បើ​អ្នក​ធ្វើ​ដំណើរ​ទៅ​ខេត្តកោះកុង ឬរតនគិរី អ្នក​នឹងឮ​គេ​និយាយ​​អំពី​ការ​ដើរ​ជួប​​សត្វ​ក្រពើ​​​នៅ​ក្នុង​ព្រៃ។ ​បើ​ទៅខេត្ត​​ក្រចេះ អ្នក​ប្រាកដ​ជា​​​ឃើញ​ផ្ទាល់​​ សត្វ​ផ្សោត​​រាប់​សិប​ក្បាល​ដែរ។ ទោះ​សត្វ​ទាំង​ពីរ​នេះ​មាន​នៅ​កម្ពុជា​​​ច្រើនមែន​ពិត តែ​​ពួក​វា​មាន​​ឈ្មោះ​​តំណាង​ឱ្យ ​ប្រទេស​​គេ​ទៅ​វិញ។

 

ក្រពើ​សៀម ឬ Siamese crocodile

(a) ក្រពើ​​សៀម (Siamese crocodile) ៖ សត្វ​ជិត​ផុតពូជ​ដែល​​មាន​រស់​​នៅ​​កម្ពុជា​​នេះ​ ប្រជាជន​ខ្មែរ​និយម​ហៅ​ថា​ក្រពើ​ភ្នំ។ តែ​បើ​យោង​តាម​គេហទំព័រ Thainews បង្ហាញ​ថា ក្រពើ​ទឹកសាប​នេះ ត្រូវ​​គេ​រក​ឃើញ​ដំបូង​​នៅ​លើ​កំពូល​ជួរ​ភ្នំ Chomphu ខេត្ត Phitsanulok ប្រទេស​ថៃ។ ពេល​នោះ ប្រជាពលរដ្ឋ​​រស់​នៅ​ស្រុក Noen Maprang បាន​ដឹកនាំ​ក្រុម​អ្នកកាសែត ទៅ​មើល​សត្វ​ក្រពើ​នេះ។ ពេល​ឡើង​លើ​​ភ្នំអស់​ចម្ងាយ​​១៣​គីឡូម៉ែត្រ ពួកគេ​បាន​ឃើញ​ក្រពើ​ពីរ​បី​ក្បាល ប្រវែង​ប្រហែល​២ម៉ែត្រ និង​ពង​ជាង​១០​គ្រាប់ពិត​មែន។ ពួក​អ្នក​សារព័ត៌មាន​ទាំង​នោះ​ក៏​ហៅ​ឈ្មោះ​វា​ ក្រពើ​​សៀម ត​ៗ​គ្នា​មក​ ខណៈ​ក្រពើ​ប្រភេទ​នេះ​មាន​ច្រើន​​នៅ​កម្ពុជា។

 

ផ្សោត​ក្នុង​ទន្លេ​មេគង្គ ក្នុង​ខេត្ត​ក្រចេះ

(b) ត្រី​ផ្សោត Irrawaddy ៖ វា​ក៏​សំបូរ​រស់​នៅ​​​ក្នុង​ទន្លេ​មេគង្គ​ដែរ ហើយ​ពលរដ្ឋ​កម្ពុជា​​ពេល​និយាយ​ពី​ត្រី​ផ្សោត គឺ​សំដៅ​ទៅ​ខេត្ត​ក្រចេះ​ ឬ​ខេត្ត​ស្ទឹង​ត្រែង​​ដែល​សំបូរ​ត្រី​ផ្សោត​នេះ​រស់​នៅ​ តែ​ក្នុង​ឆាក​អន្តរជាតិ​វិញ​ គេ​ហៅ​វា​ថា​ជា​​ផ្សោត​អ៊ីរ៉ាវ៉ាឌី ឬ (Irrawaddy Dolphin)។ តាម​ការ​ពិត Irrawaddy ជា​ឈ្មោះ​ទន្លេ​របស់​​ប្រទេស​ភូមា។ ផ្សោត​អ៊ីរ៉ាវ៉ាឌី ​ជា​សត្វ​រស់​នៅ​ទឹក​មាន​ជាតិ​ប្រៃ​តិចៗ​ ឬ​នៅ​ក្បែរ​សមុទ្រ ប៉ុន្តែ​បច្ចុប្បន្ន​នេះ គេ​ឃើញ​ពួកវារស់​នៅ​ច្រើន​គួរសម​ដែរក្នុង​ទន្លេ​មេគង្គ​៕

 

-មើល​អត្ថបទ៖ កម្រង​រូប​ភាព ហ្វូង​ក្របី​ផ្ដាច់​ជីវិត​អធិរាជ​លើ​វាល​ស្មៅ

 

ប្រែ​សម្រួល៖ អ៊ុំ សុភក្តិ ប្រភព៖ Thainews, wikipedia ​​