ជម្រើសជាតិ ២១៩ នាក់ទទួលបណ្តុះបណ្តាលសីលធម៌ មុនទៅស៊ីហ្គេម
- 2015-05-21 15:15:07
- ចំនួនមតិ 0 | ចំនួនចែករំលែក 0
ជម្រើសជាតិ ២១៩ នាក់ទទួលបណ្តុះបណ្តាលសីលធម៌ មុនទៅស៊ីហ្គេម
ចន្លោះមិនឃើញ
វគ្គបំប៉នស្ដីពីវិន័យ និងក្រមសីលធម៌ដល់ក្រុមជម្រើសជាតិកម្ពុជាដែលត្រៀមទៅព្រឹត្តិការណ៍កីឡា ស៊ីហ្គេម លើកទី ២៨ នៅប្រទេសសិង្ហបុរី មានសិក្ខាកាមចំនួន ២១៩ នាក់ទទួលការបណ្ដុះបណ្ដាលរយៈពេល ៣ ថ្ងៃ គិតចាប់ពីថ្ងៃទី ២០ ដល់ថ្ងៃទី ២២ ខែ ឧសភាឆ្នាំ ២០១៥ នៅទីស្ដីការគណៈកម្មាធិការជាតិអូឡាំពិកកម្ពុជា។
ទិដ្ឋភាពថ្នាក់ដឹកនាំបើកវគ្គបំប៉នកាលម្សិលមិញ
តាមរបាយការណ៍របស់លោក ប៊ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានឲ្យដឹងថា វគ្គបំប៉ននេះមានការចូលរួមពីសិក្ខាកាមចំនួន ២១៩ នាក់មានគ្រូ ៤៤ នាក់ក្នុងចំណោមប្រភេទកីឡាចំនួន ២២ ប្រភេទ ។ ចំណែកគោលបំណងវិញគឺ ដើម្បីឲ្យគ្រូបង្វឹក គ្រូជំនួយ និងកីឡាករ កីឡាការិនី បានយល់ដឹងអំពី បេសកកម្ម និង ស្គាល់តួនាទី ភារៈកិច្ចរបស់ខ្លួនប្រកាន់ខ្ជាប់នូវវិន័យ ក្រមសីលធម៌សេចក្ដីថ្លៃថ្នូរ ប្រកបដោយកិត្តិយស មោទនភាពជាតិ ក្នុងការចូលរួមប្រកួតកីឡា ស៊ីហ្គេម លើកទី ២៨ នៅប្រទេស សិង្ហបុរី ឲ្យទទួលបានជោគជ័យជួនជាតិមាតុភូមិ។
របាយការណ៍បានលើកឡើងទៀតថា ការប្រមូលកីឡាករ កីឡាការិនី និងគ្រូបង្វឹកនេះត្រូវបានជ្រើសរើសចេញតាមរយៈការប្រកួតជ្រើសរើសជើងឯកប្រចាំឆ្នាំ ដោយសហព័ន្ធកីឡាជាតិ ព្រមទាំងក្រសួងអប់រំ យុវជន និងកីឡាបានដាក់លក្ខខណ្ឌនៃការជ្រើសរើស និងបានបង្កើតគណៈកម្មការ ដែលមានសមាសភាពចូលរួមពីគណៈកម្មាធិការជាតិអូឡាំពិកកម្ពុជា និង តំណាងសហព័ន្ធកីឡាជាតិ។
លោក ប៉ុន សុខ បានលើកឡើងទៀតថា ចំពោះការហ្វឹកហ្វឺនមានទាំងក្នុងប្រទេសនិងក្រៅប្រទេស។ ចំណែកប្រភេទកីឡាដែលបានចេញទៅហ្វឹកហាត់នៅក្រៅប្រទេសមានចំនួន ៧ ប្រភេទកីឡារួមមាន កីឡា ឈិនឡូន បានចេញទៅហ្វឹកហាត់នៅប្រទេសមីយ៉ាន់ម៉ា ចំនួន ១០នាក់ ។ កីឡាសីប៉ាក់តាក្រ ទៅហ្វឹកហាត់នៅប្រទេសថៃ ចំនួន ១១នាក់។ កីឡាទ្រីយ៉ាត្លុង ទៅហាត់នៅ ប្រទេសថៃ ចំនួន ៦ នាក់។ ចំណែកកីឡា វាយកូនបាល់ចេញទៅ ហ្វឹកហាត់នៅសហរដ្ឋអាមេរិកចំនួន ១ នាក់, កីឡាតេក្វាន់ដូ ទៅហ្វឹកហាត់នៅសាធារណរដ្ឋកូរ៉េចំនួន ៦ នាក់ ,កីឡាកាយសម្ព័ន្ធ ទៅហ្វឹកហាត់នៅ ទីក្រុងតូក្យូប្រទេសជប៉ុន ចំនួន ២នាក់ និងប្រភេទកីឡា ប្រណាំងកង់ ទៅហ្វឹកហាត់ទៅហ្វឹកហាត់នៅ សាធារណរដ្ឋកូរ៉េចំនួន ២ នាក់ ។
លោកបានបន្ថែមថា ក្នុងចំណោមប្រភេទកីឡាទាំង ២២ ប្រភេទរបស់កម្ពុជា មានតែប្រភេទកីឡាចំនួន ៥ ប៉ុណ្ណោះដែលមានសក្ដានុពលគឺ តេក្វាន់ដូ , ប៉េតង់ , សីបាក់តាក្រ(ឈិនឡូន ) , ប្រណាំងទូកប្រពៃណី(កានូ ) និង វ៉ូស៊ូ ។
ជាមួយគ្នានោះដែរលោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡាជាតិក៏បានលើកយកសម្ដីរបស់សម្ដេច ហ៊ុន សែន មកនិយាយផងដែរថា ៖«ទោះប្រកួតចាញ់ឬ ឈ្នះមិនត្រូវសំដែងអាកប្បកិរិយាមិនសមរម្យឲ្យប្រទេសដទៃមើលងាយលើ ប្រទេសកម្ពុជាឡើយ និងត្រូវប្រកាន់ខ្ជាប់នូវ ភាពថ្លៃថ្នូរក្នុងនាមជាកីឡាករ» ។
ក្នុងវគ្គបំប៉ននេះមានការចូលរួមបង្រៀនដោយ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡាជាតិ លោក កែវ សារ៉េត អនុប្រធានមជ្ឈមណ្ឌលជាតិហ្វឹកហ្វឺនកីឡា និងលោក ស្ដើង ជា គ្រូពេទ្យប្រចាំទីស្ដីការគណៈកម្មាធិការជាតអូឡាំពិកកម្ពុជា៕
អត្ថបទ៖ ស្រី សុវណ្ណដារ៉ា