ខ្សែ​ប្រយុទ្ធ​អ៊ីតាលី​​ Mario Balotelli ​នឹង​មិន​ចាក​ចេញ​ពី​ក្លិប​ Liverpool ទេ​នៅ​រដូវ​​ដោះដូរ​កីឡាករ​ខាង​មុខ​នេះ ​ពោល​គឺ​នឹង​នៅ​​កីឡដ្ឋាន Anfield បន្ត​ទៀត​នៅ​រដូវ​កាល​ក្រោយ។ នេះ​បើ​តាម​ភ្នាក់ងារ​កីឡាករ​វ័យ​២៤​ឆ្នាំ លោក​ Mino Raiola ​បាន​​បង្ហើប​ប្រាប់។

Balotelli ​បាន​ចាក​ចេញ​ពី​ AC Milan ទៅ​កាន់​ Liverpool កាល​ពី​​ខែ​សីហា ឆ្នាំ​២០១៤ ក្នុង​តម្លៃ​១៦​លាន​ផោន (ជាង​២៤,៥​លាន​ដុល្លារ) ប៉ុន្តែ​ទើប​តែ​ស៊ុត​បាន​១​គ្រាប់​គត់​ នៅ​ Premier League រដូវ​កាល​ដំបូង​ ​ជាមួយ​ហង្ស​ក្រហម ដែល​ទើប​តែ​បញ្ចប់​ទៅ​នេះ។

នៅ​ពេល​សួរ​ថា តើ​ Balotelli អាច​នឹង​ចាក​ចេញ​ពី Liverpool ដែរ​ឬ​ទេ នៅ​រដូវ​​ក្ដៅ​នេះ? លោក​ Raiola  បាន​ប្រាប់​ដល់​ Sky Sports ថា៖ "អត់​ទេ! យើង​បាន​ពិភាក្សា​គ្នា​ជាមួយ​​ក្លិប​ Liverpool រួច​ហើយ ហើយ​គាត់​នឹង​នៅ​បន្ត"។

កាល​ពី​ថ្ងៃ​អាទិត្យ​ អតីត​ខ្សែ​ប្រយុទ្ធ​ Manchester City ក៏​​បាន​បង្ហោះ​រូប​ថត​លើ​ Instagram មួយ ​ដែល​បង្ហាញ​ពី​ចេតនា​ មិន​ចង់​ចេញ​ពី​​ Liverpool ​ដែរ ​ដោយ​នៅ​ក្នុង​រូប​នោះ​ឃើញ​ថា​ Balotelli ជាប់​ច្រវាក់​​ដៃ​ទាំង​សង​ខាង និង​សម្លឹង​មើល​ទៅ​កីឡដ្ឋាន Wembly។ ជា​ពិសេស​​​មាន​​សារ​ខ្លី អម​ជាមួយ​រូប​ថត​នោះ​ថា "អរគុណ​អ្នកគាំទ្រ​ Liverpool សម្រាប់​រដូវ​កាល​នេះ...​ខ្ញុំ​នឹង​បញ្ចេញ​ថ្វី​ជើង​នៅ​រដូវ​កាល​ក្រោយ"។

ចុះ​ប្រិយ​មិត្ត​យល់​ថា Balotelli នឹង​ឡើង​ជើង​វិញ​ ឬ​អត់ រដូវ​កាល​ក្រោយ?

-ចុចអាន៖ មើល Balotelli​ ​អាច​​យក​ឈ្នះ ​អ្នក​ជំនាញ​ហ្វ្រីឃីត ​បាន​ឬ​អត់?

​ប្រែ​សម្រួល៖ វិន ជីវ័ន្ត ​ប្រភព៖ bbc | dailymail