គ្រឿងរណ្ដាប់ទទួលទេវតានាំសិរីសួស្តីឆ្នាំថ្មី

2015-04-08 13:00:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងថ្ងៃចូលឆ្នាំ ផ្ទះនីមួយៗតែងរៀបចំតុបតែង បោសសំអាតឱ្យមានសិរីជ័យមង្គល។ ដោយឡែក គេក៏មានត្រៀមនូវគ្រឿងរណ្ដាប់ផ្សេងៗដើម្បីទទួលទេវតាឆ្នាំថ្មី ដែលជនជាតិខ្មែរមានជំនឿថា នឹងចុះមកប្រោសព្រំមនុស្សសត្វឱ្យសុខសប្បាយផងដែរ។

ទាក់ទិននឹងគ្រឿងរណ្ដាប់ដែលខ្មែរនិយមដើម្បីទទួលអំណរទេវតាឆ្នាំថ្មី បើតាមលោក អាចារ្យ ហី លាភ នៅវត្តកំសាន្ត មានប្រសាសន៍ថា រណ្តាប់ទទួលទេវតាតាមទំនៀមពីបុរាណរៀងរហូតមក គេតែងរៀបនៅខាងមុខផ្ទះ ដោយមានតាំងគ្រឿងសក្ការៈផ្សេងៗ។

ជាទូទៅគេដាក់របស់ទាំងនោះនៅលើតុ ឬ ហឹង ដែលជាទីខ្ពស់ ហើយគ្រឿងទាំងនោះមានដូចជា បាយសីមួយគូ ប៉ាឆាមមួយគូ ស្លាធម៌ ទឹកអប់ឆ្វេងស្តាំ ទៀនប្រាំធូបប្រាំ ទឹកមួយផ្តិលធំដាក់ចំកណ្ដាលឬភេសជ្ជៈ ទៀនមួយគូអមសងខាង ជើងពានមួយគូ ផ្លែឈើ នំចំណី ផ្កាភ្ញីជាដើម។ លុះរៀបចំរួចរាល់ហើយ នៅវេលាម៉ោងដែលទេវតាចុះមក ត្រូវជួបជុំក្រុមគ្រួសារដើម្បីថ្វាយបង្គំព្រះនមស្សការតនៈត្រ័យសមាទានសីល ហើយតាំងចិត្តឲ្យបានស្អាតបរិសុទ្ធជ្រះស្រឡះនូវមន្ទិលទាំងពួង រលឹកលុះចប់ពិធីទទួលទេវតា។

លោកតា បញ្ជាក់ថា តែគ្រឿងទាំងអស់នេះមិនតម្រូវឱ្យត្រូវតែដាក់តាមគ្រប់សព្វទេ គឺទៅតាមលទ្ធភាពធនធាននៃក្រុមគ្រួសារដែលមាន។ ផ្ទះអ្នកធូរធារគេអាចដាក់ដល់ទៅបាយសី៩ថ្នាក់ ៥ថ្នាក់ក៏បាន។ ឯអ្នកមធ្យមអាចដាក់ត្រឹម៣ថ្នាក់ក៏បាន មិនប្រកាន់ឡើយ។ ចំណែក ផ្លែឈើ ឬនំចំណីក៏ដូចគ្នា អ្នកមានលទ្ធភាពអាចដាក់ច្រើនមុខច្រើនចានតម្រៀបគ្នា តែអ្នកសមល្មមអាចដាក់តាមការគួរ មិនកំណត់ថា ត្រូវតែដាក់ច្រើន ធំដុំនោះឡើយ។

ផ្អែកតាមសៀវភៅមហាសង្ក្រាន្ដបានឲ្យដឹងថា ចំពោះបាយសី ៩ ថ្នាក់ ៧ ថ្នាក់ ជាទំនៀមនៅក្នុងព្រះបរមរាជវាំង ចំពោះប្រជារាស្រ្តគួរធ្វើត្រឹម ៥ ថ្នាក់ចុះមក ឬ រៀបត្រឹមគ្រឿងសក្ការៈបូជា ដែលមានទៀនប្រាំ ធូបប្រាំ ស្លាធម៌កូន ចេកមួយគូក៏ល្មមសមគួរដែរ។ ចំពោះផ្លែឈើសម្រាប់ប្រជារាស្រ្ត គួររៀបឲ្យបានត្រឹម ៣ ឬ ៥ មុខ ជាការប្រសើរ គឺរៀបទៅតាមធនធានរបស់ខ្លួន។ នៅគ្រប់ដង្វាយទាំងអស់ត្រូវដាក់ផ្កាម្លិះភួងពីលើគ្រប់ដង្វាយ នៅលើជើងពាន និង លើបាយសី ត្រូវដោតទៀនហើយដុតបំភ្លឺ។

សៀវភៅដដែលបានរៀបរាប់ទៀតថា សង្រ្កាន្ដចូលឆ្នាំថ្មីនៅថ្ងៃអង្គារ ១១ រោច ខែ ចេត្រ ត្រូវនឹងថ្ងៃទី ១៤ ខែ មេសា គ.ស ២០១៥ វេលាម៉ោង ១៤ និង ០២ នាទី។ ពេលនោះព្រះអាទិត្យចេញពីមីនរាសីទៅឋិតនៅឯមេសរាសីតាមផ្លូវគោវិថី គឺ ផ្លូវកណ្ដាល ទើបទេវធីតា មួយព្រះអង្គជាមគ្គនាយិកា ព្រះនាម រាគ្យសៈទេវី ជាបុត្រី ទី ៣ នៃ កបិលមហាព្រហ្ម គង់នៅចាតុម្មហារាជិកាទ្រង់អម្ពរពណ៌ ខ្មៅ លម្អនៅព្រះកាណ៌ដោយសៀតផ្កា ឈូក អភរណៈទ្រង់ពាក់កែវ មនោរា ភក្សាហារទ្រង់សោយ លោហឹត ព្រះហស្ដស្ដាំទ្រង់ ត្រីសូល៍ ព្រះហស្ដឆ្វេងទ្រង់ ធ្នូ ទ្រង់គង់លើខ្នង អស្សតរ (សេះ) ជាពាហនៈ៕