ល្បែងសួរខ្មោចខ្មៅដៃកំពុងពេញនិយមក្នុងស្រទាប់យុវវ័យ
- 2015-05-26 23:45:18
- ចំនួនមតិ 0 | ចំនួនចែករំលែក 0
ល្បែងសួរខ្មោចខ្មៅដៃកំពុងពេញនិយមក្នុងស្រទាប់យុវវ័យ
ចន្លោះមិនឃើញ
លើបណ្ដាញសង្គមប៉ុន្មានថ្ងៃចុងក្រោយនេះ មានការចែកចាយតៗគ្នានូវវីដេអូមួយចំនួនបង្ហាញពីល្បែងថ្មីមួយ ដែលអាចឲ្យអ្នកលេងហៅខ្មោចមកសណ្ឋិតក្នុងប៊ិច ឬខ្មៅដៃដើម្បីសួរ។ តាមពិតល្បែងដ៏ចម្លែកនេះ មានប្រភពមកពីបរទេស និងមានឈ្មោះថា “Charlie, Charlie”។ នេះបើតាមការចុះផ្សាយលើសារព័ត៌មាន Telegraph របស់ប្រទេសអង់គ្លេស។
សារព័ត៌មាន Telegraph បានបញ្ជាក់ថា ល្បែងដ៏ចម្លែកនេះ កំពុងវាយលុកលើបណ្ដាញសង្គម Twitter ដែលធ្វើឲ្យមនុស្សជាច្រើនកំពុងជជែកវែកញែកគ្នា។ យុវវ័យរាប់ពាន់នាក់ បានលេងល្បែង Charlie Charlie រួចថតវីដេអូបង្ហោះលើបណ្ដាញសង្គមនានា។
អ្នកលេងប្រើខ្មៅដៃពីរដាក់គងលើគ្នាជាសញ្ញាបូកនៅលើក្រដាសមួយ ដែលសរសេរពាក្យថា Yes និង No។ បន្ទាប់មកអ្នកចូលរួមលេង នាំគ្នាសួរថា "Charlie, Charlie តើយើងអាចលេងបានទេ?” ដើម្បីភ្ជាប់ទំនាក់ទំនងជាមួយព្រលឹងខ្មោចជនជាតិម៉ិកស៊ីកូម្នាក់ឈ្មោះ Charlie។
ប្រសិនបើព្រលឹងខ្មោច Charlie នៅទីនោះមែន ខ្មៅដៃនឹងមានចលនាប្ដូរទិសដោយខ្លួនឯង ដើម្បីបង្ហាញចម្លើយ។ ចំពោះការបញ្ចប់ល្បែងនេះ ក៏ដូចគ្នា គឺអ្នកលេងត្រូវសួរព្រលឹងខ្មោចថា “Charlie, Charlie តើយើងអាចឈប់បានទេ?” បន្ទាប់ពីខ្មៅដៃធ្វើចលនាបង្ហាញចម្លើយរួច អ្នកលេងត្រូវទម្លាក់ខ្មៅដៃចុះ ដើម្បីផ្ដាច់ការទាក់ទងជាមួយព្រលឹងខ្មោច Charlie។
នៅកម្ពុជា យុវវ័យមួយចំនួនបានក្លែងពីការហៅឈ្មោះព្រលឹងខ្មោច Charlie មកហៅឈ្មោះព្រលឹងរបស់មិត្តភ័ក្ដិជំនួសវិញ។ ចំណែកខ្មៅដៃ ឃើញថាមានចលនាបន្ទាប់ពីការហៅ ប៉ុន្តែមនុស្សជាច្រើនគិតថាជាការបោកប្រាស់។ ទោះយ៉ាងណា មិនមានការបញ្ជាក់ច្បាស់ថា ព្រលឹងខ្មោចពិតជាសណ្ឋិតនៅក្នុងខ្មៅដៃ ដើម្បីឲ្យធ្វើចលនាមែន ឬយ៉ាងណានោះទេ៕
ចង់ដឹងច្បាស់ពីវិធីលេង សូមទស្សនាវីដេអូខាងក្រោម៖
ចុះប្រិយមិត្តយល់យ៉ាងណាដែរចំពោះល្បែងដ៏ចម្លែកនេះ?
ប្រែសម្រួល៖ គង់ វិសាល ប្រភព៖ Telegraph