ប៉ូលិសផាក មានអារម្មណ៍ខ្មាសគេ ច្រើនជាងអស់លុយ?

2015-06-03 18:44:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេលនគរបាលចរាចរណ៍ផាកពិន័យម្តងៗនៅតាមភ្លើងស្តុប មានមនុស្សច្រើនណាស់មើលមកយើង។ អ្នកខ្លះប្រហែលជាគិតថា ប៉ូលិសនោះអាក្រក់ ឬមកពីអ្នកដែលជិះនោះមិនចេះគោរពច្បាប់ចរាចរណ៍ជាដើម។ ប៉ុន្តែសម្រាប់អ្នកធ្លាប់មានបទពិសោធន៍ត្រូវប៉ូលិសផាកវិញ ពួកគេបែរជានិយាយថា មានអារម្មណ៍ខ្មាសគេច្រើនជាងអស់លុយ ដោយប៉ូលិសផាកទៅវិញ។

និស្សិតប្រុសឆ្នាំទី២ អុន សំអាង និយាយបែបកំប្លែងបន្តិច៖ “មកពីខ្ញុំជិះអត់មើលស្តុបដោយខ្លួនឯង បត់ទៅវឹង ប៉ូលិសមកស្ទាក់ចាប់តែម្តង។ ពេលនោះអត់សូវមានលុយផង ប៉ូលិសផាកទៀត ខ្មាសគេតិចអីបង ហើយភ័យទៀត។ ពេលនោះមានតែកាតគ្រី ប៉ូលិសទារថ្លៃផាកទាល់តែគ្រប់ទើបឲ្យទៅ”។

រីឯប្អូនស្រី ឆែម សៀកលាង ប្រាប់ថា៖ “ពេលនោះខ្ញុំជិះហួសភ្លើងស្តុប ស្រាប់តែប៉ូលិសរត់មកតែម្តង។ ខ្ញុំភ័យសឹងស្លាប់ សឹងតែជិះបុកពួកគាត់ទៀតផង ពិសេសនោះខ្មាសគេខ្លាំងណាស់ ព្រោះអ្នកដំណើរផ្សេងទៀតមើលមកច្រើន។ គ្រាន់តែពួកគាត់ផាកខ្ញុំមួយស៊ីពេលចង់អស់១០នាទី”។

ចំពោះ កញ្ញា ផិន ផាន់ណា រៀននៅវិទ្យាស្ថានបច្ចេកវិទ្យាកម្ពុជា មានបទពិសោធន៍ស្រដៀងនឹងសៀកលាងដែរ។ “ជិះម៉ូតូបើកភ្លើងអត់ដឹងខ្លួន ប៉ូលិសហៅផាក អូសម៉ូតូខ្ញុំយកទៅ។ គាត់ទារខ្ញុំ១០០០០រៀល ខ្ញុំសុំគាត់ទម្រាំតែបាន៥០០០៛ ចង់អស់១៥នាទី។ តែសំណាងវិញ អត់សូវខ្មាសគេប៉ុន្មានដែរ ព្រោះពាក់មួក និងពាក់ម៉ាសគេអត់សូវស្គាល់មុខ”។ ផាន់ណា និយាយហើយសើច។

ចំណែកឯយុវជន ច្រេវ រុន និស្សិតនៅសាកលវិទ្យាល័យភូមិន្ទភ្នំពេញ ដូច ជាដឹងពីវិធីដែលរំដោះខ្លួនមិនចង់ឲ្យខ្មាសគេយូរពេលត្រូវ ប៉ូលិសផាក។ និស្សិតរូបនេះពន្យល់ថា៖ “ខ្ញុំត្រូវប៉ូលិសផាកនៅម្តុំស្ពានអាកាស កាលនោះខ្ញុំអត់ពាក់មួកការពារទេ។ គ្រាន់តែប៉ូលិសហៅចូលទៅភ្លាម ខ្ញុំយកលុយឲ្យគាត់៥០០០រៀលហើយក៏ជិះម៉ូតូចេញទៅ។ និយាយទៅមិនដល់២នាទីផង”។

ចុះអ្នកវិញ ខ្លាចប៉ូលិសចាប់ ឬខ្លាចខ្មាសគេជាង?

ចុចអាន៖ ហេតុផលធំៗ នៅពីក្រោយបញ្ហាកកស្ទះចរាចរណ៍ច្រើនគោលដៅនៅភ្នំពេញ

អត្ថបទ៖ ផល្លា សុម៉ាលីណា