"ដេកជាមួយខ្ញុំអត់ ១០០០ដុល្លារ?" ធ្វើឲ្យ អេន យ៉ាដាវ ផ្ទុះកំហឹង

2015-06-15 17:38:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យមួយឃ្លា "ដេកជាមួយខ្ញុំអត់ ១០០០ដុល្លារ" ដែលទំព័របណ្ដាញសង្គម (Facebook Page) មួយ បានសរសេរដោយភ្ជាប់ជាមួយរូបថតរបស់តារាសម្ដែង អេន យ៉ាដាវ ផង បានធ្វើឲ្យសាមីខ្លួនផ្ទុះកំហឹង។

“ប្រសិនបើពួកគេមិនបញ្ឈប់សកម្មភាពទេ ខ្ញុំនឹងឲ្យវាភ្លឺភ្នែកម្ដង រឿងដល់ប៉ុណ្ណេះហើយ ខ្ញុំអត់និយាយលែងទេ ហួសហេតុដែលសុខៗធ្វើដូច្នេះ ក្រែងមានម៉ែមានបងប្អូនជាស្រីដែរអ្ហី ម៉េចក៏ថោកទាបម្ល៉េះ!”។ តារាសម្ដែង អេន យ៉ាដាវ ប្រតិកម្ម ចំពោះទំព័របណ្ដាញសង្គមមួយ ដែលនាងបានរកឃើញថា បានយកនាងទៅដាក់លក់បម្រើសេវាផ្លូវភេទ ១យប់១០០០ដុល្លារ។

ទំព័របណ្ដាញសង្គមមួយនោះ បានយករូប យ៉ាដាវ ទៅដាក់ហើយសរសេរសារជាភាសាអង់គ្លេសថា "Sleep with me ort 1000$?” ដែលមានន័យថា "ដេកជាមួយខ្ញុំទេ ១០០០ដុល្លារ"។ តារាស្រីក្នុងរឿង "ខ្ញុំថាខូច ខូចមែន" រូបនេះ ប្រាប់ទៀតថា នាងទើបទទួលបានព័ត៌មានខាងលើនេះថ្មីៗ ក្រោយមានអ្នកគាំទ្រនាងជាច្រើន បានថតផ្ញើមកឲ្យ។

យ៉ាដាវ ថ្លែងទៀតថា "ខ្ញុំអត់ដឹងខ្លួនសោះថា មានរឿងនេះ ស្រាប់តែអ្នកគាំទ្រផ្ញើមកឲ្យ...ហើយមិនដឹងថាកើតឡើងតាំងពីពេលណា...ខ្ញុំខឹងខ្លាំងណាស់បង ម៉ាក់ខ្ញុំក៏ដូចគ្នា ព្រោះប៉ះពាល់កិត្តិយសខ្លាំងណាស់ យើងជាស្រី ហើយមិនមែនតែខ្ញុំទេ គឺកិត្តិយសស្ត្រីខ្មែរទាំងមូល ពួកហ្នឹង អត់មានម្ដាយមានបងប្អូនជាស្រី? ម៉េចធ្វើទៅកើត។ អីចឹងខ្ញុំសូមផ្ដាំបើមិនចង់មានរឿងទេ សូមដកចេញឲ្យឆាប់"។

រូបភាព៖ FB យ៉ាដាវ

នេះមិនមែនជាលើកទី១ទេ ដែលសិល្បករ សិល្បការិនីខ្មែរបានជួបរឿងនេះ ដោយថ្មីៗនេះ បេនីយុំាង ក៏បានជួបប្រទះដែរ។ ប៉ុន្តែបន្ទាប់ពីនាងបានព្រមានធ្ងន់ៗ សកម្មភាពទាំងនោះ ក៏បានស្ងាត់ទៅវិញ។

ក៏ដូចគ្នាដែរ យ៉ាដាវ ប្រាប់ថា ជំហានដំបូងនេះ នាងសូមព្រមានជាមុនសិន ប្រសិនបើទំព័របណ្ដាញសង្គមមួយនោះ មិនបញ្ឈប់ទេ នាងក៏មិនបញ្ឈប់ដែរ នាងនឹងពឹងស្ថាប័នមានសមត្ថកិច្ចឲ្យជួយ៕

អត្ថបទ៖ បេនីយុំាង ព្រមានធ្ងន់ៗលើអ្នកបង្ខូចឈ្មោះនាង