Sevilla លើកពាន Europa League ច្រើនជាងគេក្នុងប្រវត្តិសាស្ត្រ ក្រោយឈ្នះ Dnipro យប់មិញ
- 2015-05-28 15:43:13
- ចំនួនមតិ 0 | ចំនួនចែករំលែក 0
Sevilla លើកពាន Europa League ច្រើនជាងគេក្នុងប្រវត្តិសាស្ត្រ ក្រោយឈ្នះ Dnipro យប់មិញ
ចន្លោះមិនឃើញ
ក្រុមអេស្ប៉ាញ Sevilla បានលើកពាន UEFA Europa League ២រដូវកាលជាប់គ្នា និងក្លាយជាក្រុមដំបូងគេ ដែលលើកពានអឺរ៉ុបលំដាប់ទី២នេះ បាន៤សម័យកាលច្រើនជាងគេទាំងអស់ ក្នុងប្រវត្តិសាស្ត្រ បន្ទាប់ពីឈ្នះ FC Dnipro ៣-២ នៅវគ្គផ្ដាច់ព្រ័ត្រ នាទីក្រុង Warsaw ប្រទេសប៉ូឡូញយប់មិញ។
Dnipro របស់អ៊ុយក្រែន ដែលឡើងទៅវគ្គផ្ដាច់ព្រ័ត្រជាលើកដំបូង បាននាំមុខ Sevilla មុនតាំងតែពីនាទី៧ ដោយការតែតរបស់ Nikola Kalinic ប៉ុន្តែត្រូវក្រុមម្ចាស់ការពារតំណែងជើងឯក វាយបក២គ្រាប់វិញ ដោយ Grzegorz Krychowiak នាទី២៨ និង Carlos Bacca នាទី៣១។ យ៉ាងណាក្ដី មុនចប់តង់ទី១ Ruslan Rotan រកគ្រាប់ឲ្យ Dnipro តាមស្មើ ២-២ វិញ ដោយបាល់ហ្វ្រីឃីត នាទី៤៤។
ចូលដល់តង់ទី២ ខ្សែប្រយុទ្ធកូឡុំប៊ី វ័យ២៨ឆ្នាំ Bacca បានរកគ្រាប់បាល់ទី២របស់ខ្លួនបានសម្រេច នៅនាទី៧៣ និងជាគ្រាប់បាល់ជ័យជម្នះរបស់ក្រុម Sevilla តែម្ដង។ ដូច្នេះម្ចាស់ជើងឯក Europa League ថ្មីមួយនេះ នឹងអាចចូលលេងនៅក្របខ័ណ្ឌ UEFA Champions League នៅរដូវកាលថ្មី ២០១៥/១៦។
សរុបមក Sevilla គឺជាក្រុម ដែលលើកពាន Europa League បាន៤សម័យកាល (២០០៦, ២០០៧, ២០១៤, ២០១៥) ច្រើនជាងគេ ខណៈដែលក្រុមដែលធ្លាប់លើកពានមួយនេះ បាន៣សម័យកាលមាន Juventus, Inter Milan និង Liverpool៕
ប្រែសម្រួល៖ វិន ជីវ័ន្ត ប្រភព៖ bbc