ខ្មែរមួយរូបរៀបរាប់ហេតុការណ៍គ្រោះរញ្ជួយដីដ៏រន្ធត់នៅប្រទេសនេប៉ាល់

2015-04-28 22:19:38
ចំនួនមតិ 0 | ចំនួនចែករំលែក 0

ចន្លោះមិនឃើញ

បាតុភូតគ្រោះរញ្ជួយដីកម្រិត ៧,៨ រិកទ័រ ដ៏រន្ធត់ដែលបានសម្លាប់មនុស្សជាង ៤ ពាន់នៅប្រទេសនេប៉ាល់ កាលពីចុងសប្ដាហ៍មុនក៏មានពលរដ្ឋខ្មែរមួយរូបស្ថិតនៅក្នុងហេតុការណ៍នោះដែរ។

លោក ឃួន សុភក្តិ (ឃួន ឌីណា) គឺជាបុគ្គលិកអង្គការក្រៅរដ្ឋាភិបាលផ្នែកសិទ្ធិមនុស្ស ដែលបានទៅបម្រើការងារនៅប្រទេសនេប៉ាល់ជាង៩ ខែកន្លងមកហើយ។ មុនចេញទៅបម្រើការងារនៅប្រទេសនេប៉ាល់ លោកគឺជាអតីតបុគ្គលិកបម្រើការងារនៅមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM)។ បច្ចុប្បន្ន លោកកំពុងរស់នៅក្នុងទីក្រុងកាត់តាម៉ាន់ឌូ នៃប្រទេសនេប៉ាល់។

"ចាប់តាំងពីយប់ម៉ោង ៨ ថ្ងៃទី២៦ មកដល់ព្រឹកម៉ោង៦៖១៥នាទីម្សិលមិញ ការរញ្ជួយដីកើតឡើងតែ ២ដងទេ ក្នុងកម្រិតគួរឱ្យបារម្ភ។ ប្រជាជននៅតែមិនហ៊ានចូលទៅកាន់ ផ្ទះសម្បែងនៅឡើយ។ យប់មិញភ្លៀងផង ធ្វើឱ្យប្រជាជនជាច្រើនអង្គុយសំកុករហូតទល់ភ្លឺ”។ ទាំងនេះគឺជាការរៀបរាប់របស់លោក ឌីណា តាមរយៈសារអេឡិចត្រូនិចប្រាប់ Sabay។ លោក ឌីណា មិនមានរងរបួសនោះទេ ក្នុងហេតុការណ៍ខាងលើ។

លោកបានបន្ថែមថា ចាប់តាំងពីមានការរញ្ជួយដីមកលោកត្រូវរស់នៅក្រោមដំបូលតង់សង់ឡើងជាប់ៗគ្នា និងកំពុងប្រឈមបញ្ហាកង្វះបង្គន់អនាម័យ ទីជម្រកសមរម្យ បញ្ហាអគ្គិសនី និងអាហារហូបចុក។ ដូច្នេះ បើស្ថានភាពអាក្រក់នៅតែបន្តបែបនេះ លោកនឹងទុកពេលមួយថ្ងៃទៀតដើម្បីពិចារណាវិលមកមាតុប្រទេសវិញ។ "នៅម៉ោង ៩៖៣៨នាទី យប់មិញនេះ ការរញ្ជួយដី នៅនេប៉ាល់ បានកើតឡើងម្ដងទៀត កម្រិតប្រហែល ៤,៧ រិកទ័រ(វាយតម្លៃ ដោយ ខ្លួនខ្ញុំទេ) ដែលធ្វើឱ្យប្រជាជននេប៉ាល់ និងខ្ញុំ ភ័យរត់គួរសម រត់ទៅក្រាបតាមទីនានាទាំងយប់ងងឹត”៕