ឈុន ឆេង អតីតសិស្សនិទ្ទេស A មកពីខេត្តតាកែវចែករំលែកបទពិសោធន៍រៀនពូកែ

2015-05-11 16:08:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាកូនអ្នកមកពីតាកែវ ឈុន ឆេង បច្ចុប្បន្នជានិស្សិតឆ្នើមកំពុងបន្តការសិក្សានៅសាកលវិទ្យាល័យ Zaman ជំនាញធនាគារ និងហិរញ្ញវត្ថុឆ្នាំទី៤ ឆមាសទី២។ យុវជន ឈុន ឆេង ទទួលបានអាហារូបករណ៍ចំនួន ៧៥% នៅសាកលវិទ្យាល័យខាងលើ បន្ទាប់ពីប្រលងសញ្ញាបត្រមធ្យមសិក្សាទុតិយភូមិ(បាក់ឌុប) បាននិទ្ទេស A ឆ្នាំ២០១១។

ឈុន ឆេង បានសម្រេចចាប់យកជំនាញធនាគារ និងហិរញ្ញវត្ថុ ដែលជាបំណងប្រាថ្នាផ្ទាល់ខ្លួន និងបានការណែនាំពីបងប្រុស នៅសាកលវិទ្យាល័យមួយដែលភាគច្រើនជាកូនអ្នកមានកម្រិតជីវភាពខ្ពស់ចូលរៀន។ "ខ្ញុំចាប់យកជំនាញខាងលើនេះ ព្រោះដឹងខ្លួនឯងចូលចិត្តលេខ និងមានការណែនាំពីបងប្រុស។ មែនទែនទៅដំបូង ខ្ញុំអត់ដឹងថា ធនាគារ និងហិរញ្ញវត្ថុនេះសិក្សាជំនាញអីខ្លះនោះទេ”។ ឆេង និយាយ។

មានទីកន្លែងកំណើតនៅភូមិរមេញខាងត្បូង ឃុំរមេញ ស្រុកកោះអណ្ដែត ខេត្តតាកែវ ឈុន ឆេង បានស្នាក់នៅជាមួយបងប្អូនជីដូនមួយនៅម្តុំផ្សារអូរឫស្សី ព្រមទាំងទទួលការទំនុកបម្រុងពីបងប្រុសបង្កើត។ ឆេង មិនគិតអ្វីក្រៅពីប្រឹងរៀនសូត្រនោះទេ ទើបលទ្ធផលសិក្សាចាប់តាំងពីដើមឆ្នាំទី២ មក ទទួលបាននិទ្ទេសល្អ។ "នៅឆ្នាំទី១ ខ្ញុំមានការលំបាកច្រើន ដោយសារភាសាអង់គ្លេស និងកុំព្យូទ័រមានកម្រិត។ នៅដំណាក់កាលនេះនិស្សិតផេ្សងដើរធម្មតា ប៉ុន្តែខ្ញុំត្រូវរត់ទើបរៀនទាន់គេ។ ខ្ញុំចំណាយពេលប្រមាណ ៥ ម៉ោងក្នុងមួយថ្ងៃ ដើម្បីសិក្សាដោយខ្លួនឯងលើការអាន និងអនុវត្តកុំព្យូទ័រ ព្រមទាំងចូលថ្នាក់បំប៉នភាសានៅសាកលវិទ្យាល័យ។ ទីបំផុតនៅឆ្នាំទី២ ខ្ញុំអាចរៀនទាន់គេ ដោយមិនបាច់រៀនបំប៉នភាសា និងកុំព្យូទ័រដូចមុន”។

អតីតសិស្សពូកែទូទាំងខេត្តតាកែវរូបនេះបានរៀបរាប់ថា ខ្លួនបានបែងចែកពេលវេលាសិក្សា និងកំណត់ចំណុចអាទិភាពដែលត្រូវសិក្សា ការតាំងចិត្តខ្ពស់ដើម្បីធ្វើអ្វីមួយ បើទោះជាជួបនឹងឧបសគ្គច្រើនយ៉ាងណា ត្រូវយល់មេរៀនចាស់មុខនឹងចាប់យកមេរៀនថ្មី ប៉ុន្តែពេលខ្លះក៏ត្រូវចេះថ្លឹងថ្លែងទំនាក់ទំនងសង្គម និងការសិក្សាផងដែរ។ មិនមែនគិតតែការសិក្សា ភ្លេចគិតដល់ទំនាក់ទំនងសង្គមនោះមិនល្អទេ។ ត្រូវសិក្សាពីចំណូលចិត្តរបស់ខ្លួនឯង ចំណុចនេះចង់ផ្ដោតលើពេលវេលាសិក្សា អ្នកខ្លះរៀនចូលនៅពេលយប់ អ្នកខ្លះទៀតខួរក្បាលស្រឡះនៅពេលព្រលឹម។

បើទោះជាមិនដឹងថាជំនាញធនាគារជាអ្វីពីដំបូង ប៉ុន្តែ ឈុន ឆេង មិនខកចិត្តទៅនឹងការរើសយកជំនាញធនាគារ និងហិរញ្ញវត្ថុនេះឡើយ ព្រោះបានការណែនាំពីបងប្រុស និងដឹងពីចំណូលចិត្តផ្ទាល់ខ្លួន។ក្រោយបញ្ចប់ថ្នាក់បរិញ្ញាបត្រ ឈុន ឆេង មានបំណងប្រលងយកអាហារូបករណ៍ថ្នាក់អនុបណ្ឌិតសិក្សានៅក្រៅប្រទេស និងក្លាយខ្លួនជាអ្នកដឹកនាំវ័យក្មេងមួយរូបដើម្បីចូលរួមចំណែកអភិវឌ្ឍន៍លើផ្នែកធនាគារ និងសវនកម្ម។

ឈុន ឆេង បានផ្ដាំទៅយុវជនទាំងអស់ថា មុនចាប់យកជំនាញណាយុវជនត្រូវសិក្សាស្វែងយល់ឱ្យបានច្បាស់ពីខ្លួនឯង ការតាំងចិត្ត និងអភិវឌ្ឍន៍ខ្លួនពីមួយថ្ងៃទៅមួយព្រោះ ពេលវេលាធ្វើសមាហរណកម្មអាស៊ានកាន់តែខិតជិតមកដល់ ការប្រកួតប្រជែងកាន់តែខ្លាំងក្លា។ យុវជនត្រូវចេះបែងចែកពេលវេលាឱ្យបានច្បាស់លាស់ និងផ្ដល់អាទិភាពការងារ ព្រមទាំងគោលដៅច្បាស់លាស់ ដោយចាប់ផ្ដើមពីមួយជំហានម្ដង ដើម្បីសម្រេចគោលដៅរបស់យើង៕