កញ្ញាសួស រ័ត្នមុន្នី ៖ សិក្សាផ្នែកវេជ្ជសាស្ត្រ ទាមទារការយកចិត្តទុកដាក់ខ្ពស់

2015-04-27 15:50:21
ចំនួនមតិ 0 | ចំនួនចែករំលែក 0

ចន្លោះមិនឃើញ

មានទីកន្លែងកំណើតក្នុងស្រុក មោងឬស្សី ខេត្តបាត់ដំបង កញ្ញា សួស រ័ត្នមុន្នី គឺជានិស្សិតឆ្នើមផ្នែកវេជ្ជសាស្ត្រជំនាញមន្ទីរពិសោធន៍នៅសាកលវិទ្យាល័យពុទ្ធិសាស្រ្ត ក្នុងរាជធានីភ្នំពេញ។ កញ្ញាទទួលបានពិន្ទុល្អតាំងពីឆ្នាំទី១ រហូតដល់ឆ្នាំទី៣។

រ័ត្នមុន្នី ត្រូវបានឪពុកម្តាយបញ្ជូនមកបន្តការសិក្សានៅរាជធានីភ្នំពេញក្រោយប្រលងសញ្ញាបត្រមធ្យមសិក្សាទុតិយភូមិ(បាក់ឌុប)ជាប់បាននិទ្ទេស C កាលពីឆ្នាំ២០១២ និង បានចូលរៀនថ្នាក់បង់ថ្លៃនៅសាកលវិទ្យាល័យពុទ្ធិសាស្រ្ត។

និស្សិតឆ្នើមដែលមានប្រភពជាកូនកសិកររូបនេះនិយាយថា ការចាប់យកជំនាញមន្ទីរពិសោធន៍គឺជាបំណងប្រាថ្នារបស់ឪពុកម្ដាយ និងខ្លួនឯងផ្ទាល់ ព្រោះមុខជំនាញនេះក្រៅពីសំបូរការងារធ្វើក៏អាចប្រលងចូលបម្រើការងារក្នុងក្របខ័ណ្ឌបានដែរ។ មន្ត្រីក្របខ័ណ្ឌរដ្ឋដែលជាផ្នែកមួយជួយលើកកម្ពស់សុខាភិបាលក្នុងប្រទេសកម្ពុជាពិសេសនៅតំបន់ជនបទ។

កញ្ញាបានរៀបរាប់ថា ការសិក្សាជំនាញនេះទាមទារឱ្យមានការយកចិត្តទុកដាក់ខ្ពស់ ព្រោះអីការសិក្សាផ្នែកនេះត្រូវផ្សារភ្ជាប់ទ្រឹស្ដីនឹងការអនុវត្តជាក់ស្ដែង ។ ពេលខ្លះស្ដាប់មិនទាន់ ពេលគ្រូពន្យល់ ខ្ញុំបានប្រើទូរសព្ទថតសម្លេងគ្រូទុកស្ដាប់ក៏មាន។ "ក្រៅពីនេះបានបែងចែកពេលវេលាហ្មត់ចត់សម្រាប់ការសិក្សា និងការលំហែកាយខួរក្បាល” ។

កញ្ញាបានទុកពេលវេលាដើម្បីស្វ័យសិក្សាដោយខ្លួនឯងយ៉ាងហោចណាស់មួយថ្ងៃពីរ ឬបីម៉ោង។

បើទោះជាប្រជែងបានចំណាត់លេខ១ ចាប់តាំងពីឆ្នាំទី១ មក កញ្ញា រ័ត្នមុន្នី បានរៀបរាប់ថា ការចាប់យកជំនាញមន្ទីរពិសោធន៍នេះមិនមែនជាជំនាញដែលខ្លួនពេញចិត្តបំផុតនោះឡើយ។ជំនាញផ្នែកឱសថសាស្ត្រឯណេះទេ ដែលខ្លួនពេញចិត្ត ប៉ុន្តែដោយសារការចំណាយខ្ពស់ទើបសម្រេចចិត្តសិក្សាផ្នែកមន្ទីរពិសោធន៍។ ក្រោយបញ្ចប់ការសិក្សាកញ្ញាមានបំណងប្រាថ្នាធំពីរទី១ ការប្រលងយកក្របខ័ណ្ឌនៅក្រសួងសុខាភិបាល ទី២ ការស្វែងរកអាហារូបករណ៍សិក្សានៅក្រៅប្រទេស។ កញ្ញាបានផ្តាំផ្ញើទៅយុវជនទាំងអស់ត្រូវប្រឹងប្រែងរៀនសូត្រ ដើម្បីក្លាយជាធនធានសម្រាប់អភិវឌ្ឍន៍សង្គមនាពេលអនាគត៕