ហៃ ដារ៉ូ ភ្ជាប់ពាក្យជាមួយគូដណ្ដឹងដែលមានប្រវត្តិកម្សត់កម្រ

2015-04-27 19:05:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ហៃ ដារ៉ូ ជាអ្នកបញ្ចូលសម្លេងម្នាក់ដែលមានការគាំទ្រខ្លាំងបន្ទាប់ពីបានជាប់ Top5 នៅក្នុងកម្មវិធីពេញចិត្តអត់ប៉ុស្តិ៍ MyTv នោះ បានភ្ជាប់ពាក្យរួចហើយថ្មីៗនេះ។ អនាគតភរិយារបស់លោក គឺជា Fan របស់លោកតែម្ដង និងជានារីដែលមានប្រវត្តិកម្សត់កម្រ។

"គាត់ជា Fan ម្នាក់ដែលគាំទ្រការបញ្ចូលសម្លេងរបស់ខ្ញុំគាត់តែងតែ Chat មកលេងខ្ញុំពេលដែលគាត់ទំនេរពីការងារនៅប្រទេសថៃហើយតែងតែលើកទឹកចិត្តខ្ញុំដែលធ្វើឲ្យខ្ញុំមិនអាចបាត់សម្លេងនេះបាន"។

ហៃ ដារ៉ូ និងគូដណ្ដឹង ផូ លក្ខិណា(រូបថត៖ FB ដារ៉ូ)

គូដណ្ដឹងរបស់ ដារ៉ូ ឈ្មោះ ផូ លក្ខិណា ពួកគេទាំងពីរបានភ្ជាប់ពាក្យជាមួយគ្នាកាលពីថ្ងៃសុក្រចុងសប្ដាហ៍មុននេះ។ អ្នកបញ្ចូលសំឡេងទិនហ្វីរូបនេះ ឲ្យដឹងបន្តថា កំណើតស្នេហ៍របស់ពួកគេ កើតឡើងពីការគាំទ្រ ហើយថា គូដណ្ដឹងរបស់លោក តែងជាអ្នកលើកទឹកចិត្តពេលដែល លោកជួបរឿងបាក់ទឹកចិត្ត ព្រោះនាងក៏ជាមនុស្សធ្លាប់ជួបការលំបាកច្រើនដែរ។

"គ្រាមួយដែលខ្ញុំមិនបានជាប់ចំណាត់ថ្នាក់លេខ១នៅក្នុងកម្មវិធីពេញចិត្តអត់វគ្គ២ ហ្នឹង ខ្ញុំមានការពិបាកចិត្តលែងចង់ចាប់អាជីពបញ្ចូលសម្លេងហ្នឹងទៀតហើយ ប៉ុន្តែដោយសារតែរូបគាត់ទើបធ្វើឲ្យខ្ញុំតស៊ូដល់ពេលនេះ"។ ដារ៉ូ ថ្លែង។

ពាក់ព័ន្ធនឹងគូដណ្ដឹងរបស់លោក កញ្ញា ផូ លក្ខិណា ដារ៉ូ ប្រាប់ថា នាងគឺជាកូនកំព្រាម្នាក់ ដែលត្រូវបានឪពុកម្តាយបោះបង់ចោលនៅខេត្តបន្ទាយមានជ័យតាំងពីរូបនាងមានអាយុ២០ថ្ងៃមកម្ល៉េះ។ នាងត្រូវបានអ្នកស្រុកនៅទីនោះជួយចិញ្ចឹមតៗគ្នារហូតធ្លាក់ដល់ម្តាយចិញ្ចឹមចុងក្រោយសព្វថ្ងៃនេះ។

"ខ្ញុំបានបាក់ចិត្តស្រលាញ់រូបគាត់ព្រោះតែគាត់ចេះធ្វើឲ្យខ្ញុំចេះតស៊ូ លើកទឹកចិត្តខ្ញុំណាមួយគាត់នារីដែលគួរឲ្យអាណិតបន្ទាប់ពីខ្ញុំបានស្តាប់ការតស៊ូរបស់គាត់ ដែលធ្លាប់បានទៅធ្វើការនៅក្រៅប្រទេសជាកម្មករសំណង់ ខ្ញុំរឹតតែអាណិត និងស្រឡាញ់គាត់ខ្លាំងឡើង ហើយគាត់ក៏បានប្រាប់ថាពេញចិត្តខ្ញុំដូចគ្នាដែរ"។ ដារ៉ូ បញ្ជាក់។

តាមគម្រោង ក្រោយភ្ជាប់ពាក្យរួច ពិធីរៀបអាពាហ៍ពិពាហ៍ពួកគេទាំងពីរ នឹងប្រព្រឹត្តទៅនៅថ្ងៃទី ១១ខែឧសភាខាងមុខនេះនៅគេហដ្ឋានខាងស្រីនាខេត្តបន្ទាយមានជ័យ ដោយពិធីធ្វើឡើងមិនធំដុំប៉ុន្មានឡើយ គឺធ្វើធម្មតាៗតាមរបៀបអ្នកស្រុកបន្ទាយមានជ័យ។នេះបើតាមដារ៉ូបញ្ជាក់។

បន្ថែមលើសពីនេះទៅទៀតនៅពេលដែលរៀបការរួច ដារ៉ូ បានប្រាប់ថា នឹងនាំភរិយាទៅរស់នៅស្រុកកំណើតខ្លួនមួយរយៈសិន ព្រោះឥឡូវរូបលោកមានការរវល់ជាមួយនឹងការងារសិល្បៈហើយចង់ខិតខំនៅក្នុងវិស័យសិល្បៈឲ្យបានខ្លាំងជាងមុនផងដែរ។

ហៃ ដារ៉ូ មានស្រុកកំណើតមកពីខេត្តព្រៃវែង ហើយសព្វថ្ងៃលោក គឺជាអ្នកបញ្ចូលសម្លេង និងជាអ្នកចម្រៀងគ្មានកុងត្រានៅក្នុងផលិតកម្មកាលីប។ យ៉ាងណាមិញលោក បង្ហើបថា ក៏ត្រៀមសម្ដែងរឿងខ្លះៗ និងថតឲ្យផលិតកម្មLD Pictureផងដែរ៕

អត្ថបទ៖ ថា ម៉ាលីដា