រស់ សំអឿន បាត់បង់ឱកាសទៅស៊ីហ្គេម ទាំងសោកស្ដាយ

2015-05-29 20:39:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារស្លាបឆ្វេងជម្រើសជាតិ U-23 កម្ពុជាកីឡាករ រស់ សំអឿន មិនបានរួមដំណើរជាមួយមិត្តរួមក្រុមទៅចូលរួមប្រកួតក្នុងយុទ្ធនាការណ៍កីឡាស៊ីហ្គេមឆ្នាំ ២០១៥ នៅប្រទេសសិង្ហបុរិនេះឡើយ ដោយសាររបួសមិនទាន់ជាសះស្បើយ។

កីឡាករ រស់ សំអឿន ប្រកួតកន្លងមក

ខ្សែការពារស្លាបឆ្វេងរបស់ក្លិបបាល់ទាត់បឹងកេតអង្គរ រស់ សំអឿន បានឲ្យដឹងថា ខ្លួនមិនបានចូលរួមប្រកួតក្នុងព្រឹត្តិការណ៍កីឡាស៊ីហ្គេមលើកនេះឡើយ ព្រោះបញ្ហារបួសដៃមិនទាន់ជា។ នេះជារឿងសោកស្ដាយបំផុតសម្រាប់ជីវិតរបស់គេដែលមិនបានជួយជាតិក្នុងព្រឹត្តិការណ៍កីឡាធំនៅតំបន់អាស៊ីអាគ្នេយ៍។ ចំពោះប្រាក់រង្វាន់ជារឿងធម្មតា ប៉ុន្តែរឿងដែលស្ដាយបំផុតនោះគឺមិនបានបង្ហាញខ្លួនលើឆាកអន្តរជាតិដើម្បីជាតិ។

រស់ សំអឿន បាននិយាយថា ៖«ខ្ញុំពិតជាសោកស្ដាយបំផុត ពេលនេះបែរជាមានរបួសដៃទៅវិញ។ ខ្ញុំមានក្ដីសុបិនចង់លេងឲ្យបានល្អបំផុតក្នុងការប្រកួតស៊ីហ្គេមលើកនេះ ហើយក៏ចង់ជួយប្រទេសជាតិឲ្យបានឆ្លងផុតទៅវគ្គពាក់កណ្ដាលផ្ដាច់ព្រ័ត្រដែរ តែខ្ញុំបានត្រឹមអង្គុយស្ដាយទៅវិញ»។

សំអឿន បានលើកឡើងទៀតថា សម្រាប់ព្រឹត្តិការណ៍កីឡាស៊ីហ្គេមឆ្នាំនេះនឹងមិនមានរូបគេបង្ហាញខ្លួនឡើយ។ រហូតដល់ពេលនេះរបួសដៃរបស់គេមិនទាន់ជាសះស្បើយ១០០%នៅឡើយទេ ហើយប្រហែលជា៧ ឬ ៨ ថ្ងៃទៀតទើបបានជាសះស្បើយ១០០%។ លោក Lee Tae Hoon គ្រូបង្គោល U -23 កម្ពុជាបានទាក់ទងមក សំអឿន ដោយផ្ទាល់ និងប្រាប់ថា បានកាត់ឈ្មោះ រស់ សំអឿន ចេញពីជម្រើសជាតិក្នុងព្រឹត្តិការណ៍ ស៊ីហ្គេមឆ្នាំនេះចេញហើយ។

កីឡាកររូបនេះបានបន្តថា មិនបានចូលលេងនៅស៊ីហ្គេមហើយ នៅវគ្គជម្រុះWorld Cup ពីរប្រកួតដំបូងនាថ្ងៃទី ១១ និងទី ១៦ ភាគរយនៃការចូលលេងគឺគ្មានឡើយ។ រូបគេតែងតែជាប់ជាជម្រើស១១ នាក់ដំបូងសម្រាប់ការប្រកួតកន្លងមកតំណែងជាខ្សែការពារក្នុងក្រុម U-23 ប៉ុន្តែក្នុងកំឡុងពេលមានរបួស កីឡាករដែលអាចជំនួសតំណែងរបស់គេ គឺ អុល រ៉ាវី និង សំអឿន ពិដោរ។

រស់ សំអឿន ក៏សូមជូនពរដល់ក្រុមបាល់ទាត់ជម្រើសជាតិ U-23 កម្ពុជាអាចឆ្លងចូលវគ្គពាក់កណ្ដាលផ្ដាច់ព្រ័ត្រដោយជោគជ័យ។ រូបគេបានខកខានហ្វឹកហាត់ជាមួយក្រុមជម្រើសជាតិ U-23 កម្ពុជាតាំងពីថ្ងៃទី ១៣ ខែ ឧសភា ឆ្នាំ ២០១៥ បន្ទាប់ពីរូបគេទទួលរងរបួសដៃពេលក្រុមកម្ពុជាប្រកួតមិត្តភាពជាមួយក្រុមកូរ៉េខាងត្បូងនៅប្រទេសវៀតណាម៕

អត្ថបទ៖ ស្រី សុវណ្ណដារ៉ា