ផ្ទុះសំណើចពេញអូឡាំពិកយប់មិញ អាជ្ញាកណ្តាលខ្សែបន្ទាត់រត់បុកអ្នកថតរូបដួលដាច់ផ្ងារ

2015-05-29 16:15:08
ចំនួនមតិ 0 | ចំនួនចែករំលែក 0

ចន្លោះមិនឃើញ

សកម្មភាពមិននឹកស្មានដល់មួយបានកើតមានឡើងក្នុងឱកាសនៃការប្រកួតបាល់ទាត់កម្តៅសាច់ដុំរវាងក្រុមជម្រើសជាតិកម្ពុជាឈុតធំ និងក្រុមកីឡាករអាហ្វ្រិកប្រកបអាជីពនៅកម្ពុជានៅពហុកីឡដ្ឋានជាតិអូឡាំពិកកាលពីយប់មិញគឺលោកអាជ្ញាកណ្តាលខ្សែបន្ទាត់ម្នាក់បានដួលដាច់ផ្ងារមិនអាចក្រោករួច បន្ទាប់ពីរត់បុកអ្នកថតរូបម្នាក់ពេញទំហឹងនៅលើខ្សែបន្ទាត់ស្មៅសិប្បនិម្មិត។

ស្របពេលដែលក្រុមជម្រើសជាតិកម្ពុជាកំពុងតែវាយសម្រុកលើក្រុមកីឡាករអាហ្វ្រិកនៅដើមតង់ទីមួយ ស្រាប់តែសំឡេងហ៊ោកងរំពងពេញស្តាតបានកើតមានឡើង ប៉ុន្តែសំឡេងហ៊ោកងរំពងនេះមិនមែនអបអរដល់ក្រុមជម្រើសជាតិស៊ុតបញ្ចូលទីនោះទេ។ ផ្ទុយទៅវិញគឺជាសំឡេងផ្ទុះសំណើចរបស់អ្នកទស្សនារាប់ពាន់នាក់ចំពោះលោកអាជ្ញាកណ្ដាលខ្សែបន្ទាត់ម្នាក់បានរត់ទៅបុកអ្នកថតរូបម្នាក់ ហើយបានដួល។ ការបុកពេញទំហឹងរហូតដល់ដួលនេះ បណ្តាលឲ្យអាជ្ញាកណ្តាលរូបនេះមិនអាចក្រោកឈរបន្តការងារបានទេ ខណៈសកម្មភាពលើទីលាននៅតែបន្ត។ ដោយគ្មាននរណាជួយផ្អាកការប្រកួត លោកអាជ្ញាកណ្តាលដែលដេកដួលលើវាលស្មៅសិប្បន្មិតនោះ ស៊ូទ្រាំលើកទង់ឡើងលើដើម្បីឲ្យលោកអាជ្ញាកណ្តាលនៅក្នុងទីលានផ្អាកការប្រកួតបណ្តោះអាសន្នសិនដើម្បីទៅជួយសម្រួលរូបលោក។ ទាំងលោកអាជ្ញាកណ្តាលនៅលើទីលាន និងគ្រូពេទ្យពីរនាក់បានរត់ទៅជួយមួយសន្ទុះទើបលោកអាជ្ញាកណ្តាលខ្សែបន្ទាត់អាចក្រោកឈរបន្តការងារទៀត។

លោកអាជ្ញាកណ្តាលខ្សែបន្ទាត់ដែលដួលដាច់ផ្ងារនេះត្រូវបានគេស្គាល់ឈ្មោះ រិទ្ធ ឌីណូតា ខណៈលោកអាជ្ញាកណ្តាលគ្រប់គ្រងការប្រកួតនៅលើទីលានគឺលោក ឃួន វីរៈ។ ចំណែកអ្នកថតរូបដែលត្រូវបានលោកអាជ្ញាកណ្តាលខ្សែបន្ទាត់បុកនោះមិនត្រូវមិនបានគេស្គាល់ឡើយ ប៉ុន្តែអ្នកថតរូបនៅក្បែរនោះបានប្រាប់ថា ជាអ្នកថតថ្មីម្នាក់ដែលប្រហែលជាប៉ុន្មាននាទីក្រោយមកក៏ចាកចេញពីទីលានបាត់។