លោក អ៊ឹម បូរិន ៖ អាជីពគ្រូទាយវគ្គបណ្ដុះបណ្ដាលថ្មីកំពុងទទួលការចាប់អារម្មណ៍
- 2015-05-12 15:50:11
- ចំនួនមតិ 0 | ចំនួនចែករំលែក 0
លោក អ៊ឹម បូរិន ៖ អាជីពគ្រូទាយវគ្គបណ្ដុះបណ្ដាលថ្មីកំពុងទទួលការចាប់អារម្មណ៍
ចន្លោះមិនឃើញ
ក្នុងបំណងរក្សាវប្បធម៌បុរាណខ្មែរ និងដើម្បីចូលរួមអភិរក្សវប្បធម៌ខ្មែរ ឱ្យកាន់តែរីកចម្រើនវគ្គបណ្ដុះបណ្ដាលអាជីពគ្រូទាយបានបណ្ដុះបណ្ដាលជាបន្តបន្ទាប់ក្នុងប្រទេសកម្ពុជា។ វគ្គបណ្ដុះបណ្ដាលថ្មីនេះទទួលបានការចាប់អារម្មណ៍ច្រើនពីសិក្ខាកាម។ នេះលោក អ៊ឹម បូរិន អគ្គលេខាធិការគណៈកម្មាធិការរៀបចំបុណ្យជាតិនិងអន្តរជាតិ ជាអ្នករៀបចំបង្រៀនវគ្គអាជីពគ្រូទាយ។
លោក បូរិន បានបន្ថែមថា វគ្គបណ្ដុះបណ្ដាលនេះមាន បង្រៀនផ្នែកទស្សន៍ទាយតាមលេខអត្តៈ ផ្នែកទស្សន៍ទាយបាតដៃ ផ្នែកមើលទម្រង់មុខមនុស្ស ផ្នែករៀបចំហុងស៊ុយតាមផ្ទះ ផ្នែកប្រារព្ធពិធីមង្គលការផ្សេងៗ និងការបណ្ដុះបណ្ដាលផ្នែករៀបបាយសី តម្កើងគ្រូតាមផ្ទះ ឬកន្លែងធ្វើការ ជាដើម។ "យើងបានចងក្រងឯកសារខ្មែរយើងពីបរមបុរាណមក ព្រមទាំងឯកសារថៃមួយចំនួនដើម្បីបង្រៀន ដោយប្រើរយៈពេលជាង២សប្ដាហ៍។ វគ្គបណ្ដុះបណ្ដាលនេះឃើញមានការចាប់អារម្មណ៍ច្រើនជាក់ស្ដែងខ្ញុំមានកូនសិស្សជាព្រះ សង្ឃ និងសិស្សខ្លះអាយុខ្ទង់ ៣០ ជាងក៏មករៀនជំនាញនេះដែរ”។ លោក បូរិន និយាយ។
លោកបានបន្ថែមថា ជំនាញហោរាសាស្ត្រនេះមិនលំបាក ក្នុងការគៀងគរដើមទុនមកធ្វើវិនិយោគឡើយ សំខាន់ឱ្យតែមានជំនាញទាយច្បាស់លាស់ គឺអាចរៀបចំជីវិតរបស់ខ្លួនក្លាយជាគ្រូទាយអាជីព មានជីវភាពរស់នៅសមរម្យ ប្រកបដោយភាពថ្លៃថ្នូរក្នុងសង្គម។
កាលពីពេលថ្មីៗ កន្លងមកនេះលោកគ្រូ ឡុង បូរ៉ា ប្រធានសមាគមទំនៀមប្រពៃណីខ្មែរនិងសេវាសង្គម ក៏មានបើកវគ្គបណ្ដុះបណ្ដាលអាជីពគ្រូទាយនេះដែរ។
លោក បូរិន ដែលធ្លាប់បានបណ្ដុះបណ្ដាលសិស្សអាជីពទស្សន៍ទាយជាច្រើននាក់កន្លងមកបានរៀបរាប់ទៀតថា នេះគឺជាផ្ដល់ឱកាសឱ្យពលរដ្ឋខ្មែរ បានយល់ដឹងបន្ថែម និងចូលរួមទប់ស្កាត់ ការហូរចូលវប្បធម៌បរទេស ក៏ដូចរួមអភិរក្សវប្បធម៌ខ្មែរ ឱ្យកាន់តែរីកចម្រើនដូចពាក្យចាស់ពោលថាវប្បធម៌រលត់ ជាតិរលាយវប្បធម៌ពណ្ណរាយជាតិថ្កើងថ្កាន៕
អានអត្ថបទ៖ ជោគជតារាសីឆ្នាំទាំង១២ តាមមហាសង្រ្កាន្ត
អត្ថបទ៖មៃ សុខលីម