មហាសេដ្ឋីចិន ១ម៉ោងខាត១៥ពាន់លានដុល្លារ

2015-05-22 17:03:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ជំនួញមួយផ្លេកបន្ទោរអាចធ្វើឲ្យមនុស្សមួយចំនួនក្លាយជាមហាសេដ្ឋី ប៉ុន្តែពេលខ្លះអាចដាំក្បាលចុះរហូតទាល់ច្រកសម្លាប់ខ្លួនក៏មាន។ ជាក់ស្ដែង មហាសេដ្ឋីចិនម្នាក់ដែលជាប្រធានក្រុមហ៊ុនសូឡាទាញថាមពលពន្លឺព្រះអាទិត្យ បានខាតអស់ ១៥ពាន់លានដុល្លារកាលពីថ្ងៃពុធ បន្ទាប់ពីភាគហ៊ុនធ្លាក់ចុះ ៤៧ភាគរយក្នុងការជួញដូរនៅហុងកុង ត្រឹមពេលមួយម៉ោងប៉ុណ្ណោះ។

មហាសេដ្ឋី Li Hejun

ការជួញដូរភាគហ៊ុនរបស់ក្រុមហ៊ុន Hanergy បានជាប់គាំងកាលពីថ្ងៃពុធ ហើយមិនទាន់មានការបញ្ជាក់បន្ថែមនៅឡើយទេរហូតដល់ពេលនេះ ខណៈការជួញដូរភាគហ៊ុននៅតែផ្អាកបណ្ដោះអាសន្ន។

ក្រុមហ៊ុនថាមពលនេះ បានធ្លាក់ចុះតម្លៃទីផ្សារ ១៨,៦ពាន់លានដុល្លារ។ ចំណែកមហាសេដ្ឋី Li Hejun ដែលកាន់កាប់ភាគហ៊ុន ៨០ភាគរយ បានខាតបង់អស់ប្រមាណជិត ១៥ពាន់ដុល្លារតែម្នាក់ឯង។

ប្រធានក្រុមហ៊ុនរូបនេះ មិនបានបង្ហាញវត្តមានឡើយនៅក្នុងកិច្ចប្រជុំម្ចាស់ភាគហ៊ុនប្រចាំឆ្នាំកាលពីថ្ងៃពុធ ជាពេលដែលភាគហ៊ុនចាប់ផ្ដើមដាំក្បាលចុះ។ អ្នកនាំពាក្យរបស់ក្រុមហ៊ុនបានបញ្ជាក់ថា លោក Li ទៅចូលរួមពិធីបើកសម្ពោធការតាំងពិព័រណ៍ថាមពលស្អាតរបស់ក្រុមហ៊ុន Hanergy នៅរដ្ឋធានីប៉េកាំងជំនួសវិញ។

ភាពខ្វះចន្លោះនៃសេចក្ដីថ្លែងការណ៍របស់ក្រុមហ៊ុន បានបង្កើនការយល់ច្រឡំជុំវិញការធ្លាក់ចុះនៃតម្លៃភាគហ៊ុននេះ។ Bespoke Investment ដែលជាក្រុមហ៊ុនស្រាវជ្រាវ និងគ្រប់គ្រងធនធាន មានមូលដ្ឋាននៅញូវយក បានចាត់ទុកបញ្ហារបស់ក្រុមហ៊ុន Hanergy ថាមានភាពរញ៉េរញ៉ៃបំផុត។ រហូតមកដល់ពេលនេះ ពុំមានការបញ្ជាក់ពីមូលហេតុធ្លាក់ចុះយ៉ាងគំហុកនៃតម្លៃភាគហ៊ុននេះទេ។

មុនពេលវិបត្តិនេះកើតឡើង ភាគហ៊ុនក្រុមហ៊ុន Hanergy បានស្ទុះឡើងខ្លាំងបំផុតគួរឲ្យកត់សម្គាល់។ កាលពីឆ្នាំ ២០១៤កន្លងទៅ ភាគហ៊ុនក្រុមហ៊ុនថាមពលនេះបានហក់ឡើងដល់ ៦២៥ភាគរយ។ នៅក្នុងខែមេសា តម្លៃទីផ្សារក្រុមហ៊ុនបានកើនឡើងដល់ ៤៥ពាន់លានដុល្លារ ធ្វើឲ្យលោក Liវ៉ាដាច់ ម្ចាស់ក្រុមហ៊ុនទំនិញអនឡាញ Jack Ma ក្លាយជាអ្នកមានជាងគេនៅប្រទេសចិន៕

ចុចអាន៖ មហាសេដ្ឋីចិនកក់សណ្ឋាគារ ១៤០នៅប៉ារីសឲ្យបុគ្គលិកដើរលេងចំណាយអស់រាប់លានដុល្លារ

ប្រែសម្រួល៖ គង់ វិសាល ប្រភព៖ CNN