ទីបំផុត “បងទុំ អូនទាវ" សម្ពោធដាក់បញ្ចាំងក្រោយមានរឿងរសើប

2015-05-19 21:53:33
ចំនួនមតិ 0 | ចំនួនចែករំលែក 0

ចន្លោះមិនឃើញ

បើទោះជាជួបព្យុះព័ត៌មានមួយចំនួនជុំវិញឈុតព្រះសង្ឃរងវិជ្ជាសិល្ប៍ខ្មោចស្រីខ្ទាតទៅទើរលើចុងឬស្សី និងបញ្ហាចំណងជើងស្រដៀងនឹងរឿងបុរាណ "ទុំទាវ" ប៉ុន្តែភាពយន្តរឿង "បងទុំ អូនទាវ" របស់ផលិតកម្ម Rock បានបើកសម្ពោធផ្លូវការយប់មិញនៅ Platinum Cineplex។

ទន្ទឹមនឹងការដាក់បញ្ចាំងនេះ យឹម សុសត្យា ប្រធានគ្រប់គ្រងការផលិតរបស់ Rock នៅតែអះអាងថា ភាពយន្តមួយនេះរបស់លោក មិនបានធ្វើឲ្យប៉ះពាល់ដល់រឿងដើម "ទុំទាវ" ទេ។ លោក ថា ត្បិតតែចំណងជើងមានពាក្យ " ទុំ និងទាវ" ប៉ុន្តែសាច់រឿងខុសគ្នាឆ្ងាយ ពោលគឺរឿងរបស់លោកជារឿងសម័យ កំប្លុកកំប្លែងសើចសប្បាយ មានឈុតឆាកខ្មោចលងភ័យរន្ធត់ថែមទៀត។

ក្រៅពីនេះ គ្រាន់តែបង្កប់ក្ដីស្នេហាស្មោះស្ម័គ្ររបស់តួឯកស្រី និងតួឯកប្រុសប៉ុណ្ណោះ ដែលពួកគេតស៊ូស្រឡាញ់គ្នាតាំងពីនៅជាមនុស្ស លុះដល់តួស្រីស្លាប់ទៅជាខ្មោចទៅហើយ ក៏នៅតែស្រឡាញ់គ្នាទៀត ដែលនេះ គឺស្នេហាដ៏ស្មោះស្ម័គ្រមួយ។

https://www.youtube.com/watch?v=sCay81MqGgI

ប្រធានគ្រប់គ្រងរូបនេះ បញ្ជាក់ថា លោកពិតជាបារម្ភណាស់ ចំពោះផលប៉ះពាល់ណាមួយដល់រឿង "ទុំទាវ" ព្រោះនេះជារឿងដ៏ល្បីក្នុងផ្នត់គំនិតប្រជាពលរដ្ឋខ្មែរគ្រប់ស្រទាប់។ លោកបន្តថា ដោយសារតែបែបនេះ ទើបលោកបានធ្វើស្រាវជ្រាវជាច្រើនមុនចាប់ផ្ដើមផលិត ដើម្បីចៀសវាងបញ្ហានានា។ដូច្នេះហើយ លោកហ៊ានអះអាងថា "បងទុំ អូនទាវ" មិនប៉ះពាល់ដល់រឿង "ទុំទាវ" ឡើយ។

សិល្បករ សិល្បការិនី រួមទាំងអ្នកគាំទ្រជាច្រើន បានចូលរួមក្នុងកម្មវិធីសម្ពោធ និងដាក់បញ្ចាំងរឿង "បងទុំ អូនទាវ" នាយប់មិញនេះ ក្នុងនោះ ប្រិយមិត្តខ្លះ ថ្លែងថា ពួកគេពេញចិត្តចំពោះរឿងមួយនេះ។

ស្រីកា វ័យ ២០ ឆ្នាំ ថ្លែងថា "បើសួរថា ពេញចិត្តត្រង់ណា ខ្ញុំដូចរកនិយាយមិនឃើញទេបង ប៉ុន្តែអាចនិយាយបានថា ល្អមើល មានសើច មានភ័យខ្លាចអីចឹងទៅ និយាយទៅទទួលយកបានហ្មង...!!”។

“ចំពោះខ្ញុំ ក៏ដូចជាមិនអីដែរបង ការសម្ដែងក៏មិនសូវឆ្គង សំខាន់មានឈុតឆាកកំប្លែងស្ងួត ធ្វើឲ្យផ្ទុះសំណើចច្រើន បងបានមើលដែរ ដឹងហើយ(សើច) ដោយឡែករឿងព័ត៌មានថា ប៉ះពាល់រឿង “ទុំទាវ” អីនោះ ចំពោះខ្ញុំផ្ទាល់គិតថា ដូចជាមិនអីទេ...!”។ សម សក្កដា និស្សិតពេទ្យ ថ្លែង។

ក្រោយបើកសម្ពោធផ្លូវការយប់មិញ "បងទុំ អូនទាវ" នឹងដំណើរការបញ្ចាំងផ្លូវការ ចាប់ពីថ្ងៃទី ២១ ឧសភាតទៅ។ ប្រិយមិត្តអាចទស្សនាបាននៅតាមរោងភាពយន្តដូចជា Platinum Cineplex, "Major Cineplex by Cellcard" និង Legend Cinema ទាំង៣សាខា (City Mall, Tk Avenue, Steung Meanchey Market)។ ពិធីសម្ពោធយប់មិញនេះ ក្រោមកិច្ចសហការ ពីរោងភាពយន្ត Platinum Cineplex ភេសជ្ជៈ Spy Wine Cooler និងក្រុមហ៊ុនថតរូបសាស្រ្តា ៕