៥វិធី ដើម្បីជៀសវាងការចម្លងផ្ដាសាយនៅកន្លែងធ្វើការ

2015-04-27 17:08:02
ចំនួនមតិ 0 | ចំនួនចែករំលែក 0

ចន្លោះមិនឃើញ

អាកាសធាតុប្រែប្រួលពីក្ដៅខ្លាំង មកជាភ្លៀងខ្លាំងនាប៉ុន្មានថ្ងៃចុងក្រោយនេះ បានធ្វើឲ្យមានអ្នកកើតជំងឺផ្ដាសាយជាច្រើន។ ផ្ដាសាយងាយនឹងឆ្លងពីមនុស្សម្នាក់ទៅមនុស្សម្នាក់ទៀតខ្លាំងណាស់ ដូច្នេះដើម្បីបង្ការកុំឲ្យជំងឺនេះរាតត្បាតនៅក្នុងគ្រួសារ ក៏ដូចជានៅកន្លែងធ្វើការ Sabay សូមលើកយកវីធីបង្ការ ៥ យ៉ាង ដែលជាដំបូន្មានរបស់លោកវេជ្ជបណ្ឌិត David Scheiner។ វេជ្ជបណ្ឌិតខាងលើធ្លាប់ជាអ្នកមើលថែទាំសុខភាព មេដឹកនាំដ៏ល្បីអាមេរិកគឺ លោក បារ៉ាក់ អូបាម៉ា ឲ្យមានសុភាពល្អផងដែរ។

១. ចាក់វ៉ាក់សាំងផ្ដាសាយ

ចំពោះអ្នកដែលតែងមានជំងឺផ្ដាសាយជាប់រហូត ពិសេសអ្នកមានជំងឺទឹកនោមផ្អែម និងហើមសួត គួរទៅរកការចាក់វ៉ាក់សាំងការពារផ្ដាសាយ។ បើទោះជា វ៉ាក់សាំងនេះមិនមានប្រសិទ្ធភាព ១០០% វាក៏អាចការពារអ្នកបាន ៧០% ផងដែរ។ ហើយចំពោះអ្នក ដែលកំពុងមានជំងឺផ្ដាសាយស្រាប់ វាអាចឲ្យធ្វើឲ្យសភាពរបស់អ្នកធូរស្បើយជាងមុន។

២. ជៀសវាងហ្វូងមនុស្សច្រើន

ការនៅកន្លែងដែលមានមនុស្សកុះករ អាចឲ្យអ្នកប្រឈមនឹងការឆ្លងផ្ដាសាយខ្ពស់។ ដូច្នេះ អ្នកគួរនៅឲ្យឆ្ងាយពីតំបន់ដែលមានមនុស្សច្រើន ហើយបើមិនអាចជៀសបានត្រូវពាក់ម៉ាសឲ្យបានត្រឹមត្រូវ។

៣. ត្រូវលាងដៃឲ្យបានញឹកញាប់

តាមការសិក្សាមួយបង្ហាញថា ការិយាល័យជាកន្លែងមួយដែលកខ្វក់ ខណៈដែលបុគ្គលិកមានប្រហែល ១៥ % ប៉ុណ្ណោះដែលសម្អាតការិយាល័យរបស់ខ្លួនក្នុងមួយសប្ដាហ៍។ ដូច្នេះការលាងដៃជាប្រចាំជាវិធីដ៏ប្រសើរបំផុតដើម្បីបង្ការ មេរោគឆ្លងទាំងឡាយ ជាពិសេសក្រោយប្រាស្រ័យទាក់ទងជាមួយអ្នកមានជំងឺផ្ដាសាយ។ ការលាងដៃគួរត្រូវធ្វើឲ្យបានយ៉ាងហោចណាស់ ២០ វិនាទី។ ការប្រើទឹកលាងដៃ (hand Sanitizer) ឬដាក់ជាប់ខ្លួនក៏ជារឿងដ៏ល្អដែរ។

៤. កាត់បន្ថយការប៉ះពាល់គ្នាដោយផ្ទាល់

ប្រសិនបើមនុស្សនៅជិតខ្លួនអ្នកកើតជំងឺផ្ដាសាយ ដូចជាមិត្តរួមការងារជាដើមនោះ អ្នកគួរកាត់បន្ថយការប៉ះពាល់គ្នាតាមដែលអាចធ្វើទៅបាន។ ដំបូន្មានរបស់លោក Scheiner នេះ មិនមែនចង់ឲ្យមនុស្សរើសអើងគ្នានោះ ទេ ប៉ុន្តែជាវិធីល្អមួយដែលអាចកាត់បន្ថយការឆ្លងជំងឺនេះបាន។ ប្រសិនបើត្រូវប៉ះដៃជាចាំបាច់ ដូចជាការចាប់ដៃ ឬក៏ទះដៃអបអរជាមួយមិត្តរួមការងារ អ្នកត្រូវអនុវត្តតាមវិធីទី៣ខាងលើ គឺទៅលាងដៃជាបន្ទាន់។

៥. ទៅជួបគ្រូពេទ្យ

ប្រសិនបើអ្នកគិតថា ខ្លួនកើតផ្ដាសាយតែមិនប្រាកដ ត្រូវទៅជួបពិគ្រោះជាមួយគ្រូពេទ្យ។ ដោយសារ ប្រជាជនយើងមិនសូវចូលចិត្តទៅជួបវេជ្ជបណ្ឌិតព្រោះយល់ថា នេះជាំជំងឺតូចតាច ការរក្សាលេខទំនាក់ទំនងរបស់គ្រូពេទ្យជារឿងដ៏ល្អមួយ។ ទូរស័ព្ទទៅសួរគ្រូពេទ្យ និងរៀបរាប់ពីអាការៈរបស់អ្នកឲ្យគ្រូពេទ្យវាយតម្លៃ និងឲ្យដំបូន្មាននៅពេលអ្នកមានអាការៈដូចចង់ផ្ដាសាយ។ បើសិនអ្នកកំពុងមានជំងឺ លោកវេជ្ជបណ្ឌិត Scheiner ឲ្យដំបូន្មានថា ត្រូវផឹកទឹកឲ្យបានច្រើន សម្រាកឲ្យបានច្រើន និងមិនត្រូវនៅកន្លែងដែលមានអាកាសធាតុត្រជាក់នោះទេ៕

ចុចអាន៖ អាហារ៥ប្រភេទ អាចកម្ចាត់ក្លិនខ្លួនមិនល្អ

ប្រភព៖ Entrepreneur