ធ្លាយរូបនាយ ក្រូច សម្ដែងចាប់សុដន់ តូតា ឯសាមីខ្លួនថា ភ័យបែកញើសជោគថ្ងាស

2015-05-11 18:36:18
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបភាពនាយក្រូចចាប់សុដន់ តូតា ប៉ុន្មានសន្លឹកដែលជាឈុតមួយក្នុងខ្សែភាពយន្តរបស់ Rock រឿង "បងទុំ អូនទាវ" បានធ្លាយចេញ។ នាយក្រូចប្រាប់ថា នាយភ័យបុកពោះ រហូតបែកញើសជោគថ្ងាស ពេលកំពុងសម្ដែងឈុតនេះ។

"និយាយមិនភ័យម៉េចបង កូនគេក្រមុំណា...ម្យ៉ាងស្អាតទៀត ដៃក៏ញ័រ ឯក្បាលបែកញើសជោគ ភ័យមែនទែនណាបង មិនមែនភ័យក្នុងរឿងទេ(សើច)!”។ នាយ ក្រូចថ្លែង។

តារាកំប្លែង ដែលអភិវឌ្ឍន៍ខ្លួនមកជាតារាចម្រៀង និងសម្ដែងរូបនេះ ប្រាប់ថា ដោយសារតែភ័យពេកដៃញ័រផង គ្រាន់តែថតឈុតនេះ នាយសម្ដែងខុសជាង១០ដងឯណោះ។ "តួស្រីគេមានអី គេដេកធ្វើតែមិនដឹង ភ័យតែខ្លួនឯងឯណេះ ញ័រដៃផង បែកញើសផងព្រោះតែភ័យពេក"។

តាមរូបភាពប៉ុន្មានសន្លឹកនោះ បានបង្ហាញឲ្យឃើញថា ដៃរបស់នាយ បានប៉ះដល់ដើមទ្រូងរបស់ តូតា តែម្ដង។ ប៉ុន្តែតាមនាយ ក្រូច បានឲ្យដឹងថា នាយប៉ះថើៗទេ។ "ប៉ះថើៗទេ តែមានអី តួស្រីគេភ្ញាក់ឡើង ត្រូវកំផ្លៀងដដែលហ្នឹង(សើច)!"។ ពាក់ព័ន្ធនឹងបញ្ហានេះ ភាគីខាងស្រី មិនអាចសុំទំនាក់ទំនងបានទេព្រឹកនេះ។

តាមលោក យឹម សុសត្យា ប្រធានគ្រប់គ្រងការផលិតរបស់ Rock បានរៀបរាប់ថា ឈុតខាងលើនេះ គឺឈុតដែលនាយ ក្រូច ត្រូវមើលថែ តូតា ដែលមានជំងឺ ហើយការដែលនាយក្រូចហ៊ានយកដៃទៅលូកចាប់សុដន់តូតាពេលកំពុងដេកលក់នោះ មិនមែនមកពីនាយមានបំណងមិនល្អទេ តែមកពីនាយបានធ្វើឲ្យខូចអាវទ្រនាប់របស់ តូតា ប៉ុណ្ណោះ។

“សាច់រឿងគឺអញ្ចេះទេ តូតា ឈឺ ហើយនាយក្រូចបោកខោអាវឲ្យ ពេលនោះនាយបានយកច្រាស់មកដោះអាវក្នុងតូតាធ្វើដាច់រហែក។ អីចឹងភ័យខ្លាចនាងខឹង ក៏ចង់ទៅទិញមកសងនាងវិញ តែមិនដឹងពីទំហំ អីចឹង នាយក៏ទៅវាស់ទំហំតាមវិធីហ្នឹងទៅ(សើច)!”។ លោក យឹម សុសត្យា អធិប្បាយ។

រូបភាព៖ បណ្ដាញសង្គម

អ្នកគ្រប់គ្រងរូបនេះ ប្រាប់ទៀតថា នេះជាឈុតកំប្លែងមួយ ប៉ុន្តែថាសាច់រឿងរបស់លោកនៅមានឈុតឆាកកំប្លែងសើចសប្បាយច្រើនជាងនេះទៅទៀត។

ក្រៅពីធ្លាយរូបភាពនៃការសម្ដែងនាយក្រូចចាប់សុដន់ តូតា រឿង “បងទុំ អូនទាវ" ក៏ធ្លាប់ល្បីដល់ថៃទៀតផង ក្រោយលេចរូបភាពប៉ុន្មានសន្លឹកលើបណ្ដាញសង្គមបង្ហាញពីព្រះសង្ឃឡើងចុងឬស្សី។ តាមរូបភាពនោះ លោក យឹម សុសត្យា ប្រាប់ថា ភាពយន្តរបស់លោកមិនទាន់ត្រូវបានក្រសួងអនុញ្ញាតសម្រាប់ដាក់បញ្ចាំងនៅឡើយ។

លោកបន្តថា បើអ្វីអាចដោះស្រាយបានទាន់ "បងទុំ អូនទាវ" គ្រោងដាក់បញ្ចាំងចុងខែនេះ៕

អត្ថបទ៖ ឈុតនេះ នាំឲ្យ “បងទុំ អូនទាវ ២០១៥” របស់ Rock ជួបភាពស្រពេចស្រពិល