៨ ចំណុចនៅលើមុខអាចទស្សន៍ទាយជោគជតាទ្រព្យសម្បត្តិរបស់មនុស្ស

2015-05-12 14:36:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ការរស់នៅប្រចាំថ្ងៃរបស់មនុស្សតែងផ្សារភ្ជាប់មកជាមួយជំនឿ អ្នកខ្លះជឿថា ធ្វើបែបនេះនាំសំណាងល្អ ធ្វើបែបនោះកាត់លាភជាដើម។ ទាំងនេះសុទ្ធសឹងជាអ្វីដែលមានក្នុងសង្គមខ្មែរ។ ងាកទៅកូនចៅខ្មែរសែស្រឡាយចិន មួយចំនួនជឿជាក់ថា ផ្ទៃមុខក៏អាចទស្សន៍ទាយពីជោគវាសនារបស់មនុស្សម្នាក់ៗថា នឹងមានទ្រព្យសម្បត្តិហូរហៀរនាអនាគតឬអត់ដែរ។ ឥលូវយើងមកមើលចំណុចទាំង ៨ នៅលើផ្ទៃមុខដែលក្បួនចិនជឿជាក់ថា នឹងជួយឲ្យមានទ្រព្យស្ដុកស្ដម្ភនៅអនាគត។

១ ផ្ទៃមុខស៊ីមេទ្រី

ចំណុចដំបូង ដែលជនជាតិចិនសម្គាល់ផ្ទៃមុខដែលនាំទ្រព្យសម្បត្តិគឺ ផ្ទៃមុខទាំងសងខាង។ បើផ្ទៃមុខទាំងសងខាងមានតុល្យភាព ឬស៊ីមេទ្រី មានន័យថា គ្រប់យ៉ាងក្នុងជីវិតនឹងដើររលូនសម្រាប់អ្នក។ ពិតណាស់ មនុស្សមួយចំនួនមិនមានផ្ទៃមុខស្មើគ្នា ១០០ ភាគរយទេ អាចល្អៀងគ្នាតិច ឬច្រើន ពេលមើលពីចំហៀងណាមួយទាំងនោះក៏បញ្ជាក់ពីភាពរលូនក្នុងជីវិតតិចច្រើនតាមហ្នឹងដែរ។

២ ថ្ងាសទូលាយ

អ្នកដែលមានថ្ងាសទូលាយ និងមូលក៏ជាសញ្ញាណល្អនាំទ្រព្យសម្បត្តិដែរ។ ថ្ងាសទូលាយនេះមានន័យថា អ្នកមានសំណាងដែលផ្ដល់មកពីឋានសួគ៌។ មនុស្សដែលមានថ្ងាសបែបនេះមិនត្រឹមតែជាសញ្ញានៃទ្រព្យសម្បត្តិទេ តែក៏ជាបង្ហាញពីអំណាចក្ដោបក្ដាប់តំណែងធំទៀតផង។ ជនជាតិចិនជឿថា ថ្ងាសទូលាយល្អ និងជួយលើករាសីរបស់អ្នកខ្ពស់ បើទោះជាផ្នែកផ្សេងទៀតនៃរាងកាយមិនសូវល្អក៏ដោយ។ អ្នកដែលមានប្រជ្រុយចំកណ្ដាលថ្ងាសជាសញ្ញាមិនល្អទេ និងគួរកាត់ចោលពិសេសប្រជ្រុយខ្មៅ តែបើប្រជ្រុយក្រហមមិនមានអ្វីជាបញ្ហានោះទេ។

៣ ច្រមុះធំ

ចំណុចទីបីដែលកំណត់ពីទ្រព្យសម្បត្តិនៅលើផ្ទៃមុខគឺច្រមុះធំ។ ច្រមុះត្រូវគេប្រដូចទៅនឹងជង្រុកទ្រព្យ។ សម្រាប់បុរសមិនសូវទុកចិត្តបាន ១០០ ភាគរយនោះទេ តែបើនារីច្រមុះធំអាចទុកចិត្តបានថាជា អវយវៈនាំទ្រព្យចូលផ្ទះ។ នារីដែលមានច្រមុះធំ មូល និងខ្ទង់ខ្ពស់នឹងនាំទ្រព្យដល់បុរសណាដែលរៀបការជាមួយនាង។ អ្នកអាចប្រើគ្រឿងសម្អាងដើម្បីធ្វើយ៉ាងណាឲ្យច្រមុះរលោងភ្លឺ តែត្រូវជៀសវាងការវះកាត់ ឬឲ្យមានចំណុចខ្មៅ និងប្រជ្រុយនៅលើនោះ ព្រោះគេជឿថា នឹងកាត់លាភ។

