យុវជនបីក្រុមទទួលបានជយលាភីល្អបំផុត ពីការប្រកួតប្រជែងផែនការអាជីវកម្មថ្នាក់ជាតិ

2015-06-02 16:17:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយធ្វើការប្រកួតប្រជែងយ៉ាងស្វិតស្វាញ ក្នុងផ្ដាច់ព្រ័ត្រ (៨ក្រុមចុងក្រោយ) ទីបំផុតជយលាភី៣ក្រុមល្អបំផុត នៃកម្មវិធី "ការប្រកួតប្រជែងផែនការអាជីវកម្មថ្នាក់ជាតិប្រចាំឆ្នាំ២០១៥" រកឃើញហើយ។

ជយលាភីទាំង៣ក្រុម ដែលក្រុមគណៈកម្មការទាំងបីរូប ដាក់ពិន្ទុឱ្យឈ្នះជាឯកច្ឆន្ទនោះរួមមាន ក្រុម Sport Pill ទទួលចំណាត់ថ្នាក់លេខ១ ក្រុម Khmer Mortuary Service ទទួលចំណាត់ថ្នាក់លេខ២ និងក្រុម Rice Version ទទួលចំណាត់ថ្នាក់លេខ៣។

ក្នុងជ័យជំនះនេះ ក្រុមគម្រោងអាជីវកម្មស្ដីពីការបំពេញតម្រូវការអ្នកលេង និងលើកកម្ពស់វិស័យបាល់ទាត់ Sport Pill ទទួលបានរង្វាន់ជាទឹកប្រាក់៥០០០ដុល្លារ ក្រុមគម្រោងអាជីវកម្មនិយាយពីការដឹកសព Khmer Mortuary Service ទទួលបាន៣០០០ដុល្លារ និងក្រុមនិយាយពីការលើកកម្ពស់ដំណាំស្រូវ Rice Service ទទួលបាន២០០០ដុល្លារ។ ទោះបីជាយ៉ាងណា នៅមានមួយក្រុមទៀត គឺ School Bus ដែលត្រូវគណៈកម្មការ សម្រចឱ្យជាប់លេខ៤ និងទទួលបានប្រាក់លើកទឹកចិត្ត ១០០០ដុល្លារអាមេរិកផងដែរ។

នៅវគ្គផ្ដាច់ព្រ័ត្រនៃកម្មវិធី "ការប្រកួតប្រជែងផែនការអាជីវកម្មថ្នាក់ជាតិប្រចាំឆ្នាំ២០១៥" នៅឯសណ្ឋាគារកាបូឌីយ៉ាណា កាលពីថ្ងៃទី៣០ ខែឧសភា ឆ្នាំ២០១៥កន្លងទៅ គឺមានការអញ្ជើញចូលរួមយ៉ាងច្រើនកុះករ ពីសំណាក់ភ្ញៀវកិត្តិយស សហគ្រិន និងវិនិយោគិន ជាតិនិងអន្តរជាតិ។ ជាពិសេសគឺវត្តមានដ៏ខ្ពង់ខ្ពស់របស់ឯកឧត្ដមបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និងជាអ្នកប្រគល់រង្វាន់ដល់ជយលាភីទាំងបួនក្រុម។

កម្មវិធីរៀបចំដោយសាកលវិទ្យាល័យ ពុទ្ធិសាស្ត្រ នេះ គឺធ្វើឡើងដើម្បីជំរុញ និងគាំទ្រដល់យុវវ័យកម្ពុជាទូទាំងប្រទេស ដែលមានចិត្តស្រលាញ់ និងមានក្ដីស្រមៃ ចង់ក្លាយជាសហគ្រិន ឱ្យមានឱកាសអាចធ្វើការអភិវឌ្ឍផែនការអាជីវកម្មរបស់ខ្លួន ព្រមទាំងទទួលការបណ្ដុះបណ្ដាលនូវភាពជាសហគ្រិនឈានមុខគេក្នុងប្រទេស ស្របពេលវិនិយោគិនជាច្រើន មកបណ្ដាក់ទុននៅកម្ពុជា។

គួរបញ្ជាក់ផងដែរថា កម្មវិធីដំបូងខាងលើ បានចាប់ផ្ដើមដំណើរការ នៅថ្ងៃទី២៦ ខែមករា ឆ្នាំ២០១៥ វគ្គពាក់កណ្ដាលផ្ដាច់ព្រ័ត្រនៅថ្ងៃទី២១ ខែឧសភា និងវគ្គផ្ដាច់ព្រ័ត្រនៅថ្ងៃទៅ៣០ ខែឧសភា ឆ្នាំ២០១៥កន្លងមក៕

https://www.youtube.com/watch?v=y0AjdhdVt7o&feature=youtu.be