ឆ្កែស្មោះស្ម័គ្រទទួលទោសជាមួយម្ចាស់ដែលប្រើគ្រឿងញៀន

2015-04-07 23:07:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ឧក្រិដ្ឋជនប្រើប្រាស់គ្រឿងញៀនជាច្រើននាក់ ត្រូវប៉ូលិសរដ្ឋ Santa Catarina ភាគខាងត្បូងប្រទេសប្រេស៊ីលចាប់ខ្លួនកាលពីពេលថ្មីៗនេះ។ យ៉ាងណាក្ដី ការបង្ក្រាបករណីគ្រឿងញៀនមិនមែនជារឿងចម្លែកអ្វីឡើយសម្រាប់ប្រទេសប្រេស៊ីល ប៉ុន្តែអ្វីដែលគួរឲ្យចាប់អារម្មណ៍ គឺឆ្កែដ៏ស្មោះត្រង់របស់ឧក្រិដ្ឋជនទាំងនោះ បានក្រាបជាមួយម្ចាស់លើកជើងមុខឡើងលើជាសញ្ញាទទួលទោស។

ហេតុការណ៍បង្ក្រាបបទល្មើសគ្រឿងញៀននេះ បានធ្វើឡើងនៅសង្កាត់ Vargem Grande ក្រោមកិច្ចសហការរវាងកម្លាំងប៉ូលិស និងទាហាន។ បន្ទាប់ពីចាប់ជនល្មើសរួច ពួកគេបានថតរូបភាពទុក ហើយមួយសន្លឹកក្នុងចំណោមនោះចាប់ផ្ដើមល្បីល្បាញពេញប្រទេសប្រេស៊ីល។ នោះគឺរូបភាព បង្ហាញពីឆ្កែស្មោះស្ម័គ្រក្រាបទទួលទោសជាមួយម្ចាស់។

អ្នកនាំពាក្យប៉ូលិស ឈ្មោះ Filippo Valdez បាននិយាយថា មន្ត្រីស៊ើបអង្កេតចាប់ផ្ដើមស្រាវជ្រាវមុខសញ្ញាក្រុមឧក្រិដ្ឋជនជាយូរមកហើយ ហើយនៅពេលចាប់ខ្លួនពួកគេ ប៉ូលិសបានរកឃើញសារធាតុញៀនមួយចំនួន ព្រមទាំងជញ្ជីង និងកាំភ្លើងផងដែរ។ ស្របពេលជាមួយគ្នានោះ មានឆ្កែឈ្មោលមួយក្បាលបានហក់ទៅខាំមន្ត្រីប៉ូលិស ប៉ុន្តែនៅពេលឃើញម្ចាស់ក្រាបចុះ វាក៏រត់ទៅជិតនិងក្រាបតាមម្ចាស់ដែរ។

ធ្លាប់ជាសត្វកាចសាហាវ ឆ្កែនោះបានប្រែជាស្ងប់ស្ងាត់ និងមិនបញ្ចេញសញ្ញាណាមួយ បង្ហាញពីការវាយប្រហារមកលើប៉ូលិសឡើយ។ យ៉ាងណាក្ដី មន្ត្រីប៉ូលិសបានចាប់ខ្លួនតែឧក្រិដ្ឋជនប៉ុណ្ណោះ ដោយដោះលែងឆ្កែឲ្យរួចខ្លួន៕

ចុចអាន៖ មើលវីដេអូនេះ ទើបដឹងថាឆ្កែតែងរង់ចាំម្ចាស់នៅផ្ទះគ្រប់វិនាទី

ប្រែសម្រួល៖ គង់ វិសាល ប្រភព៖ dailymail