៤ ភ្នែកថ្លា

ភ្នែកភ្លឺថ្លាបង្ហាញពីភាពច្បាស់លាស់ និងស្វាហាប់។ មិនថា ភ្នែករបស់អ្នកពណ៌អ្វី រាងបែបណា ទំហំប៉ុណ្ណាទេ សំខាន់ឲ្យតែប្រស្រីភ្នែកខាងក្នុងភ្លឺថ្លាច្បាស់ក៏ជាសញ្ញាបង្ហាញពីទ្រព្យសម្បត្តិដែរ។ ភ្នែកថ្លាហ៊ុមព័ទ្ធដោយរោមភ្នែកបះងការពារជាសញ្ញាបញ្ជាក់ពីសុខភាព និងភាពចម្រុងចម្រើន។ រោមភ្នែកក៏សំខាន់ដែរ បើគ្មានរោមភ្នែកមានន័យថា អ្នកមិនអាចទទួលជោគជ័យលើការងារទាំងឡាយស្រួលទេ។ រោមភ្នែកជួយការពារអ្នកពីព្រលឹងតែលតោល ក៏ដូចជាមនុស្សច្រណែនឈ្នានីស។

៥ ឆ្អឹងថ្ពាល់ធំ

ឆ្អឹងថ្ពាល់ជាសញ្ញាបញ្ជាក់ទ្រព្យសម្បត្តិមួយទៀត។ ពេលដែលអ្នកឈានចូលដល់វ័យ ២១ ឆ្នាំ ហើយឆ្អឹងថ្ពាល់មើលទៅឃើញធំច្បាស់ជាសញ្ញាបញ្ជាក់ថា ទ្រព្យនឹងរត់ចូល។ តែអ្វីដែលសំខាន់មានឆ្អឹងថ្ពាល់ធំហើយនោះ វាត្រូវតែភ្លឺ រលោងថែមទៀតពិសេសគឺត្រូវមានសាច់ច្រើនដែរ បើឆ្អឹងថ្ពាល់ខាងលើស្គមមានតែឆ្អឹងអាចបញ្ជាក់ពីជីវិតដែលគ្មានថាមពល។ ចំណុចដែលបញ្ជាក់ថា ឆ្អឹងថ្ពាល់បញ្ជាក់ពីរាសីល្អបំផុតគឺពេលមានសាច់អាចច្បិចបាន និងមានពណ៌ស៊ីជម្ពូពោរពេញដោយពន្លឺ។

៦ ត្រចៀកធំវែង

នៅពេលត្រចៀកអ្នកធំវែងសមនឹងមុខ ជាសញ្ញាបញ្ជាក់ពីសំណាង និងបញ្ញា។ ចំពោះប្រជាជនចិនជឿថា ត្រចៀកជាវែងធំតំណាងឲ្យលំហូរនៃទឹកទន្លេលឿង។ ហើយត្រចៀកវែងសក្ដិសមនេះទៀតសោតក៏រំលឹកដល់ត្រចៀករបស់ព្រះពុទ្ធដែរ។ ត្រចៀកវែងស្អាតបញ្ជាក់ពីវណ្ណៈខ្ពង់ខ្ពស់។

៧ ចង្កាព្រែក

ចង្កាមាំ ឬចង្កាព្រែកប្រៀបដូចជាភ្នំទ្រព្យរបស់មនុស្សម្នាក់ៗ។ វាជាកន្លែងដែលចាត់ទុកជាឃ្លាំងទ្រព្យ។ មនុស្សដែលមានថ្គាមធំជាប្រភេទមនុស្សដែលអាចពង្រីកទ្រព្យសម្បត្តិដែលមានឲ្យកាន់តែធំទៅមុខទៀត។

៨ បបូរមាត់ដូចផ្កាឈូក

គេប្រៀបបបូរមាត់រាងដូចផ្កាឈូកទៅនឹងទន្លេ Huai។ បើទោះជាទន្លេនេះតូចតែជាប្រភពទឹកដ៏ចាំបាច់។ មាត់ក៏ដូច្នេះដែរ អ្នកដែលមានបបូរមាត់បែបនេះគួររក្សាឲ្យមានសំណើមជានិច្ច ព្រោះបើអស់សំណើមវាប្រៀបបាននឹងគ្រោះរាំងស្ងួត ឬបាត់បង់សំណាងដែរ។ ស្ត្រីគួរញ៉ាំទឹកច្រើនឲ្យមានសំណើមដើម្បីឲ្យទ្រព្យហូរចូល តែបើប្រើក្រែមពណ៌ក្រហមលាបឲ្យរលោងជាប់លើនោះក៏ល្អដែរ ព្រោះវាប្រៀបដូចទៅនឹងផ្កាឈូករីកនៅលើផ្ទៃទឹក។ និយាយដល់ប្រជ្រុយវិញ មិនថាមាននៅកន្លែងណាលើជុំវិញមាត់សុទ្ធតែល្អដរាបណាវា មិនមែនពណ៌ខ្មៅ។ ប្រជ្រុយក្រហមនៅលើមាត់បញ្ជាក់ថា មនុស្សនោះមិនខ្វះចំណីចំណុកហូបចុកឡើយ។

សាកឆ្លុះកញ្ចក់មើលមុខរបស់អ្នកបន្តិចមើល៍ថា មានលក្ខណៈដូចរៀបរាប់ក្នុង ៨ ចំណុចខាងលើឬអត់?

អាន៖ ងងុយគេងពេលធ្វើការត្រូវធ្វើយ៉ាងណា?

ប្រែសម្រួល៖ សីហា ប្រភព៖ wofs