ហេតុផលធំៗ នៅពីក្រោយបញ្ហាកកស្ទះចរាចរណ៍ច្រើនគោលដៅនៅភ្នំពេញ

2015-05-28 13:00:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ការកកស្ទះចរាចរណ៍ កំពុងក្លាយជាបញ្ហាក្ដៅ និងជាជំងឺដ៏រ៉ាំរ៉ៃ ដែលផ្ដល់ការលំបាកដល់អ្នកដំណើរ នៅក្នុងប្រទេសកម្ពុជា នាពេលបច្ចុប្បន្ន។ តើកត្តាអ្វីខ្លះនាំឱ្យមានការកកស្ទះ? តើគួរមានដំណោះស្រាយអ្វីខ្លះ? ទាក់ទិននឹងបញ្ហានេះ លោក អ៊ា ចរិយ៉ា ទីប្រឹក្សាឯករាជផ្នែកសុវត្ថិភាពចរាចរណ៍ បានបង្ហាញដើមចម និងដំណោះស្រាយដូចខាងក្រោម៖

-កំណើនប្រជាជន៖ ក្នុងរយៈពេល៥ឆ្នាំចុងក្រោយនេះ កំណើនប្រជាជនមានការកើនឡើងប្រហែល១០% ក្នុងទីក្រុងភ្នំពេញ។ -កំណើនយានយន្ត៖ ក្នុងឆ្នាំ២០១៤ អត្រាយានយន្តកើនឡើង២០% ដែលជាចំនួនដ៏ច្រើនបំផុត។ -មិនគោរពច្បាប់ចរាចរណ៍៖ ការមិនគោរពស្លាកសញ្ញា ភ្លើងស្តុប មន្ត្រីចរាចរណ៍ ការមិនអធ្យាស្រ័យគ្នា នៅតែជាបញ្ហាសម្រាប់ប្រជាជនខ្មែរ។ -ការយកចំណីផ្លូវធ្វើអាជីវកម្ម៖ ស្ទើរគ្រប់ទីកន្លែង គ្រប់ច្រកល្ហកក្នុងទីក្រុងភ្នំពេញ ការយកចំណីផ្លូវធ្វើអាជីវកម្ម កំពុងតែពេញនិយមពីសំណាក់អាជីវករ ដោយគ្មានការអើពើពីមន្ត្រីមានសមត្ថកិច្ច បើទោះមានច្បាប់យ៉ាងណាក្ដី។ -កង្វះការរឹតបន្តឹងច្បាប់ចរាចរណ៍ផ្លូវគោក៖ ការបំពានច្បាប់នៅតែកើតមាន ដែលបង្កឡើងដោយអ្នកបើកបរ។ -ផ្ទះប្រជាជនគ្មានកន្លែងចតឡានត្រឹមត្រូវ៖ ការចតឡានតាមចិញ្ចើមផ្លូវមុខផ្ទះ ក៏ជាបញ្ហាបង្កឱ្យកើតមានជំងឺកកស្ទះដ៏រ៉ាំរ៉ៃដែរ។ -បង្កើតច្បាប់លើ Apartment សណ្ឋាគារ ផ្ទះសំណាក់ ៖ បច្ចុប្បន្ន Apartment សណ្ឋាគារ ផ្ទះសំណាក់ ឬផ្សារទំនើបខ្លះ មិនមានចំណតយានយន្តត្រឹមត្រូវទេ។ -បង្កើតផ្លូវថ្មើរជើងឱ្យមានសុវត្ថិភាព៖ ផ្លូវថ្មើរជើងនៅកម្ពុជានាពេលបច្ចុប្បន្ន មិនទាន់ឱ្យប្រជាជនពេញចិត្តនៅឡើយទេ ព្រោះថាវាមានលក្ខណៈមិនស្អាត មានការរំលោភពីសំណាក់អាជីវករ និងគ្មានសុវត្ថិភាព។ -ពង្រីកសេវាដឹកជញ្ជូនសាធារណ៖ បើទោះមានសេវារថយន្តក្រុងរបស់រដ្ឋមែន តែសេវានេះនៅមានកម្រិត និងមិនទាន់ទូលំទូលាយនៅឡើយ។ ចំនួនរថយន្តក្រុងមានកម្រិតតិច និងយឺតយ៉ាវ ធ្វើឱ្យអ្នកប្រើប្រាស់គ្មានទំនុកចិត្ត។ -គ្មានចំណតសាធារណ៖ កង្វះចំណតសាធារណៈ ជាបញ្ហាមួយដែលរដ្ឋាភិបាល មិនគួរមើលរំលង។

ដំណោះស្រាយ៖

-រដ្ឋាភិបាលត្រូវតែដាក់នូវសេវាដឹកជញ្ជូនសាធារណៈឱ្យបានច្រើនដូចជា រថយន្តក្រុង រថយន្ត ឬរថភ្លើងជាដើម ដើម្បីបញ្ចៀស ឬកាត់បន្ថយការកកស្ទះ និងការពង្រីកទីក្រុង។

