បែកធ្លាយ Luhan របស់ក្រុម EXO ប្ដឹងសុំដើរចេញពីផលិតកម្ម SM

2014-10-10 17:30:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈដែលរឿងរ៉ាវរបស់ Jessica មិនទាន់ស្ងប់ស្ងាត់ផង ឥលូវនេះក៏មានព័ត៌មានថា តារាចម្រៀងសញ្ជាតិចិន Luhan ជាសមាជិកក្រុម EXO បានក្លាយជាតារាម្នាក់ទៀតដែលដាក់ពាក្យបណ្ដឹងសុំបញ្ចប់កុងត្រាជាមួយផលិតកម្ម SM Entertainment។

យោងតាមសារព័ត៌មានកូរ៉េនានាដែលចុះផ្សាយនៅព្រឹកនេះ បានឲ្យដឹងថា Luhan បានដាក់ពាក្យបណ្ដឹងរបស់ខ្លួនទៅតុលាការទីក្រុងសេអ៊ូល នៅព្រឹកថ្ងៃទី១០ ខែតុលា នេះ ហើយក្នុងនោះសារព័ត៌មាន TV Daily ក៏បានបង្ហាញនូវរូបភាពនៃឯកសារពាក្យបណ្ដឹងដែលមានឈ្មោះ Lu Han ដែរ។ ក្នុងពាក្យបណ្ដឹងនេះ Luhan បានទាមទារឲ្យមានការលុបចោលកិច្ចសន្យាជាមួយផលិតកម្ម ក៏ដូចជាពាក្យបណ្ដឹងរបស់អតីតសមាជិក Kris របស់ក្រុម EXO ដែរ។

របាយការណ៍ក៏បានឲ្យដឹងដែរថា មេធាវីដែលទទួលខុសត្រូវក្នុងរឿងក្ដីរបស់ Luhan គឺជាមេធាវីតែមួយដែលបានការពារក្ដីរបស់ Kris។

ព័ត៌មាននេះបានលេចឡើង ក្រោយពីការសង្ស័យជាច្រើនរបស់អ្នកគាំទ្រជុំវិញ អវត្តមានរបស់ Luhan នៅក្នុងការប្រគំតន្ត្រីទេសចរណ៍របស់ SMTOWN មួយរយៈចុងក្រោយនេះ ដែលផលិតកម្ម SM ធ្លាប់អះអាងថា Luhan មិនបានចូលរួមសម្ដែងដោយសារបញ្ហាសុខភាព។ យ៉ាងណាគេមិនទាន់ដឹងពីមូលហេតុច្បាស់លាស់ដែល នាំឲ្យតារាវ័យ ២៤ឆ្នាំរូបនេះសម្រេចចិត្តដើរចេញបែបនេះទេ។

នៅឆ្នាំ២០១៤នេះ ផលិតកម្ម SM Entertainment ហាក់មានជម្លោះច្រើនជាមួយតារាចម្រៀងរបស់ខ្លួន ដែលដំបូង Kris របស់ក្រុម EXO បានប្ដឹងសុំដើរចេញពីផលិតកម្មកាលពី៤ខែមុន បន្ទាប់មកបញ្ហាផ្អាកសកម្មភាព Sulli របស់ក្រុម f(x) បន្ទាប់ពីធ្លាយរឿងនាងមានទំនាក់ទំនងស្នេហាជាមួយតារាចម្រៀង Choiza របស់ក្រុម Dynamic Duo ហើយនៅថ្មីៗនេះគឺពាក់ព័ន្ធនឹងការដក Jessica ចេញពីក្រុម Girls' Generation ៕

អានអត្ថបទ៖ Jessica បង្ហាញសារឈឺចាប់ ក្រោយត្រូវបណ្ដេញចេញពីក្រុម Girls’ Generation ជាផ្លូវការ