់ជិត៩ម៉ឺនដុល្លារ

ប្រែសម្រួល៖ វិន ជីវ័ន្ត ប្រភព៖ Businessinsider, nytimes