Mourinho៖ ខ្ញុំត្រូវការកីឡាករថ្មី ៣នាក់ទៀត

2015-06-10 23:48:05
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការក្រុម Chelsea លោក Jose Mourinho បាននិយាយថា លោកត្រូវការកីឡាករថ្មីបន្ថែមចំនួន៣នាក់ទៀត នៅរដូវកាលថ្មីខាងមុខនេះ ហើយកីឡាករចាស់ឆ្នើមៗរបស់លោកមួយចំនួន លោកនឹងរក្សាទុកឲ្យនៅដដែល ពោលគឺមិនលក់ចេញឡើយ។

បុរសសញ្ជាតិព័រទុយហ្គាល់ បានត្រឡប់ទៅដឹកនាំតោខៀវ ជាលើកទី២ និងជួយឲ្យ Chelsea លើកពានលីកកំពូលអង់គ្លេសលើកទី៥ នៅរដូវកាល២០១៤/១៥ ដែលទើបបញ្ចប់ថ្មីៗនេះ។

អ្នកចាត់ការវ័យ៥២ឆ្នាំ បានប្រាប់ដល់ Mirror ថា៖ "នៅរដូវកាលមុនៗ ខ្ញុំរីករាយ ដែលលក់កីឡាករពីរបីនាក់ចេញខ្លះ ទោះបីដឹងថាពួកគេជាកីឡាករល្អក៏ដោយ ប៉ុន្តែឆ្នាំនេះ ខ្ញុំមិនរីករាយទេ បើលក់កីឡាករល្អៗរបស់ខ្ញុំ ដូច្នេះត្រូវតែរក្សាទុកពួកគេ"។

“បើខ្ញុំអាចរក្សាទុក Hazard, Matic, Ivanovic, Diego Costa និង Fabregas បាន នោះគឺជាគោលដៅទី១ របស់ខ្ញុំ។ ខ្ញុំគិតថា យើងត្រូវការកីឡាករ៣នាក់បន្ថែមទៀត អាចខ្សែប្រយុទ្ធម្នាក់ ព្រោះយើងបានបាត់បង់ វីរបុរសរបស់យើង Drogba,ត្រូវការខ្សែការពារម្នាក់ និងខ្សែបម្រើម្នាក់ទៀត ដើម្បីមកប្រកួតប្រជែងក្នុងក្រុមឲ្យកាន់តែល្អ"។ អតីតអ្នកចាត់ការ Real Madrid បានបន្ថែម។

សរុបតាំងពីលោកដឹកនាំ Chelsea កាលឆ្នាំ២០០៤មក Mourinho បានជួយឲ្យតោខៀវ ឈ្នះពាន Premier League ៣ដង (២០០៥, ២០០៦, ២០១៥), FA Cup ១ដង (២០០៧), League Cup ៣ដង (២០០៥, ២០០៧, ២០១៥) និងលើកពាន Community Shield ១ដង កាលឆ្នាំ២០០៥៕

-ចុចអាន៖ Mourinho ថាគ្មានក្រុមណាល្អជាង Chelsea ទេ ពេលទៅដល់ថៃម្សិលមិញ

ប្រែសម្រួល៖ វិន ជីវ័ន្ត ប្រភព៖ goal