តៃកុងបង្ហាញបទពិសោធន៍បើក Rolls-Royce ធ្វើដំណើរជាមួយចៅហ្វាយនាយជាសេដ្ឋី

2015-05-22 16:24:20
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពេលបរចេញដំណើរម្តងៗ អ្នកធ្វើដំណើរនិងមហាជនបានចោលក្រសែភ្នែកចាប់អារម្មណ៍ទៅរថយន្តដ៏ប្រណិត ដែលគេដឹងថាជារថយន្តរបស់សេដ្ឋីៗ។ Rolls-Royce មានមនុស្សតិចណាស់ដែលមានភ័ព្វវាសនាបានជិះរថយន្តដ៏សែនប្រណិតនេះ ដោយសារតែរថយន្តនេះផលិតឡើងតម្រូវក្រុមអ្នកមានៗមួយចំនួនតូច និងអ្នកដែលមានវណ្ណៈខ្ពង់ខ្ពស់តែប៉ុណ្ណោះ។

លោក វ៉ន ស មានឱកាសបើកបររថយន្តដ៏សែនថ្លៃនេះ ក្នុងតួនាទីជាតៃកុងបើកបរជូនចៅហ្វាយនាយជាអ្នកមានមុខមាត់ ធ្វើដំណើរទៅទីឆ្ងាយជិត។

លោកវ៉ន ស បានឲ្យដឹងថា លោកមានបទពិសោធន៍បើកបររថយន្តម្ភៃសាបសិបឆ្នាំហើយ និងធ្លាប់បើកបររថយន្តជាច្រើនប្រភេទមានទាំងស៊េរីទាបស៊េរីខ្ពស់។ ប៉ុន្តែសម្រាប់ Rolls-Royce នេះ លោកទើបតែបើកបានតែពីរទៅ៣ឆ្នាំនេះប៉ុណ្ណោះ។

លោកថា ដូចដឹងស្រាប់ហើយ Rolls-Royce មិនមែនសម្រាប់តែមនុស្សធម្មតាទេដែលមានឱកាសបានជិះធ្វើដំណើរជាមួយរថយន្តដ៏ប្រណិតផុតលេខនេះ ទាល់តែអ្នកនោះជាឧត្តមជនឬអ្នកមានកប់។

លោកថា ដោយសារតែចៅហ្វាយនាយរបស់ខ្លួនជាអ្នកមានមុខមាត់ ដូច្នេះការបើកបររបស់លោកត្រូវមានការប្រយ័ត្នប្រយែងបំផុត។

“ពេលឃើញពលរដ្ឋបើកម៉ូតូ ឬរ៉ឺម៉កតាមផ្លូវ ខ្ញុំប្រយ័ត្នណាស់ខ្លាចមានការប៉ះពារអី ពីព្រោះដឹងស្រាប់ហើយតម្លៃរថយន្តនេះមិនថោកទេ បើមានបញ្ហាអីច្បាស់ជាវីវរហើយមិនដឹងពួកគាត់មានលុយឯណារកមកសងនោះទេ"។

លោក វ៉ន ស បន្តថា៖ "ពេលខ្លះខ្ញុំបែរជាខ្លាចពួកគាត់ទៅវិញ មិនមែនពួកគាត់ខ្លាចខ្ញុំនោះទេ"។

បុរសដែលមានស្រុកកំណើតមកពីខេត្តស្វាយរៀងនេះបន្តថា កន្លងទៅលោកមិនដែលយកឥទ្ធិពលនៃរថយន្តនេះយកទៅប្រើប្រាស់ខុសតួនាទី ឬបើកបរក្នុងអាកប្បកិរិយាក្រអឺតក្រទមនោះទេ។ លោកតែងតែមានការអធ្យាស្រ័យ និងគោរពសិទ្ធិអ្នកបញ្ជាយានជំនិះដទៃទៀតដែលបើកបរនៅលើដងផ្លូវ។

លោកបញ្ជាក់បន្ថែមថា សម្រាប់តៃកុងដែលបើកបរ Rolls-Royce នេះ ត្រូវគោរពក្រមសីលធម៌ដែលជាស្តង់ដារពីក្រុមហ៊ុន Rolls-Royce ដូចជាការស្លៀកពាក់ និងអាកប្បកិរិយាបើកបរជាដើម។

នៅពេលសាកសួរពីចំណាប់អារម្មណ៍នៅពេលមានឱកាសបានបើកបររថយន្តដ៏ប្រណិតនេះ លោកថា ដំបូងលោកមានអារម្មណ៍រំភើបដោយសារភាពប្រណិត និងការឲ្យតម្លៃពីមនុស្សទាំងពួង។ ប៉ុន្តែយូរៗទៅអារម្មណ៍ទាំងនោះក៏រសាយ ប៉ុន្តែក៏នៅតែមានមោទនដែលមានឱកាសបានស្គាល់ និងធ្វើដំណើរជាមួយរថយន្តដែលត្រឹមតែជាក្តីស្រមៃរបស់មនុស្សទាំងឡាយនេះ។