Rodgers៖ Liverpool ជាក្រុមប្រជែងយកជើងឯករដូវកាលក្រោយ

2015-04-28 15:47:00
ចំនួនមតិ 0 | ចំនួនចែករំលែក 0

ចន្លោះមិនឃើញ

១២ខែមុន អ្នកចាត់ការ Brendan Rodgers ស្ទើរតែជួយឲ្យក្រុម Liverpool លើកពានលីកកំពូលរបស់អង់គ្លេសលើកទី១៩បានទៅហើយ ប៉ុន្តែចុងក្រោយបែរជាភ្លាត់ជិតចប់រដូវកាលវិញ។ ក្រោយធ្លាក់ទម្រង់លេងខ្លាំងនៅរដូវកាលនេះ អ្នកចាត់ការវ័យ៤២ឆ្នាំ នៅតែជឿថាហង្សក្រហមរបស់លោក នឹងនៅតែជាក្រុមប្រជែងតំណែងជើងឯក នៅរដូវកាលក្រោយ។

Liverpool លើកពានលីកកំពូលអង់គ្លេសលើកចុងក្រោយ ឆ្នាំ១៩៩០

រយៈពេល២៥ឆ្នាំហើយ ដែល Liverpool បានយកឈ្នះលើ Queens Park Rangers នឹងលើកពានលីកកំពូលលើកទី១៨របស់ខ្លួន និងលើកចុងក្រោយ ខណៈដែលពួកគេកំពុងតែស្វែងរកពានលើកទី១៩របស់ខ្លួនបន្ត។

ទោះបីជារដូវកាលនេះ ក្តីសង្ឃឹម Top 4 ស្ទើរតែបាត់បង់ទាំងស្រុងហើយក្តី ប៉ុន្តែនៅពេលអ្នកសារព័ត៌មានសួរថា តើ Liverpool អាចឈ្នះពានរដូវកាលក្រោយដែរ ឬទេ? លោក Rodgers បានឆ្លើយតបថា "ពិតណាស់"។

អ្នកចាត់ការសញ្ជាតិអៀរឡង់ខាងជើងរូបនេះ បានបន្ថែមថា៖ "នៅពេលដែលខ្ញុំមកកាន់ទីនេះ គឺជាផ្លូវមួយដ៏វែងឆ្ងាយ។ វាជាការខកចិត្តខ្លាំងមួយ ដែលពួកយើងមិនអាចប្រជែងយកតំណែងជើងឯកនៅរដូវកាលនេះ ប៉ុន្តែយើងនៅតែមានសង្ឃឹមជានិច្ច ហើយយើងនឹងត្រៀមប្រជែងម្តងទៀត។ ខ្ញុំជឿថាវានឹងអាចទៅរួច"។

បច្ចុប្បន្ន Liverpool កំពុងឈរនៅតំណែងលេខ៥ ហើយបញ្ហាចំបងរបស់ពួកគេនៅរដូវកាលនេះគឺ មិនអាចរកគ្រាប់បាល់បញ្ចូលទីគេបានគ្រប់គ្រាន់ បន្ទាប់ពីលក់ Luis Suarez ទៅ Barcelona កាលពីដើមរដូវកាល ហើយ Daniel Sturridge របួសស្ទើរតែពេញ១រដូវកាលនេះថែមទៀត៕

ចុះប្រិយមិត្តយល់យ៉ាងណា ចំពោះការលើកឡើងរបស់លោក Rodgers ខាងលើនេះ?

-ចុចអាន៖ Rodgers៖ “គ្មានអ្នកណាមកដឹកនាំ Liverpool ល្អជាងខ្ញុំទៀតទេ”

ប្រែសម្រួល៖ វិន ជីវ័ន្ត ប្រភព៖ Mirror