សម្ដែងជិត ៣០ ឆ្នាំ ទេព រិនដារ៉ូ ថា កុនពីមុនសុទ្ធតែមានស្តង់ដារ

2015-06-17 15:27:53
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ទេព រិនដារ៉ូ បង្ហើបថា លោកចូលចិត្តភាពយន្តណា ដែលផលិតឡើងមានលក្ខណៈស្តង់ដារ និង គោរពតាមវេយ្យាករណ៍របស់កុនបានត្រឹមត្រូវ ហើយភាគច្រើនផលិតឡើងពីមុន។

“បងប្អូនខ្មែរធ្លាប់គាំទ្ររឿងពីមុន សុទ្ធសឹងតែជាប្រភេទរឿងមានស្តង់ដារ ទើបតែមួយរយៈក្រោយមានការផលិត ប្រឡាំប្រកូវ ធ្វើឱ្យបាត់ស្តង់ដារ"។ ទេព រិនដារ៉ូ រៀបរាប់មកកាន់ Sabay ប៉ុន្មានថ្ងៃមុន។ តារាភាពយន្តទសវត្សរ៍ ៨០ រូប នេះបន្តថា ស្តង់ដាររបស់កុនរួមបញ្ចូលទាំងប្លង់ បច្ចេកទេស និង គំនិតគោរពតាមក្បួនរបស់កុន។

លោកបន្តថា កុនខ្មែរភាគច្រើន ធ្វើឱ្យទស្សនិកជនមិនសូវយល់សាច់រឿងនោះទេ។ តារាវ័យ៥២រូបនេះបញ្ជាក់ថា តាមពិតទៅកុនមិនសូវនិយាយច្រើនឡើយ សាច់រឿងត្រូវពន្យល់ដោយរូបភាពច្រើនជាង ធ្វើឱ្យទស្សនិកជនអាចយល់។ ចំណែករឿងភាគទូរទស្សន៍នាពេលបច្ចុប្បន្ន គឺប្រើការនិយាយភាគច្រើន ដើម្បីអូសសាច់រឿងឱ្យអ្នកទស្សនាយល់ ដែលមានលក្ខណៈផ្ទុយគ្នា។

លោកបញ្ជាក់ថា កុនខ្មែរមួយចំនួនបច្ចុប្បន្ននេះ អាចចាត់ទុកថា មានចូលស្តង់ដារខ្លះ ប៉ុន្តែរឿងទាំងនោះបែរជាមិនទទួលបានការគាំទ្រទៅវិញ។ ទោះបីជាយ៉ាងណាថ្មីៗនេះ លោកបានចូលរួមសម្ដែងកុនមួយ ដែលលោកអះអាងថា មានស្តង់ដារគ្រប់គ្រាន់។ រឿងនេះមានចំណងជើងថា "សង្គ្រាមបងប្អូន" ផលិតដោយស្ថានីយទូរទស្សន៍ CTN និង ផលិតកម្ម "ភូមិពេជ្រ" សហការជាមួយ GMA ដែលជាស្ថានីយទូរទស្សន៍ដ៏ធំរបស់ ហ្វីលីពីន ។

តារាភាពយន្តជើងចាស់ដដែលបញ្ជាក់ថា កុននេះគោរពតាមក្បួនត្រឹមត្រូវ ដោយមានអ្នកបច្ចេកទេស អ្នកដឹកនាំរឿង សុទ្ធសឹងតែជាជនបរទេស ដែលបានយល់ដឹងពីកុនច្បាស់លាស់។ លោកចង់ឱ្យផលិតករទាំងអស់ ស្វែងយល់ពីកុនបន្ថែមទៀត ដើម្បីពង្រឹងគុណភាព៕

អានអត្ថបទ៖ ឯកឧត្ដម ជា ច័ន្ទបរិបូរណ៍៖ ប្រលងចម្រៀង ខុសពីប្រលងច្រៀង អានអត្ថបទ៖ នាយ គ្រឿន រំលឹកពីចំណូលកាលរដូវប្រាំង ចង់ដឹងថា រកបានប៉ុន្មានអត់?

អត្ថបទ៖ សំ ជំនាញ