បណ្ណាល័យឯកាបំផុតលើលោក បើកដំណើរការលើកដំបូង

2015-05-15 20:38:25
ចំនួនមតិ 0 | ចំនួនចែករំលែក 0

ចន្លោះមិនឃើញ

បណ្ណាល័យមួយដែលសាងសង់ឡើងនៅមាត់សមុទ្រក្នុងស្រុក Beidaihe ខេត្ត Hebei ប្រទេសចិន ដែលត្រូវបានគេហៅថា បណ្ណាល័យឯកាបំផុតលើលោកនោះ បានបើកទ្វារដំណើរការជាលើកដំបូង ក្នុងថ្ងៃបុណ្យ China's Labor Holiday។

អាគារដែលលេចឡើងនៅលើវាលខ្សាច់ ដែលបានក្លាយជាប្រធានបទក្ដៅនៅលើបណ្ដាញសង្គម Online ក្រោយការបែកធ្លាយរូបថតមួយនេះ រចនាឡើងដោយវិស្វករម្នាក់ឈ្មោះ Dong Gong។ វិស្វកររូបនេះបានជ្រើសរើសយកទីតាំងបរិយាកាសដ៏ល្អបំផុតសម្រាប់អ្នកអាន ដែលគ្មានការរំខានពីបរិយាកាសខាងក្រៅទាល់តែសោះ។

ភ្ញៀវដែលបានចូលអាននៅបណ្ណាល័យនោះ នឹងទទួលបានអារម្មណ៍ស្រស់ស្រាយជាមួយនឹងបរិយាកាសខ្យល់សមុទ្ររំភើយ និងទស្សនាទឹករលកខ្មួលខ្មាញ់។ ជាពិសេសគឺអាចអង្គុយអានសៀវភៅជាមួយនឹងភាពស្ងប់ស្ងាត់ នៅមាត់បង្អួចមើលផ្ទៃសមុទ្រដ៏ស្រស់ស្អាត។

អ្នកអភិវឌ្ឍន៍បណ្ណាល័យនេះ បាននិយាយថា៖ "យើងមិនទាន់ប្រកាសបើកដំណើរជាសាធារណៈផ្លូវការនៅឡើយទេ ដូច្នេះយើងក៏មិនទាន់បង្ហាញពីព័ត៌មានលំអិតដល់សារព័ត៌មានដែរ ប៉ុន្តែយើងនឹងបង្ហាញឲ្យគ្រប់គ្នាបានដឹង នៅពេលវាបើកដំណើរការផ្លូវការពេញលេញនាពេលដ៏ខ្លីខាងមុខ"៕

សូមទស្សនារូបភាពខាងក្រោម៖