ចិនវ៉ាដាច់អាមេរិកក្លាយជាមហាអំណាចសេដ្ឋកិច្ចធំជាងគេលើលោក

2014-10-09 18:00:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិតជារឿងដ៏គួរឲ្យភ្ញាក់ផ្អើលណាស់ ដែលពេលនេះសេដ្ឋកិច្ចសហរដ្ឋអាមេរិកធ្លាក់តំណែងទៅលេខ២ ជាលើកដំបូងគិតតាំងពីឆ្នាំ១៨៧២ មក ខណៈចិនជាអ្នកឆក់យកតំណែងមហាអំណាចសេដ្ឋកិច្ចពិភពលោកមួយនេះ។

តាមទិន្នន័យចុងក្រោយរបស់មូលនិធិរូបិយវត្ថុអន្តរជាតិ (IMF) បានបង្ហាញថាទំហំសេដ្ឋកិច្ចចិនបានកើនឡើងដល់ ១៧៦១០ពាន់លានដុល្លារ លើសទំហំសេដ្ឋកិច្ចអាមេរិកដែលមានត្រឹម ១៧៤០០ពាន់លានដុល្លារ។ សេដ្ឋកិច្ចរបស់មហាយក្សកុម្មុយនិស្តអាស៊ីចិន មានសន្ទុះកើនឡើងឆាប់រហ័សក្នុងរយៈពេលប៉ុន្មានទសវត្សរ៍ចុងក្រោយនេះ ដោយសារឧស្សាហកម្មនានាមានការរីកលូតលាស់យ៉ាងលឿន។

តាមការប៉ាន់ស្មាន ការនាំមុខគេក្នុងតំណែងមហាអំណាចសេដ្ឋកិច្ចរបស់ចិន នឹងនៅទ្រឹងបន្តទៅមុខទៀត។ IMF រំពឹងថាសេដ្ឋកិច្ចរបស់ប្រទេសមានប្រជាជនច្រើនជាងគេលើលោកនេះ នឹងកើនឡើងដល់ក្រោម ២៦៩៨០ពាន់លានដុល្លារ ត្រឹមឆ្នាំ២០១៩ ធំជាងសេដ្ឋកិច្ចអាមេរិក ២០% ដែលកើនឡើងត្រឹម២២៣០០ពាន់លានដុល្លារក្នុងពេលដូចគ្នា។

តារាងទិន្នន័យចុងក្រោយរបស់ IMF បង្ហាញពីទំហំសេដ្ឋកិច្ចប្រទេសទាំងពីរ

កន្លងមកធ្លាប់មានការទស្សន៍ទាយថា ចិនត្រូវចំណាយពេល ១០ឆ្នាំទៀតទើបអាចឆក់យកតំណែងសេដ្ឋកិច្ចលេខមួយពីសហរដ្ឋអាមេរិកបាន ប៉ុន្តែមិនទាន់បានមួយឆ្នាំផង កំណើនសេដ្ឋកិច្ចដ៏លឿនដូចផ្លេកបន្ទោរបានធ្វើឲ្យប្រទេសអាស៊ីមួយនេះ នាំមុខគេផ្នែកសេដ្ឋកិច្ច។ អាមេរិកបានក្លាយជាមហាអំណាចសេដ្ឋកិច្ចពិភពលោកក្នុងឆ្នាំ១៨៧២ ក្រោយដណ្ដើមតំណែងនេះបានពីចក្រភពអង់គ្លេស ប៉ុន្តែពេលនេះតំណែងកំពូលគេ ១៤២ឆ្នាំ បានបញ្ចប់ហើយ៕

ប្រែសម្រួល៖ គង់ វិសាល

ប្រភព៖ dailymail