ហេតុផលខ្លះៗដែលយុវវ័យខ្មែរសម្រេចចិត្តរៀនបណ្ដើរធ្វើការងារបណ្ដើរ

2015-06-02 22:38:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថិតនៅក្នុងកំឡុងពេលសិក្សាថ្នាក់មហាវិទ្យាល័យ មាននិស្សិតជាច្រើននាក់បានសម្រេចចិត្តរៀនបណ្ដើរធ្វើការបណ្ដើរ ដែលមានទាំងនិស្សិតមកពីខេត្ត និង និស្សិតដែលរស់នៅភ្នំពេញស្រាប់ កំពុងបម្រើការងារនៅតាមស្ថាប័នផ្សេងៗ ទាំងពេញម៉ោងនិងក្រៅម៉ោង។ តើមានមូលហេតុអ្វីខ្លះដែលធ្វើឱ្យនិស្សិតសម្រេចចិត្តចំណាយពេលវេលាមកធ្វើការជំនួសវិញ?

ផ្គត់ផ្គង់ជីវភាពប្រចាំថ្ងៃ

កញ្ញាង៉ែត សុធាវីបានឱ្យដឹងថាកត្តាដែលជំរុញឱ្យកញ្ញាមករកការងារធ្វើទាំងនៅសិក្សាឆ្នាំទី១នៅសាកលវិទ្យាល័យកម្ពុជានៅឡើយនោះគឺកត្តាជីវភាព។ និស្សិត ផ្នែកធនាគារនិងហិរញ្ញវត្ថុ រូបនេះបានបន្តថាខ្លួនធ្វើជា គ្រូមតេ្តយ្យនៅសាលា Apple Tree ដើម្បីបានប្រាក់មកផ្គត់ផ្គង់ការរស់នៅប្រចាំថ្ងៃ។ «ទំនិញនៅភ្នំពេញថ្លៃ ត្រូវការចំណាយច្រើន ទោះយ៉ាងណាវាជួយកាត់បន្ថយការយកលុយពីអ្នកផ្ទះចាយបានខ្លះដែរ!»។ ធាវី បានបន្ថែម។

(រូបតំណាង)

ទាញយកបទពិសោធន៍

ងាកមកកញ្ញាកែវ លក្ខិណា វិញសព្វថ្ងៃជានិស្សិតឆ្នាំទីមួយនៃសាកលវិទ្យាល័យវេស្ទើន និងជាគ្រូបង្រៀនភាសាអង់គ្លេសនៃសាលាឯកជនមួយកន្លែង បានប្រាប់ឱ្យ Sabay ដឹងថា មួលហេតុដែលកញ្ញាសម្រេចចិត្តធ្វើការងារកំឡុងពេលរៀនគឺព្រោះតែចង់បានបទពិសោធន៍ការងារ។ លក្ខិណាបន្តថា បើគិតតាមប្រាក់ខែវិញចាយមិនគ្រប់ទេ តែអ្វីដែលធ្វើឱ្យខ្លួននៅតែបន្តការធ្វើការខាងក្រៅគឺការងារបានបង្រៀនយុវតីរូបនេះឱ្យចេះលត់ដំខ្លួនឯង ឱ្យស្គាល់ការងារ។ ម្យ៉ាងវិញទៀតការធ្វើជាគ្រូបង្រៀនគឺជាក្ដីស្រម៉ៃរបស់នាងតាំងពីនៅវិទ្យាល័យ។ «ទម្រាំចប់ឆ្នាំទីបួន ខ្ញុំនឹងបានបទពិសោធន៍ច្រើន! និងអាចរកការងារធ្វើបានល្អជាងកាលនៅរៀនឆ្នាំទីមួយដល់ទីបី ព្រោះអី យើងមានបទពិសោធដល់ទៅបីឆ្នាំឬបួនឆ្នាំពេញ! ដូច្នេះបទពិសោធន៍ការងារនិងចំណេះដឹងអាចឱ្យយើងរកការងារបានលឿន! វាគ្រាន់បើជាងរៀនចប់ឆ្នាំទីបួនតែអត់មានបទពិសោធន៍អីសោះ ព្រោះក្រុមហ៊ុនខ្លះមិនមែនរកតែសញ្ញាប័ត្រទេ គេក៏រកសញ្ញាឃើញដែរ អញ្ចឹងបើយើងមានបទពិសោធន៍ការងារស្រាប់យើងមានឱកាសទទួលបានការងារច្រើនជាង»។ លក្ខិណា បន្ថែម។

