Van Persie ចូលលេងឲ្យ U-21 Man Utd បានជាង១ម៉ោង តែក្រុមស្មើ

2015-04-21 17:04:16
ចំនួនមតិ 0 | ចំនួនចែករំលែក 0

ចន្លោះមិនឃើញ

Robin van Persie និង Jonny Evans បានបង្ហាញខ្លួនលើទីលានវិញហើយ ដោយចូលលេងឲ្យក្រុម U-21 Manchester United ប៉ុន្តែបិសាចក្រហមបានត្រឹមស្មើ១ទល់១ ជាមួយនឹង U-21 Leicester ប៉ុណ្ណោះ កាលពីយប់មិញ ខណៈដែល Rafael និង Adnan Januzaj រងរបួសអំឡុងពេលប្រកួត ហើយត្រូវដូរចេញ។

ខ្សែប្រយុទ្ធហុល្លង់ Van Persie បានខកខានប្រកួតតាំងពីខែកុម្ភៈ បន្ទាប់ពីរបួសកជើងយ៉ាងធ្ងន់ធ្ងរអំឡុងពេលប្រកួតទល់នឹង Swansea ប៉ុន្តែឥឡូវកីឡាករវ័យ៣១ឆ្នាំ អាចចូលលេងវិញបានហើយ និងបានជួយ assist ឲ្យ Sean Goss ស៊ុតគ្រាប់តាមស្មើ ១-១ ផងដែរ។ យ៉ាងណាក្ដី រូបគេត្រូវដូរចេញនៅនាទី៦២។ នេះអាចជាការប្រកួតកម្ដៅសាច់ដុំមួយរបស់ Persie ដែលអាចឲ្យគេឈានទៅរកតំណែងជម្រើស១១នាក់ដំបូងឈុតធំវិញបាន។

រីឯខ្សែការពារ Jonny Evans ដែលត្រូវពិន័យ៦ប្រកួត ក្រោយស្ដោះទឹកមាត់ដាក់ Papiss Cisse របស់ Newcastle កាលពីខែមិនានោះ ក៏បានចប់ការពិន័យហើយដែរ ហើយក៏បានបង្ហាញខ្លួន ៩០នាទីពេញឲ្យ U-21 Man Utd យប់មិញ។

ចំណែកឯតារាឈុតធំរបស់បិសាចក្រហម ២នាក់ទៀត Rafael និង Adnan Januzaj ដែលជួយលេងឲ្យឈុតយុវជននេះដែរនោះ ត្រូវរងរបួសអំឡុងពេលប្រកួត និងត្រូវដូរចេញដូចគ្នា ពោលគឺ Rafael ត្រូវដូរចេញនៅចុងតង់ទី១ នាទី៤៤ រីឯ Januzaj ដូរចេញនាទី៥៤៕