Huawei បញ្ចេញអាវុធ២គ្រឿង កាមេរ៉ាខ្លាំងដូច iPhone 6 Plus

2015-04-19 18:41:25
ចំនួនមតិ 0 | ចំនួនចែករំលែក 0

ចន្លោះមិនឃើញ

Huawei កាលពីថ្ងៃទី១៥ មេសា បានបង្ហាញស្មាតហ្វូន និង Phablet ឈ្មោះថា Huawei P8 និង P8max ហើយក្រុមហ៊ុនបច្ចេកវិទ្យាចិនមួយនេះ អះអាងថា កាមេរ៉ាក្រោយស្មាតហ្វូនទាំងពីរ មានគុណភាពច្បាស់ដូច iPhone 6 Plus ដែរ។

នៅក្នុងព្រឹត្តិការណ៍ ប្រព័ន្ធផ្សព្វផ្សាយពិភពលោក (Global Media Event) ក្នុងទីក្រុងឡុងដុង Huawei បញ្ជាក់ថា P8 មានអេក្រង់ Full HD ៥.២អ៊ីញ ចំណែក P8max មានអេក្រង់ធំ Full HD ៦.៨អ៊ីញ និងមានកាមេរ៉ាមុខក្រោយ 5MP និង13MP។

ចំពោះកាមេរ៉ាក្រោយ របស់ស្មាតហ្វូន និង Phablet ដំណើរការដោយ Android 5.0 Lollipop ទាំងពីរនេះ ត្រូវក្រុមហ៊ុន Huawei បន្ថែមនូវបច្ចេកវិទ្យា Optical Image Stabilisation (OIS) ដែលអាចរក្សាកាណុងកាមេរ៉ាឱ្យនឹង និងធ្វើ Shutter Open រយៈពេលយូរ ដើម្បីបង្កើនពន្លឺរូបភាពឱ្យបានច្បាស់ ដោយមិនចាំបាច់ប្រើ Flash។ Huawei បន្ថែមថា OIS ជាបច្ចេកវិទ្យាល្អ ហើយមានលំនឹងល្អពីរដង ដូចគ្នានឹង iPhone 6 Plus។

Huawei បានប្រកាសទៀតថា Huawei P8 និង P8max ក៏មានបំពាក់បច្ចេកវិទ្យា "Knuckle Sense Technology” ងាយស្រួល Touch និងអូសកម្មវិធី ពីកន្លែងមួយទៅកន្លែងមួយទៀត ដែលពីមុនមានបច្ចេកវិទ្យា Multitouch នៅលើ iPhone របស់ Apple។

បើងាកមកមើលរូបរាងឯណេះវិញ P8 មានការរចនាស្រដៀង iPhone 5s ដែលមានពណ៌ ស ខ្មៅ ប្រផេះ និង មាស ខណៈ P8max មានមាស និងប្រផេះ។ ទូរសព្ទនិង Phablet ជំនាន់ថ្មីទាំងនេះ មានបំពាក់ Chip Kirin 930 មានល្បឿន 2.0GHz និង RAM ទំហំ 3GB។

ដោយឡែក ថ្មស្មាតហ្វូនមិនជ្រាបទឹក P8 បើគេប្រើខ្លាំង គឺបាន១ថ្ងៃប៉ុណ្ណោះ តែបើប្រើមធ្យម អាចបាន១ថ្ងៃកន្លះ យូរជាង iPhone 6 និង Samsung Galaxy S6។ ចំពោះថ្ម 4,360mAh របស់ P8max កាន់បានពីរថ្ងៃជាប្រចាំ។ នេះបើតាមការអះអាងរបស់ Huawei។

P8 ទំហំ 16GB មានតម្លៃ ៥៣៥ដុល្លារ 64GB តម្លៃ ៦៥០ដុល្លារ ចំណែក Huawei P8max ទំហំ 32GB មានតម្លៃ ៥៩០ដុល្លារ 64GB តម្លៃ ៧០០ដុល្លារ ដែលនឹងមានលក់នៅ ៣០ប្រទេស រួមទាំង ចិន កូឡុំប៊ី បារាំង អាល្លឺម៉ង់ ម៉ិកស៊ីកូ អេស្ប៉ាញ អាហ្វ្រិកខាងត្បូង ទួរគី អារ៉ាប់រួម និងចក្រភពអង់គ្លេស៕