អ៊ីវ៉ា ស្ទាក់ស្ទើររឿងចាកចេញពី សាន់ដេ

2015-05-27 16:05:52
ចំនួនមតិ 0 | ចំនួនចែករំលែក 0

ចន្លោះមិនឃើញ

អ៊ីវ៉ា បានបង្ហាញភាពស្ទាក់ស្ទើរចំពោះការចាកចេញទៅកាន់ទ្រនំថ្មី ខណៈកុងត្រាជាមួយផលិតកម្ម សាន់ដេ នៅសល់ប្រមាណត្រឹម ៤ ខែ ទៀត។ សាមីខ្លួនបញ្ជាក់ថា អាចនឹងយកពេលមកធ្វើការពិចារណាសិន ព្រោះមានផលិតកម្មចម្រៀងចំនួន ៣ ហើយ កំពុងទាក់ទងក្នុងនោះក៏មានផលិតកម្ម Town ផងដែរ។

នៅក្នុងកម្មវិធីខួបកំណើតរបស់ ម៉ាដូណា យប់ម្សិលមិញ អ៊ីវ៉ា បាននិយាយថា៖ "ចំពោះបញ្ហាហ្នឹង នាងខ្ញុំអត់សម្រេចចិត្តទេ ព្រោះថា នៅរយៈពេល៤ខែទៀត ទើបដាច់កុងត្រា"។ តារាចម្រៀងមកពីខេត្តកំពង់ស្ពឺរូបនេះបន្តថា ក្រុមហ៊ុនក៏មានគោលការណ៍បន្តកុងត្រាផងដែរ ប៉ុន្តែ អាស្រ័យលើសាមីខ្លួនផ្ទាល់ជាអ្នកសម្រេចចិត្តក្នុងការបន្តកុងត្រាជាមួយកន្លែងចាស់ ឬទៅផលិតកម្មថ្មីនោះ។

តារាចម្រៀងរូបនេះបន្តថា ប្រសិនបើចាកចេញពីទ្រនំចាស់មែននោះ ក៏មិនបាននាំឪពុករបស់នាង ទៅជាមួយនោះទេ។ តារារូបនេះអះអាងថា ឪពុកនាងនៅច្រៀងបន្តក្នុងផលិតកម្ម សាន់ដេ ដដែល។

ទោះបីជាយ៉ាងណា នៅពេលនេះតារាត្រៀមផុតកុងត្រា ៦ ឆ្នាំក្នុងផលិតកម្ម សាន់ដេ រូបនេះបញ្ជាក់ថា នឹងយកពេលមកធ្វើការពិចារណា និង ធ្វើការសម្រេចចិត្តសិន ក្រោយបញ្ចប់កុងត្រា ដែលនៅសល់ ៤ ខែទៀតនោះ។ ជាមួយគ្នានោះ នាងនៅមិនទាន់ហ៊ានសន្និដ្ឋានបានថា ផលិតកម្មណាមួយល្អ ឬមិនល្អនោះទេ ព្រោះមិនទាន់ឈានជើងចាកចេញពីផលិតកម្ម សាន់ដេ នៅឡើយ៕

អានអត្ថបទ៖ បេនីយុំាង បញ្ចេញវីដេអូឱបឆ្កែ មើលហើយតិចច្រណែនសត្វទៅ!

អានអត្ថបទ៖ ម៉ាដូណា ធ្វើខួបយប់មិញ គម្រប់ ៣០ ឆ្នាំ