បច្ចេកវិទ្យាទំនើប គ្រាន់តែស្កេនម្រាមដៃអាចដឹងថាញៀនថ្នាំ

2015-05-16 22:07:48
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកវិទ្យាសាស្ត្រ បានអភិវឌ្ឍឈានមួយកម្រិតទៀត ក្នុងការធ្វើតេស្តវិភាគរកសារធាតុញៀន ដោយគ្រាន់តែស្កេនម្រាមដៃប៉ុណ្ណោះ។ បច្ចេកវិទ្យានេះ បានបង្កើតឡើងដោយក្រុមអ្នកស្រាវជ្រាវនៅសាកលវិទ្យាល័យ Surrey ចក្រភពអង់គ្លេស។

បច្ចេកវិទ្យាដ៏ថ្មីសន្លាងនេះ នឹងអនុញ្ញាតឲ្យគេរកឃើញសារជាតិញៀនទាំងឡាយ បានងាយស្រួលជាងមុន។ មានវិធីសាស្ត្រវិភាគរកសារធាតុញៀនមួយចំនួន ដែលត្រូវបានគេអភិវឌ្ឍឡើងពីមុនមក ប៉ុន្តែវិធីថ្មីមួយនេះមានអ្នកសាទរច្រើន ដោយសារភាពត្រឹមត្រូវជាក់លាក់។ វេជ្ជបណ្ឌិត Melanie Bailey មកពីសាកលវិទ្យាល័យ Surrey និយាយថា "ដាក់ស្កេនម្រាមដៃ ចំណាយពេលត្រឹមប៉ុន្មានវិនាទីប៉ុណ្ណោះ... ប៉ុន្តែបើធ្វើតេស្តឈាមវិញ ត្រូវចំណាយពេលច្រើននាទី... ត្រូវចំណាយពេលបង្រៀនបុគ្គលិក ហើយវាមិនល្អទេសម្រាប់អ្នកជំងឺមួយចំនួន"។ វេជ្ជបណ្ឌិតរូបនេះ បានបន្តទៀតថា ប្រសិនបើមានស្នាមម្រាមដៃ វាមិនត្រឹមតែអាចធ្វើតេស្តសារធាតុញៀនប៉ុណ្ណោះទេ ប៉ុន្តែវាថែមទាំងជួយកំណត់អត្តសញ្ញាណទៀតផង។

ការស្រាវជ្រាវនេះ បានបោះពុម្ពផ្សាយនៅលើទស្សនាវដ្ដីវិភាគ Analyst Magazine ដោយពន្យល់ត្រួសៗពីដំណើរការនៃការធ្វើតេស្ត។ នាពេលអនាគត បច្ចេកវិទ្យាមួយនេះ នឹងត្រូវអភិវឌ្ឍន៍ជាឧបករណ៍ធ្វើតេស្តសារធាតុញៀនចល័ត ដើម្បីប្រើប្រាស់នៅក្នុងតុលាការ ពន្ធនាគារ មន្ទីរពេទ្យ និងស្ថានីយប៉ូលិសជាដើម៕