ថ្ងៃអង្គរសង្ក្រាន្ត ឡូរ៉ា ម៉ម មាន Show ធំនៅទីលានជល់ដំរី

2015-04-13 17:00:07
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងកូនកាត់ ខ្មែរ-អាមេរិកាំង ឡូរ៉ា ម៉ម បានបង្ហើបឲ្យដឹងថា ថ្ងៃអង្គរសង្ក្រាន្ត ថ្ងៃទី៣ នាងនឹងមានការសម្ដែងធំ (Big Show) នៅទីលានជល់ដំរី។

តារាចម្រៀងដែលទើបចេញបទ "ម៉ាឌីហ្សុនថ្មី" រូបនេះ បង្ហើបដូច្នេះ ប៉ុន្តែពុំព្រមបញ្ចេញថាការសម្ដែងធំនោះជាអ្វីទេ។ "ខ្ញុំមាន Show ធំ ពិសេសនៅទីលានជល់ដំរី ប៉ុន្តែអត់ទាន់ឲ្យដឹងថាជាអ្វីទេ ចាំថ្ងៃហ្នុងចាំជួបគ្នា...ចាំដឹង!(សើច)”។

ជាមួយនឹងការបង្ហើបពីកម្មវិធីនេះ កម្មវិធីអង្គរសង្ក្រាន្តឆ្នាំនេះ ត្រូវបានគេដឹងថា នឹងមានការរាំម៉ាឌីហ្សុនទ្រង់ទ្រាយធំមួយដែរ ខណៈ ឡូរ៉ា ឯណេះក៏ទើបនឹងបញ្ចេញបទ "ម៉ាឌីហ្សុនថ្មី"ដែរ។ ទោះយ៉ាងនេះក្ដី តារាស្រីវ័យ ២៨ឆ្នាំរូបនេះ នៅតែមិនព្រមបញ្ចេញថាកម្មវិធីសម្ដែងរបស់នាងមានពាក់ព័ន្ធនឹងការរាំម៉ាឌីហ្សុនរបស់យុវវ័យខ្ទង់ពាន់នាក់នោះ ឬអត់ទេ ដោយគ្រាន់តែសុំឲ្យរង់ចាំមើលទាំងអស់គ្នា។

ក្រៅពីកម្មវិធីធំដែលនាងសុំលាក់នៅគ្រានេះ ឡូរ៉ា នៅមានការសម្ដែងដាច់ឡែកចំនួនពីរទៀតក្នុងឱកាសបុណ្យចូលឆ្នាំខ្មែរឆ្នាំដែរ។ ការសម្ដែងទី១ នាងនឹងឡើងឆាកតន្ត្រីអង្គរសង្ក្រាន្ត ច្រៀងផងរាំផងក្នុងបទចម្រៀងថ្មីរបស់នាង "ម៉ាឌីហ្សុនថ្មី" ដែលទើបចេញប៉ុន្មានថ្ងៃមុននេះ។

ការសម្ដែងដាច់ដោយឡែកទី២របស់នាង គឺនៅ Pub Street ទីប្រជុំជនបរទេសដ៏ល្បីលើទឹកដីអង្គរនេះ។ "នៅ Pub Street នេះខ្ញុំនឹងសម្ដែង៣យប់ជាប់គ្នាតែម្ដងក្នុងឱកាសបុណ្យចូលឆ្នាំខ្មែរឆ្នាំនេះ"។ ឡូរ៉ា បញ្ជាក់។

បើទោះជាការសម្ដែងមិនទាន់មកដល់នៅឡើយក្ដី ប៉ុន្តែតារាចម្រៀងដែលសុខចិត្តចោលដីអាមេរិកមករស់នៅស្រុកខ្មែរយើងនេះ បានចាកចេញទៅកាន់សៀមរាបតាំងពីថ្ងៃទី១០ មេសាម្ល៉េះ។ ដូច្នេះប្រិយមិត្តណា ជាអ្នកគាំទ្រ ឡូរ៉ា ម៉ម និងចង់ដឹងថា ការសម្ដែងដ៏ធំអះអាងដោយសាមីខ្លួនជាអ្វី រង់ចាំទាំងអស់គ្នា...!!!