នៅក្មេងហ៊ានបើកអាជីវកម្មទាំងមិនដែលប្រឡូកដោយមិនខ្លាចបរាជ័យ

2015-04-17 21:53:36
ចំនួនមតិ 0 | ចំនួនចែករំលែក 0

ចន្លោះមិនឃើញ

មានអាយុត្រឹម ២៥ ឆ្នាំ តែយុវជន សុខ ចាន់ណារ៉ូ ហ៊ានបើកអាជីវកម្មរកស៊ីខ្លួនឯងដោយប្រើដើមទុនប្រមាណ ៣ ពាន់ដុល្លារ តែអាចរកចំណូលច្រើនសន្ធឹកសន្ធាប់ ពីអាជីវកម្មដំបូងបំផុតរបស់ខ្លួន នៃការផលិតវីដេអូ និង រចនារូបភាព ខណៈមិនដែលបានប្រឡូកក្នុងផ្នែកនេះពីមុនមកសោះ។

គ្រាន់តែបញ្ចប់ការសិក្សាភ្លាម ណារ៉ូ បង្កើតអាជីវកម្មនេះភ្លែត ប៉ុន្តែ គ្រួសារហាក់ស្ទាក់ស្ទើរនឹងគំនិតនេះ ដោយសារកាលនោះយុវជនរូបនេះ មានអាយុទើប ២២ ឆ្នាំ ហើយមិនដែលធ្លាប់ប្រឡូកខាងរឿងរកស៊ីអ្វីសោះ ដែលអាចថាជាអាជីវកម្មក្មេងខ្ចី ឯថៅកែក៏ក្មេងទៀត ហើយជំនាញរៀននៅសាកលវិទ្យាល័យទៀតសោតគឺច្បាប់ មិនមែនផ្នែកដែលទាក់ទងនឹងពាណិជ្ជកម្មអ្វីទេ។ តែភាពជោគជ័យ និង ការប្រឹងប្រែងបានធ្វើឱ្យផ្នត់គំនិតនេះផ្លាស់ប្ដូរ ព្រោះបន្ទាប់ពី ណារ៉ូ សម្រេចចាប់បើកអាជីវកម្មនេះភ្លាម ស្រាប់តែមានអតិថិជនទាក់ទងភ្លាម ហើយអាចរកប្រាក់បានរាប់ពាន់ដុល្លារទៀតផង។

យុវជនរូបនេះ ប្រាប់ថា បើទោះរៀនច្បាប់មែន តែមានទេពកោសល្យខាងផ្នែកឌីហ្សាញវីដេអូ និង គំនិតខាងជំនួញច្រើនជាង។ ណារ៉ូ បន្តថា មូលហេតុដែលជំរុញឱ្យបើកអាជីវកម្មនេះដោយសារ កាលនៅជានិស្សិត មានគ្រូម្នាក់មកពីអង់គ្លេស បានបើកក្លឹបមួយបង្រៀនពីការធ្វើវីដេអូនិងរូបភាព។

ស្របនឹងចិត្តដែលស្រលាញ់ជំនាញនេះស្រាប់ ណារ៉ូ ក៏ទៅរៀនហើយចេះយ៉ាងច្រើន។ ក្រៅពីនេះ ពេលទំនេរ សិស្សរៀនសាកលវិទ្យាល័យពុទ្ធិសាស្រ្ត បានខិតខំស្វែងរកតិចនិករៀនពី YouTube ថែមទៀត។ ក្រោយមក ដោយឃើញ ណារ៉ូ មានស្នាដៃល្អខាងផ្នែកនេះ លោកគ្រូក៏ចាត់តាំងណារ៉ូ ជាមេក្រុម ដើម្បីឱ្យបន្តក្លឹបនេះតទៅទៀត ខណៈលោកគ្រូនោះក៏ត្រូវត្រលប់ទៅប្រទេសអង់គ្លេសវិញ។

