ម៉ូដែលចិនណាហ៊ានបង្ហាញចង្អូរទ្រូងលើស២ស.ម នឹងរងពិន័យជាង៨០០ដុល្លារ

2015-05-21 16:11:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយអ្នករៀបចំកម្មវិធីតាំងពិព័រណ៍រថយន្តនៃ Shanghai Auto Show លុបបំបាត់ការស្លៀកពាក់សិចស៊ី របស់តារាបង្ហាញម៉ូដបានជោគជ័យមក ពេលនេះមានព័ត៌មានល្ហៀងៗថា អ្នករៀបចំកម្មវិធីពិព័រណ៍ ChinaJoy គ្រោងនឹងធ្វើតាមដែរ ហើយនឹងផាកពិន័យ៨០៥ដុល្លារ បើសិនជាតារាម៉ូដែលរូបណា ហ៊ានស្លៀកពាក់បង្ហាញចង្អូរទ្រូង លើសពី២សង់ទីម៉ែត្រ។

មជ្ឈមណ្ឌលតាំងពិព័រណ៍ផ្នែកកម្សាន្តឌីជីថល និងហ្គេមធំមួយនៅអាស៊ីនេះ បានបើកទ្វារក្នុងឆ្នាំ២០០៣ ហើយមជ្ឈមណ្ឌលនឹងបើកការបង្ហាញផលិតផលប្រចាំឆ្នាំរបស់ខ្លួន នៅប៉ុន្មានខែខាងមុខ។

អ្វីដែលមជ្ឈមណ្ឌលខាងលើធ្វើឡើង គឺមិនចង់ឱ្យអតិថិជនចាប់អារម្មណ៍លើតារាខ្លាំងពេក និងចង់រក្សាភាពថ្លៃថ្នូរ។ រូបភាពមួយសន្លឹក បង្ហាញពីរបាយការណ៍មួយ ចេញដោយអ្នករៀបចំរបស់ ChinaJoy បញ្ជាក់ថា បើបុគ្គលិករូបណា ហ៊ានស្លៀកសំលៀកបំពាក់មិនសមរម្យ នឹងត្រូវពិន័យជាទឹកប្រាក់។ ចំណែកតារាបង្ហាញម៉ូដ បើហ៊ានស្លៀកបង្ហាញចង្អូរទ្រូងលើសពី២សង់ទីម៉ែត្រ នឹងត្រូវពិន័យ៨០៥ដុល្លារក្នុងម្នាក់ ខណៈតារាម៉ូដែលបុរសក៏ត្រូវពិន័យដូចគ្នា។

ចំពោះខោវិញក៏ដូច្នេះដែរ បើម៉ូដែលណាសំយេះខោលើសពី២សង់ទីម៉ែត្រក្រោមចង្កេះ ក៏ត្រូវផាកពិន័យ ៥០៨ដុល្លារផ្សេងទៀត ហើយបើគេចាប់បានថា ពួកគេធ្វើអ្វីមិនសមរម្យ និងមិនធ្វើតាមតួនាទី នឹងត្រូវពិន័យជាទឹកប្រាក់ជាង១៦០០ដុល្លារ។

ទោះជាយ៉ាងនេះក្ដី ChinaJoy មិនទាន់ចេញមុខបកស្រាយលំអិត ចំពោះឯកសារដែលបែកធ្លាយ និងមិនទាន់ចេញមុខអះអាងថា ខ្លួនពិតជាអនុវត្តច្បាប់នេះនៅឡើយ ឬយ៉ាងណានោះទេ៕