Fan Bingbing គ្រោងនៅជាមួយមិត្តប្រុស ក្រោមដំបូលផ្ទះតែមួយ

2015-04-24 14:20:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យចចាមអារ៉ាមស្នេហារបស់ Fan Bingbing និង Li Chen បានកក្រើក អស់ជាច្រើនខែមកហើយ បើទោះបីភាគីខាងប្រុស មិនបានអះអាងពីទំនាក់ទំនង របស់ពួកគេក្ដី ប៉ុន្តែប្រភពខាងក្នុងបានឱ្យដឹងថា ពួកគេជិតស្និទ្ធនឹងគ្នា ហើយថែមទាំងគ្រោងរស់នៅជាមួយគ្នា ក្រោមដំបូលផ្ទះតែមួយទៀតផង។

កម្មករសំណងម្នាក់ ដែលកំពុងធ្វើផ្ទះថ្មថ្មីឱ្យ Bingbing បង្ហាញថា លោកបានឃើញតួឯកស្រីរឿង " The Empress of China” និង Li Chen នៅជាមួយគ្នា ពេលខ្លះនៅជាមួយឪពុកម្ដាយទាំងសងខាង។ ចំណែកអ្នករចនាផ្នែកខាងក្នុងម្នាក់ទៀតបញ្ជាក់ថា លោកក៏បានឃើញ តារាស្រីរូបស្រស់នេះ ចេញក្រៅជាមួយ Li Chen ដែរ។

មិនដូចគូស្នេហ៍ដទៃទៀតទេ តួឯករឿង "បិសាចក្រមុំសក់ស" និងមិត្តប្រុស គ្មានបំណងលាក់បាំងទំនាក់ទំនងរបស់ពួកគេទេ។ មិត្តភ័ក្ដិនិងសាច់ញាតិ សុទ្ធតែបានដឹងរឿងរ៉ាវអស់ហើយ ហើយមានចចាមអារ៉ាមលេចឮថា គូស្នេហ៍មួយគូនេះ ត្រៀមប្រកាសឱ្យមហាជនដឹង នៅខែក្រោយ។

កាលពីពេលថ្មីៗនេះ Bingbing, Kathy Chow និង Aarif Lee បានបង្ហាញខ្លួនជាភ្ញៀវកិត្តិយស ក្នុងកម្មវិធី Sze U Tonight ដើម្បីផ្សព្វផ្សាយភាពយន្ត The Empress of China ក្នុងទីក្រុងហុងកុង ដែលនឹងចាក់ផ្សាយនៅថ្ងៃទី២៦ ខែមេសាខាងមុខ៕