-ប្រជាពលរដ្ឋត្រូវតែគោរពច្បាប់ និងអធ្យាស្រ័យគ្នា ព្រោះការគោរពច្បាប់ និងការចេះអធ្យាស្រ័យគ្នា ជួយឱ្យចរាចរណ៍លើដងផ្លូវមានដំណើរការល្អ និងគ្មានគ្រោះថ្នាក់។ -បើមានច្បាប់ហាមយកចំណីផ្លូវធ្វើអាជីវកម្មហើយនោះ មន្ត្រីមានសមត្ថកិច្ច និងពាក់ព័ន្ធ ត្រូវតែដំឡើងសាច់ដុំរឹតបន្តឹងច្បាប់ បើមិនដូច្នេះទេការកកស្ទះ នៅតែកើតមានដូចជាភ្លៀងរលឹម។ -ដើម្បីកុំឱ្យអ្នកបើកបរល្មើសច្បាប់ មន្ត្រីចរាចរណ៍ត្រូវតែរឹតបន្តឹងច្បាប់ ក្នុងរូបភាពផាកពិន័យឱ្យបានខ្ជាប់ខ្ជួន និងត្រឹមត្រូវទៅតាមសណ្ឋានទោសបានចែង។ -ពលរដ្ឋត្រូវមានកន្លែងចតឡានឱ្យបានត្រឹមត្រូវ ហើយរដ្ឋាភិបាលក៏គួរគិត និងចាត់វិធានការសមស្របណាមួយលើបញ្ហានេះ។ -រដ្ឋាភិបាលគួរតែកំណត់ច្បាប់ណាមួយ ស្ដីពីចំណតយានយន្ត។ -ពង្រីកនិងពង្រឹង សេវាកម្មដឹកជញ្ជូនរដ្ឋបន្ថែម ដូចជារថយន្តក្រុង រថភ្លើងជាដើម។ - រដ្ឋាភិបាលគួរពិនិត្យមើលចំណុចនេះឡើងវិញ ហើយបើអាចធ្វើបាននោះ ប្រជាជននឹងអាចងាកមកថ្មើរជើង ជាជាងប្រើប្រាស់រថយន្តផ្ទាល់ខ្លួន។ -រដ្ឋាភិបាលគួរតែសហការណ៍ជាមួយក្រុមហ៊ុនឯកជន ឬផ្ដល់ដីសម្បទានដល់ក្រុមហ៊ុននោះ ដើម្បីកសាងចំណត។ ការធ្វើបែបនេះ នឹងអាចជួយកាត់បន្ថយការកកស្ទះ។

ទីប្រឹក្សាឯករាជ្យផ្នែកសុវត្ថិភាពចរាចរណ៍ លោក អ៊ា ចរិយា បានបញ្ជាក់បន្ថែមថា ការពង្រឹងនិងពង្រីកសេវាកម្មដឹកជញ្ជូនសាធារណៈ មានសារសំខាន់ណាស់ ក្នុងការកាត់បន្ថយជំងឺស្ទះចរាចរណ៍ដ៏រ៉ាំរ៉ៃ ដែលកម្ពុជាកំពុងប្រឈម ក្នុងពេលបច្ចុប្បន្ន។ សព្វថ្ងៃការប្រើសេវានេះ មិនទាន់ទូលំទូលាយនៅឡើយទេ ហើយរដ្ឋាភិបាលគួរតែជំរុញ និងលើកទឹកចិត្ត ដល់ពលរដ្ឋឱ្យងាកមករកសេវានេះ។ គួរពង្រីកផ្លូវថ្មើរជើងឱ្យមានសុវត្ថិភាព និងគួរកំណត់ច្បាប់ផាកពិន័យថ្មី លើការចតរថយន្តតាមដងផ្លូវយ៉ាងអនាធិបតេយ្យ។ "បើរដ្ឋាភិបាលផាកពិន័យឱ្យធ្ងន់ លើអ្នកចតតាមផ្លូវ ខ្ញុំយល់ថាពួកគេនឹងងាកមករកសេវាសាធារណៈមិនខាន ហើយបើចង់ឱ្យពលរដ្ឋកាន់តែចង់ប្រើទៀតនោះ គឺត្រូវធ្វើចំណត់រថយន្តក្រុង នៅជិតតំបន់រស់នៅរបស់គាត់"។ លោក ចរិយា បន្ត។

ត្រង់ចំណុចនេះ ទីប្រឹក្សាឯករាជ្យផ្នែកចរាចរណ៍រូបនេះ បានលើកឡើងថា នៅបរទេសដែលជាប្រទេសជឿនលឿន ប្រជាជនគេចំណាយពេលដោយថ្មើរជើង តែ១៥នាទីប៉ុណ្ណោះ ទៅកាន់ចំណតសេវាដឹកជញ្ជូនសាធារណៈ៕

ចុចអាន៖ ឡានបីជួរ អ្នកជិះម៉ូតូទៅផ្លូវណា?

ចុចអាន៖ ចិញ្ចើមផ្លូវជារបស់អ្នកណា?

អត្ថបទ៖ អ៊ុំ សុភក្តិ