អ្នកម្ដាយអស្ចារ្យ ចិញ្ចឹមកូនភ្លោះកើតជំងឺធាត់ និងវិកលចរិត ម្នាក់ឯង២០ឆ្នាំ

2015-05-15 21:18:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីមេម៉ាយម្នាក់រស់នៅខេត្ត Shenyang ប្រទេសចិន បានធ្វើឲ្យអ្នកប្រើប្រាស់បណ្ដាញសង្គមកោតសរសើរយ៉ាងខ្លាំង បន្ទាប់ពីរឿងរ៉ាវរបស់អ្នកស្ត្រីបែកធ្លាយក្នុងថ្ងៃបុណ្យទិវាគុណម្ដាយកាលពីពេលថ្មីៗនេះ ដែលបង្ហាញពីភាពអស្ចារ្យមែនទែន ដោយអ្នកស្រីចិញ្ចឹមកូនភ្លោះកើតជំងឺធាត់ និងវិកលចរិត តែម្នាក់ឯង អស់រយៈពេល២០ឆ្នាំ។

អ្នកស្រី Ma Zhiqiu បានបង្កើតកូនប្រុសភ្លោះ កាលពីថ្ងៃទី២៣ ខែកុម្ភៈ ឆ្នាំ១៩៩៤ នៅពេលដែលអ្នកស្រីមានវ័យ២៦ឆ្នាំ។ ក្រោយមកអ្នកស្រី និងស្វាមីរស់នៅមិនចុះសម្រុងគ្នា ក៏សម្រេចលែងលះគ្នា។ តែសំណាងមិនល្អ កូនទាំង២នាក់របស់អ្នកស្រី ត្រូវបានក្រុមគ្រូពេទ្យពិនិត្យឃើញថា សុទ្ធតែកើតជំងឺធាត់ដូចគ្នា ហើយម្នាក់ប្រុសច្បងថែមទាំងមានអាការវិកលចរិតទៀត។

ចាប់តាំងពីពេលនោះមក អ្នកស្រី Ma កាន់តែមានបន្ទុកធ្ងន់ថែមទៀត ដោយសារតែមិនអាចទុកកូនចោលនៅផ្ទះបាន អ្នកស្រីក៏សម្រេចបោះបង់ការងារ ហើយមកធ្វើជាមេផ្ទះ ដើម្បីមានពេលមើលថែទាំកូន។ កូនច្បងរបស់អ្នកស្រី ឈ្មោះ Zhang Hangjun មានទម្ងន់ដល់ទៅ ២៥០គីឡូក្រាម មានជំងឺវិកលចរិតពីកំណើត និងមិនអាចសន្ទនាជាមួយមនុស្សម្នាបានឡើយ។

យ៉ាងណាក្ដី កូនប្រុសរបស់អ្នកស្រីម្នាក់ទៀត ឈ្មោះ Zhang Yuanjun មាននិស្ស័យជាមួយតន្ត្រីតាំងពីតូចរហូតសុំរៀន piano តែអ្នកស្រីគ្មានលុយទិញឧបករណ៍ឲ្យកូនទេ។ ឃើញដូចនេះ គ្រូរបស់ Yuanjun ក៏បរិច្ចាគ piano ១គ្រឿង។ ដោយសារភាពឧស្សាហ៍របស់ Yuanjun បានធ្វើឲ្យគេចេះលេងឧបករណ៍ជាច្រើន និងថែមទាំងចេះច្រៀងភាសាបរទេស អ៊ីតាលី និងរុស្សីថែមទៀត។ ជាពិសេស បច្ចុប្បន្ន Yuanjun ឈ្នះបានមេដាយជយលាភីជាច្រើន។

បុគ្គលិកសហគមន៍ ដែលបានចុះទៅមើលជីវភាពរស់នៅរបស់អ្នកស្រី Ma បាននិយាយថា៖ "អ្នកស្រី Ma គឺជាស្ត្រីដែលខ្លាំង និងជាម្ដាយដ៏អស្ចារ្យបំផុត។ គាត់បានចំណាយពេល២០ឆ្នាំ ប្រែក្លាយពីគ្រួសារបែកបាក់ មកជាគ្រួសារគួរឲ្យស្រលាញ់វិញ"៕

សូមទស្សនារូបភាពខាងក្រោម៖