បេតិកភណ្ឌពិភពលោក៤ ត្រូវបំផ្លាញដោយសាររញ្ជួយដីនៅនេប៉ាល់

2015-04-27 16:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងហោចណាស់ទីតាំងបេតិកភណ្ឌពិភពលោករបស់ UNESCO ចំនួន ៤ ក្នុងចំណោម៧ នៅជ្រលង Kathmandu ត្រូវបានបំផ្លាញស្ទើរទាំងស្រុងដោយសារគ្រោះរញ្ជួយដីមហាប្រល័យនៅប្រទេសនេប៉ាល់កាលពីថ្ងៃសៅរ៍។ ក្នុងចំណោមតំបន់បេតិកភណ្ឌពិភពលោកទាំង៤ដែលប៉ះពាល់ធ្ងន់ធ្ងរនោះ មាន៣ជាទីក្រុងបូរាណ។

នៅទីក្រុង Bhatapur ដែលជាទីក្រុងបូរាណល្អជាងគេរបស់នេប៉ាល់ ត្រូវបានខូចខាត៨០ភាគរយ។ អគារផ្សេងទៀតដែលបានដួលរលំ គឺអគារប៉ម Dharahara tower។ ប៉មដែលកសាងតាំងពីឆ្នាំ១៨៣២នេះ ជាទីតាំងទេសចរណ៍ដ៏ពេញនិយម ដែលអាចឲ្យអ្នកទេសចរមើលឃើញទិដ្ឋភាពនៃរដ្ឋធានី Kathmandu។

ចំណែកទីតាំងបេតិកភណ្ឌរបស់ UNESCO ៣កន្លែងទៀត គឺតំបន់ Durbar square ឬហៅម្យ៉ាងទៀតថា Noble court នៅ Kathmandu, Patan និង Bhaktapur ក៏ត្រូវបានបំផ្លាញយ៉ាងដំណំដែរ។ ប្រាសាទបូរាណនៅ Bhaktapur បានខ្ទេចខ្ទីផ្នែកដំបូល រីឯប្រាសាទសតវត្សទី១៦ Vatsala Durga បានខូចខាតទាំងស្រុង។ ចំណែកសំណង់អគារបូរាណនៅ Patan ដែលរួមមានប្រាសាទ Swayambhunath ក៏រងការខូចខាតដែរ។

ទីតាំងបេតិកភណ្ឌពិភពលោកទាំង៧នៅជ្រលង Kathmandu រួមមាន៖ Durbar square នៅ Kathmandu, នៅ Patan និងនៅ Bhaktapur, ប្រាសាទព្រះពុទ្ធ Swayambhunath និង Boudhanath និងប្រាសាទហិណ្ឌូ Pashupatinath និង Changu Narayan។

គ្រោះរញ្ជួយដីនៅនេប៉ាល់ គិតមកទល់ពេលនេះបានសម្លាប់មនុស្សអស់ជាង២៥០០នាក់មកហើយ ខណៈមនុស្សជាច្រើនពាន់នាក់ទៀតបានរងរបួស។ ចំនួនអ្នកស្លាប់ត្រូវបានគេប៉ាន់ស្មានថាអាចកើនឡើងច្រើនជាងនេះទៀត៕