កន្លែងណាខ្លះពិសេសបំផុតសម្រាប់យុវវ័យក្នុងការអានសៀវភៅ?

2015-05-26 16:04:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាទូទៅក្រៅពីរៀននៅសាលា សិស្សនិស្សិតក៏ដូចជាមិត្តយុវវ័យត្រូវការរៀន បន្ថែមដោយខ្លួនឯងទៀតដូចជាធ្វើការងារសាលាឬក៏អានសៀវភៅបន្ថែម។យុវវ័យទាំងអស់មានទម្លាប់ក្នុងការអានសៀវភៅផ្សេងៗគ្នា និងកន្លែងខុសគ្នាដើម្បីឱ្យឆាប់ចាប់បាន។ ចង់ដឹងថាមានកន្លែងណាខ្លះ តោះមកអានជាមួយSabay ទាំងអស់គ្នា។

១. ក្នុងបណ្ណាល័យ

កញ្ញា ហុង សារ៉ៃយ៉ា ជាបុគ្គលិកបម្រើការនៅក្រុមហ៊ុន ឯកជនមួយកន្លែងបានឱ្យប្រាប់ថា «ខ្ញុំចូលចិត្តកន្លែងស្ងាត់ ចឹងមានតែបណ្ណាល័យទេ! ហើយមិនតែប៉ុណ្ណោះបើខ្ញុំចង់អានសៀវភៅអីទៀតក៏ងាយស្រួលដែរ!»។ បណ្ណាល័យជាឃ្លាំងសៀវភៅដ៏ធំ ដូច្នេះហើយទើបអតីតនិស្សិតនៃវិទ្យាស្ថានជាតិពាណិជ្ជសាស្រ្តរូបនេះជ្រើសរើសបណ្ណាល័យជាកន្លែងសម្រាប់អានសៀវភៅ។

លោក លី វិចិត្រ ជានិស្សិតនៅសាកលវិទ្យាល័យមេគង្គកម្ពុជាបានឱ្យដឹងថា បណ្ណាល័យជាកន្លែងទូទៅដែលសិស្សនិស្សិតចូលចិត្តអានសៀវភៅ ព្រោះវាមានភាពស្ងប់ស្ងាត់ ប្រមូលផ្ដុំទៅដោយអ្នករៀន។ វិចិត្របានប្រាប់ទៀតថា «សូម្បីតែខ្ញុំក៏ចូលចិត្តអានសៀវភៅនៅបណ្ណាល័យដែរ! ព្រោះថាវាស្ងាត់ ហើយមានអ៊ិនធើណេតនិងកុំព្យូទ័រ! និយាយរួមទៅ គ្រាន់តែអង្គុយប៉ុកមានកម្លាំងចិត្តរៀន ឬធ្វើ Assignment ហ្មង ក្រឡេកទៅណា ក៏ឃើញគេរៀនដែរ!»។

(រូបតំណាង)

២. នៅក្នុងបន្ទប់គេង

«រៀនក្នុងបន្ទប់គេងវាស្ងាត់គ្មានអ្នករំខាន!» ជាការឆ្លើយតបយ៉ាងខ្លីពីកញ្ញា ម៉ប់ ម៉ូវសុខេង ជានិស្សិតផ្នែកឆ្មបនៃវិទ្យាស្ថានវិទ្យាសាស្ត្រសុខាភិបាលខេមរភូមិន្ទ។ សុខេងក៏បានប្រាប់ទៀតថា ក្រៅពីសាលារៀនមានតែក្នុងបន្ទប់ប៉ុណ្ណោះ ដែលស្ងាត់ ដែលអាចឱ្យយុវតីរូបនេះទិញសៀវភៅយកមកអានបានគ្រប់ពេលវេលា។

ស្រដៀងគ្នានេះដែរលោក ពុត សុខហួរជានិស្សិតពេទ្យឆ្នាំទីមួយនៃសាកលវិទ្យាល័យវិទ្យាសាស្ត្រសុខាភិបាលបានឱ្យដឹងថា ក្រៅពីអានសៀវភៅហើយខ្លួនអាចស្ដាប់ចម្រៀងបណ្ដើរទៀតផង ដែលធ្វើឱ្យការអានគ្មានសម្ពាធ និង គ្មានអ្នកណារំខានទោះចង់គេង ឬ អង្គុយអានក៏បាន។