អនុវត្តលើទ្រឹស្ដីដែលកំពុងរៀន

លោក ម៉េង ភក្រ្តាជាជំនួយការរដ្ឋបាលនៅក្រុមហ៊ុនឯកជនមួយនិងជានិស្សិតកំពុងបន្តការសិក្សានៅ សាកលវិទ្យាល័យបញ្ញាសាស្ត្រ ផ្នែករដ្ឋបាលសាធារណៈ បានលើកឡើងថា កាលដែលរៀននៅក្នុងថ្នាក់គ្រាន់តែជាទ្រឹស្ដីប៉ុណ្ណោះ ជួនកាលទ្រឹស្ដីនិងការអនុវត្តវាផ្សេងពីគ្នា ដូច្នេះទើបត្រូវការស្វែងយល់អំពីការងារខាងក្រៅនិងអាចពង្រឹងចំណេះដឹងនៅក្នុងថ្នាក់រៀនទៀតផង។

មិនខ្វះខាតតែចង់រកលុយចាយខ្លួនឯង

កញ្ញាចាន់ សេរីរស្មី ជានិស្សិតឆ្នាំទីមួយនៅសាកលវិទ្យាល័យកម្ពុជាផង នៅវិទ្យាស្ថានភាសាបរទេសផង និងជាអ្នកផ្ដល់ព័ត៌មាននៃក្រុមហ៊ុនលក់រថយន្តមួយកន្លែងទៀតនោះ បានឱ្យដឹងថា កញ្ញាចង់បានបទពិសោធន៍ការងារនិងចង់មានលុយចាយខ្លួនឯង ហើយលើសពីនេះទៀតនៅពេលបញ្ចប់ការសិក្សា រស្មី មានឱកាសក្នុងការរកការងារដែលមានប្រាក់កម្រៃខ្ពស់បាន។

ស្រដៀងគ្នានេះដែរកញ្ញា គង់ច័ន្ទវណ្ណី ជានិស្សិតឆ្នាំទីបួនផ្នែកធនាគារនិងហិរញ្ញវត្ថុ នៃសាកលវិទ្យាល័យអាស៊ីអឺរ៉ុប និងជាជំនួយការបេឡានៃធនាគារអេស៊ីលីដា ភីអិលស៊ីបានឱ្យដឹងថា កញ្ញាបានចូលធ្វើការតាំងពីរៀនឆ្នាំទីពីរម្ល៉េះ ដោយសារកញ្ញាចង់រកប្រាក់រៀនដោយខ្លួនឯង។ បើទោះបីជាឪពុកម្ដាយកញ្ញាមានលទ្ធភាពសម្រាប់ផ្គត់ផ្គង់ការសិក្សារបស់កញ្ញាក៏ដោយ ក៏និស្សិតមានស្រុកកំណើតនៅខេត្តកណ្ដាលរូបនេះនៅតែធ្វើការងារដើម្បីឧបត្ថម្ភការសិក្សារៀនសូត្រនិងការចាយវាយសម្រាប់ខ្លួនឯងពោលគឺ វណ្ណី មិនចង់លាដៃសុំលុយឪពុកម្ដាយចាយដូចកាលនៅវិទ្យាល័យឡើយ។

ចុះចំណែកប្រិយមិត្តមានមូលហេតុអ្វីដែរទើបរៀនផងធ្វើការផង?

ចុចត្រង់នេះអាន៖ កន្លែងណាខ្លះពិសេសបំផុតសម្រាប់យុវវ័យក្នុងការអានសៀវភៅ?

ចុចត្រង់នេះអាន៖ ប្រុសៗគិតម៉េច បើមានសង្សារកម្ពស់ខ្ពស់ជាង?

អត្ថបទ៖ គង់ ច័ន្ទវ៉ាន់ណេង