តារាសម្ដែង វ៉ាន ដាលីស ងាកមកបើកហាង

2015-06-12 16:59:08
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងស្រីស្អាត វ៉ាន់ ដាលីស បានដកឃ្លាពីវិស័យសិល្បៈបន្តិច ហើយងាកមកចាប់អាជីពបើកហាងលក់អាហារវិញម្ដង ដោយទើបដំណើរការបាន១ខែ និងមានអ្នករួមអាជីពតិចតួចប៉ុណ្ណោះបានដឹង។

អតីតជយលាភីចំណាត់ថ្នាក់លេខ៣កម្មវិធីប្រលងរបស់ BKA ឆ្នាំ២០១៣ រូបនេះបញ្ជាក់ថា ហាងរបស់នាងមានយីហោ " D House” ហើយអាហារភាគច្រើនតម្រូវតាមចំណង់ចំណូលចិត្តយុវវ័យ។ ទោះបីជាយ៉ាងណា មុខរបររបស់នាងនៅមិនទាន់ដំណើរការល្អនៅឡើយ ព្រោះទើបចាប់ផ្ដើមថ្មីថ្មោង ខណៈការផ្សព្វផ្សាយនៅមានកម្រិត។ តារាសម្ដែងរូបនេះបន្តថា បានសម្រេចចិត្តដកឃ្លាពីសិល្បៈបណ្ដោះអាសន្ន ដើម្បីយកពេលទៅពង្រឹងអាជីវកម្មថ្មី កំពុងដំណើរការជំហានគីង្គក់នៅឡើយ។

នាងនិយាយថា៖"សូម្បីអ្នករួមអាជីពសិល្បៈភាគច្រើន ក៏មិនបានប្រាប់ផងហ្នឹង ដូច្នេះមានអ្នកមកមួយៗទេ មិនទាន់ដូចគេទេ"។ តារារូបនេះបន្តថា នាងបានយកពេលវេលាភាគច្រើនមើលការខុសត្រូវចំពោះមុខរបរថ្មី ថែមទាំងបដិសេធចំពោះការសម្ដែង MV ខារ៉ាអូខេរបស់ផលិតកម្មមួយចំនួន រួមទាំងការដើរម៉ូដ។ នាងរំពឹងថា នឹងអាចទាក់ទាញការចាប់អារម្មណ៍ពីអតិថិជនបាន ដោយផ្ដោតលើបុគ្គលិកមានសេវាកម្មល្អ និងបង្កើនរសជាតិម្ហូបនៅក្នុងហាង។

ទោះបីជាយ៉ាងណា ស្រីស្អាតវ័យ២១ឆ្នាំរូបនេះ មិនទាន់បញ្ជាក់ច្បាស់ពីការត្រឡប់ទៅកាន់សិល្បៈនោះទេ ក្នុងហេតុផលស្រលាញ់ការរកស៊ីជាងអាជីពសិល្បៈ។ ម្យ៉ាងការប្រឡូកក្នុងវិស័យសិល្បៈប៉ុន្មានឆ្នាំចុងក្រោយនេះ ក៏នៅមិនទាន់បានសាងកេរ្ត៍ឈ្មោះលេចធ្លោនោះដែរ។ នាងបញ្ជាក់៖" បើនិយាយទៅ មកពីខ្ញុំចង់រកស៊ី អីចឹងហើយចំពោះរឿងសិល្បៈវិញ ខ្ញុំដូចជាមិនច្បាស់ដែរឥឡូវហ្នឹង!"។

អានអត្ថបទ៖ ដួង ស្រីពេជ្រ ថ្វីត្បិតមានការរិះគន់មែន តែការងាររឹតតែសម្បូរធ្វើ

អានអត្ថបទ៖ ជួបបញ្ហាជាច្រើន សុវណ្ណា ហ្គិច ប្រកាសឈប់ពីសិល្បៈហើយ!

អត្ថបទ៖ សំ ជំនាញ