ងងុយគេងពេលធ្វើការត្រូវធ្វើយ៉ាងណា?

2015-05-11 17:55:47
ចំនួនមតិ 0 | ចំនួនចែករំលែក 0

ចន្លោះមិនឃើញ

វិធីសាស្ត្រដែលល្អបំផុតនៅពេលងងុយគេងគឺទៅគេង ប៉ុន្តែពេលធ្វើការវិញប្រាកដធ្វើបែបនេះមិនបានទេ។ ធ្វើការមួយថ្ងៃពេញ សម្រាកថ្ងៃត្រង់តែមួយម៉ោងឬមួយម៉ោងកន្លះ ត្រូវប្រឈមនឹងការងងុយគេងពេលធ្វើការមិនខាន។ បើដូចនេះត្រូវធ្វើយ៉ាងណា? អស់បារម្ភ! ថ្ងៃនេះ Sabay សូមណែនាំនូវវិធីដែលមានប្រសិទ្ធភាពដែលប្រិយមិត្ត Sabay បានចូលរួមធ្វើការចែករំលែក។

តោះ!! អានទាំងអស់គ្នា៖

១. ញ៉ាំកាហ្វេឬទឹកក្ដៅ

វាពិតជាមានប្រសិទ្ធភាពណាស់ ព្រោះរវល់តែផ្លុំកាហ្វេ ឬទឹកក្ដៅ គ្មានពេលដើម្បីនឹករឿងងងុយគេងទេ។ នេះជាការអះអាងរបស់កញ្ញា អូន សុជីតា។ «ម្យ៉ាងទៀតកាលនៅរៀនលោកគ្រូធ្លាប់ប្រាប់ឱ្យញ៉ាំទឹកក្ដៅឧណ្ហៗ ព្រោះវាធ្វើឱ្យយើងបែកញើសស្វាងងងុយ! ពេលងងុយគេខ្ញុំចូលចិត្តញ៉ាំទឹកក្ដៅជាងកាហ្វេ ព្រោះញ៉ាំកាហ្វេញឹកពេកមិនល្អទេ! ផុតពីងងុយគេងអាចទៅជាឈឺក្បាល»។ សុជីតាបន្ថែម។

២. ដើរនិយាយជាមួយមិត្តរួមការងារ

«នៅស្ងាត់ៗ កាន់តែងងុយគេងថែម អញ្ចឹងមានតែដើរនិយាយជាមួយគេឯង សើចឱ្យឮៗ បែបនេះវាធ្វើឱ្យស្វាងបាន!» នេះជាការណែនាំរបស់កញ្ញា គី កណ្ណិកា។ កញ្ញាបានបន្ថែមទៀតថា ការធ្វើចលនាវាជួយយើងបានច្រើនដើម្បីកាត់បន្ថយការងងុយគេងក្នុងម៉ោងធ្វើការ ទោះយ៉ាងណាក៏វាប្រសើរជាងទ្រាំអង្គុយនៅតុធ្វើការទាំងងក់ដែរ បើប្រធានមកគេអាចថាយើងខ្ជិលក៏ថាបាន។

៣. ស្ដាប់ចម្រៀងញាក់កន្ត្រាក់អារម្មណ៍

បើខ្ជិលដើរទៅកន្លែងអ្នកផ្សេងដើម្បីនិយាយគ្នា យើងអាចធ្វើការបណ្ដើរស្ដាប់ចម្រៀងញាក់បណ្ដើរ។ លោក ហេង ដារ៉ា បានប្រាប់ថា «កុំស្ដាប់ឱ្យសោះចម្រៀងយឺតៗ កម្សត់ៗ រ៉ូមែនទិក! ស្ដាប់បទណាញាក់ៗសប្បាយៗ ងក់ក្បាលតាមភ្លេងតិចៗ ដូច្នេះវាមិនសូវងងុយគេង! ហើយល្បឿនការងារក៏ដំណើរការទៅមុខ»។

៤. លុបមុខឱ្យត្រជាក់ កញ្ញា ផា ករុណា បានឱ្យយោបល់ថា «ខ្ញុំចូលចិត្តលប់មុខជាមួយទឹកឱ្យត្រជាក់មុខ! ដូចមើលក្នុងរឿងចិនចឹងពេលគេធ្វើបាបអ្នកទោសដល់សន្លប់គេយកទឹកមកជះដើម្បីឱ្យដឹងខ្លួន! អញ្ចឹងពេលងងុយគេងដូចគ្នា ទៅលុបមុខឱ្យស្រស់ថ្លាស្រស់ស្រាយ! វិធីនេះខ្ញុំធ្វើបានផលរាល់ដង»។

៥. ទំពាស្ករកៅស៊ូ

លោក រតនា វិចិត្រ បានឱ្យដឹងថាការទំពាស្ករកៅស៊ូជាពិសេសរស់ជាតិហឹរវាជួយរំញោចឱ្យខួរក្បាលមានការផ្ដោតអារម្មណ៍លើការងារនិងមិនងងុយគេព្រោះមាត់រវល់ទំពារហូត គ្មានពេលទៅនឹកនារឿងគេងទេ។

ទាំងនេះគឺជាបទពិសោធន៍របស់ប្រិយមិត្ត Sabay ដែលជាបុគ្គលិកក្រុមហ៊ុនឯកជនផ្សេងៗ។ ចុះចំណែកអ្នកដែលមានតួនាទីគ្រប់គ្រងបុគ្គលិកវិញ?

កញ្ញា សេង សាន់ជីវ៉ា ជាប្រធានរដ្ឋបាលនៃក្រុមហ៊ុនឯកជនមួយបានឱ្យដឹងថា កន្លែងធ្វើការភាគច្រើនសម្រាកតែមួយម៉ោង ដូច្នេះឱ្យបុគ្គលិកសម្រាកបន្តិចបន្តួចដើម្បីយកកម្លាំងធ្វើការឱ្យមានប្រសិទ្ធភាព និងលទ្ធផលនោះជាការប្រសើរ។ កញ្ញា ជីវ៉ា បានបន្តថា «ងងុយគេងក្នុងម៉ោងធ្វើការមិនមែនមានន័យថាខ្ជិលទេ ខ្ញុំក៏ធ្លាប់ដែរ! ចឹងបើឃើញបុគ្គលិកងងុយគេងខ្ញុំតែងតែប្រាប់គាត់ថាធ្វើម៉េចឱ្យបាត់! ណាមួយការងងុយគេងមិនមែនកើតឡើងរាល់ថ្ងៃទេ»៕

អានអត្ថបទ៖ វេជ្ជបណ្ឌិតខ្មែរពន្យល់ពីបញ្ហាអង្កែធ្វើឱ្យប៉ះពាល់ដល់សក់ហួសស្មាន!

អត្ថបទ៖ គង់ ច័ន្ទវ៉ាន់ណេង