មិនខុសគ្នាប៉ុន្មាន លោក ហាក់ ឆាយហុកជានិស្សិតឆ្នាំទីបួននៃសាកលវិទ្យាល័យជាតិគ្រប់គ្រងបានឱ្យដឹងថា រូបលោកចូលចិត្តអាននៅក្នុងបន្ទប់គេងដូចគ្នា ដោយហេតុផលគឺគ្មានអ្នកណារំខាន។ និស្សិតផ្នែកធនាគារនិងហិរញ្ញវត្ថុរូបនេះ ក៏បានឱ្យដឹងទៀតថា បើទៅអានសៀវភៅនៅខាងក្រៅ ត្រូវចំណាយពេលរៀបចំរបស់របរ រៀបចំខ្លួន រៀបចំលុយកាក់ ហើយនៅខាងក្រៅក្ដៅទៀតផង ដូច្នេះមានតែនៅក្នុងបន្ទប់គេងទេដែលជាកន្លែងអានសៀវភៅដ៏ល្អបំផុត។

៣. នៅតាមហាងតែគជ់

ទោះបីជាទីកន្លែងសាធារណៈ ក៏ហាងតែគជ់នៅតែជាកន្លែងដែលយុវវ័យមួយចំនួនចូលចិត្តអានសៀវភៅដែរ។ តួយ៉ាងកញ្ញា គុយ សុវណ្ណសិលា និស្សិតខ្មែរសិក្សាថ្នាក់បរិញ្ញាបត្រជាន់ខ្ពស់នៅឯព្រះរាជាណាចក្រថៃ បានឱ្យដឹងថា «តាំងពីនៅខ្មែររហូតមកដល់ដីថៃខ្ញុំចូលចិត្តអានសៀវភៅនិងធ្វើassignment នៅហាងកាហ្វេ! ព្រោះនៅទីនោះ មានម៉ាស៊ីនត្រជាក់! មាន Wi-Fi មានតែគជនិងអាហារសម្រន់ញ៉ាំ!»។ និស្សិតច្បាប់រូបនេះក៏បន្តថា វាក៏ងាយស្រួលក្នុងការជុំមិត្តភ័ក្ដិរៀនដែរព្រោះ បើនាំទៅផ្ទះនាំតែគេរុះរើបន្ទប់ ដូច្នេះហាងតែគជជាកន្លែងល្អបំផុត។

មិនខុសគ្នា នឹង លោកហាន់រ៉ាប៊ីន និស្សិតឆ្នាំទីមួយនៃសាកលវិទ្យាល័យបៀលប្រាយ បានបញ្ចេញមតិថា ហាងកាហ្វេឥឡូវក្លាយជាកន្លែងដែលយុវវ័យប្រជុំគ្នារៀនហើយ។ បើទោះជាហាងកាហ្វេជាកន្លែងសាធារណៈមានមនុស្សច្រើនក្ដីក៏និស្សិតអក្សរសាស្ត្រអង់គ្លេសរូបនេះអះអាងថាពួកគេចេះរក្សាភាពស្ងៀមស្ងាត់មិនរំខានអ្នកដទៃឡើយដែលអាចឱ្យរូបគេអានសៀវភៅបានដោយមិនមានសំឡេងរំខាន។

៤. ក្នុងបន្ទប់ទឹកឯផ្ទះ

បើទោះជាស្ដាប់ទៅខុសពីគេ និង គួរឱ្យអស់សំណើចក្ដីតែយុវជនមួយរូបសុំមិនបញ្ចេញឈ្មោះបានអះអាងថា រូបគេពិតជាចូលចិត្តអានសៀវភៅក្នុងបន្ទប់ទឹកមែន។ យុវជនរូបនេះក៏បានបន្តថា «ទទួលស្គាល់ថាខុសគេមែន! តែតិចឱ្យខ្ញុំទៅរៀននៅហាងកាហ្វេអីរៀនមិនចូលសោះ! ក្នុងបន្ទប់គេងអីតែ១០ នាទីដឹងតែសៀវភៅមើលវិញហើយ តែបើក្នុងបន្ទប់ទឹកវិញកាន់តែសៀវភៅមួយក្បាលចូលអង្គុយអានបណ្ដើរឆាប់ចាប់បាន ហើយសន្សំសំចៃពេលវេលាទៀត (សើច)! ខ្ញុំមិនមែនធ្វើចឹងរហូតទេ តែទទួលស្គាល់ថាអានសៀវភៅចូលតែពេលចូលបន្ទប់ទឹកមែន»៕

ចុះប្រិយមិត្តវិញចូលចិត្តអានសៀវភៅនៅកន្លែងណាវិញ?

អានអត្ថបទ៖ មតិផ្ទុយគ្នាពីការកម្សាន្ត Facebook ល្អអាក្រក់ដើរទន្ទឹមគ្នា

អត្ថបទ៖ គង់ ច័ន្ទវ៉ាន់ណេង