ក្រោយមក មិនយូរប៉ុន្មានសាលារៀបចំការប្រលងមួយទាក់ទងនឹងសហគ្រិនវ័យក្មេងដែលមានឈ្មោះថា "ការប្រកួតគំរោងអាជីវកម្មថ្នាក់ជាតិ ធុនតូច ឬមធ្យម ប្រចាំឆ្នាំ 2012" ណារ៉ូក៏ចុះឈ្មោះប្រកួតប្រជែង ហើយលទ្ធផលចេញមកជាទីគាប់ចិត្តក្រៃលែង ដោយក្រុមរបស់ណារ៉ូទទួលចំណាត់ថ្នាក់លេខមួយ។ តាមរយៈការប្រកួតប្រជែងនេះហើយ ដែលធ្វើឱ្យមនុស្សម្នាជាច្រើនបានដឹងពីសមត្ថភាពរបស់យុវជនវ័យក្មេងរូបនេះព្រោះពេលប្រកួត ណារ៉ូ បានឆ្លៀតបង្ហាញពីវីដេអូដែលខ្លួនផលិត ធ្វើឱ្យមានការកោតសរសើរពីគណៈកម្មាធិការយ៉ាងខ្លាំង។

ណារ៉ូ ក្នុងថ្ងៃទទួលជ័យលាភីកម្មវិធីការប្រកួតគំរោងអាជីវកម្មថ្នាក់ជាតិ ធុនតូចឬមធ្យម ប្រចាំឆ្នាំ2012

ស្របពេលនោះ ចំឆ្នាំដែលត្រូវប្រលងបញ្ចប់ ហើយយុវជនដែលកើតនៅភ្នំពេញរូបនេះ មានគំនិតមិនចង់ធ្វើការឱ្យគេទេ គឺចង់បើករកស៊ីដោយខ្លួនឯង។ ដោយមានការណែនាំផ្ដល់គំនិត និង ទិសដៅល្អៗពីសាស្ត្រាចារ្យ យុវជននេះ ក៏យកប្រាក់រង្វាន់ដែលបានពីការប្រកួតចំនួន ៣ ពាន់ដុល្លារ ទៅបើកអាជីវកម្មតែម្ដង ក្នុងឆ្នាំ ២០១២ ដោយដាក់ថា Innmax studio។

អតិថិជនជាច្រើនបានទាក់ទងឱ្យ ណារ៉ូ ផលិតវីដេអូ ជាលក្ខណៈឯកសារ ពាណិជ្ជកម្ម និង រចនារូបភាពផ្សេងៗ ខ្លះជាគម្រោងក៏មាន។ ម្ចាស់អាជីវកម្មនៅបណ្ដោយផ្លូវ២៨៨ ក្នុងសង្កាត់បឹងកេងកង១ ប្រាប់ថា ការរកអតិថិជនមិនសូវមានការលំបាកទេ ដោយសារពួកគាត់ភាគច្រើនធ្លាប់បានឃើញស្នាដៃអំឡុងពេលប្រកួតរួចហើយ ម្ល៉ោះហើយគាត់ជឿទុកចិត្តមកទាក់ទងឱ្យធ្វើនិងថែមទាំងជួយប្រាប់បន្តទៅអ្នកផ្សេងទៀតផង។ តាមរយៈការបើកអាជីវកម្មនេះ ថៅកែវ័យក្មេងប្រាប់ថា ទទួលបានបទពិសោធន៍យ៉ាងច្រើនពីរបៀបដឹកនាំ ចូលរួមសង្គម និង ការច្នៃប្រឌិត ជាភាពរឹងមាំដែលពីមុនមកខ្លួនមិនដែលទទួលបាននៅឡើយ។

សុខ ចាន់ណារ៉ូ ក៏បានលើកទឹកចិត្តផងដែរ ដល់យុវជនទាំងអស់ដែលមានគំនិតចង់បើកអាជីវកម្មដោយខ្លួនឯងថា បើទោះជានៅមានភាពវ័យក្មេងក្តី ប៉ុន្តែ វាមិនមែនជាឧបសគ្គឡើយ គឺជំនឿចិត្ត សមត្ថភាព និង ការប្រឹងប្រែងប្រកបដោយឆន្ទៈពិតប្រាកដ ទើបអាចសម្រេចបាននូវគោលដៅមួយបាន៕