ចង់បានរាងស្រឡូនដូច ទឹម រដ្ឋា មិនពិបាកទេ!

2015-04-30 15:55:09
ចំនួនមតិ 0 | ចំនួនចែករំលែក 0

ចន្លោះមិនឃើញ

“អូ...មិនពិបាកទេអូន វិធីថែរក្សារាងឲ្យនៅតែស្រឡូនរបស់បង គឺផ្ដោតសំខាន់លើការហាត់ប្រាណជាខ្លាំង"។ កញ្ញារាងខ្ពស់ស្រឡះទឹម រដ្ឋា ប្រាប់ Sabay ។

តារាសម្ដែង និង ម៉ូដែលលេចធ្លោប្រចាំប្រទេសកម្ពុជារូបនេះ បាននិយាយប្រាប់ បន្ទាប់ពីមានមនុស្សជាច្រើនទាំងក្នុង និង ក្រៅសិល្បៈជាពិសេសនារីៗ ដូចគ្នាតែងកោតសរសើរនាងថានៅមានរូបរាងស្រឡូន ហើយស្រស់ស្អាតថែមទៀតផង។

“បើទោះបីជាខ្ញុំរវល់យ៉ាងណា ក៏យ៉ាងហោចណាស់ត្រូវហាត់ប្រាណឲ្យបាន ៣ ដង ក្នុងមួយសប្ដាហ៍ដែរ។ ការហាត់ប្រាណនេះគឺមិនមែនដើម្បីសម្រកទម្ងន់ទៀតទេ តែដើម្បីកុំឲ្យសាច់យារ និងធ្វើឲ្យសាច់តឹងណែនរលោងស្អាត។ ម្យ៉ាងវិញទៀតនៅពេលយប់ខ្ញុំមិនញ៉ាំអាហារឲ្យតឹងពោះទេ។

ស្រីស្រស់សាច់សខ្ចីបានបន្ថែមទៀតថា "កញ្ញាតែងទៅក្លិបហាត់ប្រាណជានិច្ច ព្រោះនៅទីនោះមានអ្នកជំនាញសម្រាប់បង្ហាត់បង្ហាញ ហើយការហាត់នេះទៀតសោតមានតាមផ្នែករបស់វាដូចជា ហាត់ធ្វើឲ្យភ្លៅស្រឡូន, ឲ្យត្រគាកង, ក្បាលពោះរាបស្មើ, ដើមទ្រូងតឹងណែន ហាត់បំបាត់សាច់យារត្រង់ដើមដៃ និងកំភួនជើងតូច ជាដើម។ ប៉ុន្តែសម្រាប់កញ្ញាផ្ដោតសំខាន់តែភ្លៅ ត្រគាក និងក្បាលពោះប៉ុណ្ណោះ"។

"ប៉ុណ្ណេះមិនទាន់គ្រប់គ្រាន់ទេ របបអាហារក៏ជាកត្តាសំខាន់ណាស់ដែរដោយខ្ញុំញ៉ាំអាហារពេញបីពេលតែ តមជាតិខ្លាញ់ និងទទួលទានបន្លែឲ្យបានច្រើន ហើយអ្វីដែលពិសេសគឺរាងរបស់បងមានអំណោយទានពីធម្មជាតិស្រាប់(សើច)"។

ទឹម រដ្ឋា កើតនៅថ្ងៃទី ៧ មករា ឆ្នាំ១៩៨៦ នៅខេត្តបាត់ដំបង មានកម្ពស់ ១៧០សង់ទីម៉ែត្រ និងទទួលការណែនាំ ឲ្យចូលប្រលងក្នុងការប្រកួតបវរកញ្ញាឯកព្រីដស្តុន កាលពីឆ្នាំ២០០៤ ហើយបានទទួលចំណាត់ថ្នាក់លេខ២៕

អត្ថបទ៖ទ្រី រ៉ាវី