មួកសុវត្ថិភាពចំនួន១ម៉ឺនចែកជូនដោយហុងដា

2015-06-10 00:19:37
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីចែកមួកសុវត្ថិភាព ដល់បណ្ដាស្ថាប័នរដ្ឋ អង្គការក្រៅរដ្ឋាភិបាល និងអតិថិជនសរុបចំនួន ១០ ០០០មួកទូទាំងប្រទេស ក្នុងឆ្នាំ២០១៥ ដើម្បីចូលរួមចំណែកកាត់បន្ថយ អត្រាគ្រោះថ្នាក់ចរាចរណ៍នៅកម្ពុជា នឹងធ្វើឡើងដោយក្រុមហ៊ុន អិន ស៊ី អិច ហុងដា។

លោក ដួង យ៉ាណាត ប្រធានគ្រប់គ្រងផ្នែកសុវត្ថិភាពបើកបរ ឱ្យដឹងថា "ក្ដីបារម្ភដ៏ធំធេងពីហុងដា" ក្រោមប្រធានបទ "ស្រលាញ់នរណាម្នាក់ត្រូវពាក់មួកសុវត្ថិភាព" គឺជាគម្រោងមួយរួមចំណែក កាត់បន្ថយអត្រាគ្រោះថ្នាក់ចរាចរណ៍ និងឆ្លើយតបទៅនឹងច្បាប់ចរាចរណ៍ផ្លូវគោកថ្មី ដែលទើបអនុម័តដោយរដ្ឋសភា ។ច្បាប់នេះ តម្រូវឱ្យអ្នកបើកបរ និងអ្នករួមដំណើរជាមួយគ្នា ត្រូវតែពាក់មួកសុវត្ថិភាព។

លោកថា ចំនួនអ្នកស្លាប់ និងរបួសក្បាលធ្ងន់ធ្ងរ ដោយមិនបានពាក់មួកសុវត្ថិភាព កំពុងតែមានកំណើនគួរឱ្យកត់សម្គាល់ ។

«យើងបារម្ភហើយទទួលស្គាល់ថា គ្រោះថ្នាក់ចរាចរណ៍ជាឃាតករទី១ ក្នុងការឆក់យកជីវិតមនុស្ស តាមពីក្រោយដោយ ជំងឺអេដស៍ និងគ្រាប់មីនមិនទាន់ផ្ទុះ»

សារសំខាន់សម្រាប់ការចែកនេះគឺ រួមចំណេកជាមួយប្រធានបទរបស់រដ្ឋាភិបាល «ថ្ងៃនេះ ថ្ងៃស្អែកកុំឱ្យមានគ្រោះថ្នាក់ចរាចរណ៍»« ប្រជាជនកម្ពុជា នឹងចូលរួមទាំងអស់គ្នា ដើម្បីបន្ថែមការប្រុងប្រយ័ត្ន ដើម្បីជៀសផុតពីគ្រោះថ្នាក់ចរាចរណ៍»។

របាយការណ៍របស់ក្រសួងមហាផ្ទៃ អ្នកស្លាប់ដោយសារគ្រោះថ្នាក់ចរាចរណ៍ក្នុងឆ្នាំ២០១៤ កន្លងទៅមានរហូតដល់ចំនួន២១៤៨នាក់។ ក្នុងចំណោមអ្នកស្លាប់ទាំងនេះ មាន៧៣%ធ្វើដំណើរតាមម៉ូតូ ដោយក្នុងនោះដែរមានអ្នកស្លាប់របួសក្បាលធ្ងន់ធ្ងរដល់៦៩%។

នៅថ្ងៃទី០៩ ខែមិថុនា ឆ្នាំ២០១៥នេះ ភ្នំពេញជាគោលដៅទីមួយ ដែលក្រុមហ៊ុនបានចែកមួកសុវត្ថិភាព ចំនួន១០០០មួក ដល់អតិថជនរបស់ខ្លួន៕