អាល្លឺម៉ង់មានអ្នកស្លាប់ទីមួយដោយសារជំងឺផ្លូវដង្ហើម MERS

2015-06-17 21:19:10
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសវ័យ ៦៥ឆ្នាំម្នាក់ បានក្លាយជាមនុស្សទីមួយដែលបាត់បង់ជីវិតដោយសារជំងឺផ្លូវដង្ហើម MERS ក្នុងប្រទេសអាល្លឺម៉ង់ បន្ទាប់ពីឆ្លងជំងឺគ្មានថ្នាំព្យាបាលនេះមកពីតំបន់មជ្ឈិមបូព៌ាកាលពីដើមឆ្នាំ។ នេះបើតាមការបញ្ជាក់របស់ក្រសួងសុខាភិបាលប្រចាំរដ្ឋ Lower Saxony ប្រទេសអាល្លឺម៉ង់។

តាមពិតបុរសវ័យចំណាស់ បានស្លាប់តាំងពីថ្ងៃទី០៦ ខែមិថុនា ប៉ុន្តែអាជ្ញាធររបស់ប្រទេសអាល្លឺម៉ង់ ទើបតែប្រកាសផ្សាយពីដំណឹងនេះកាលពីថ្ងៃអង្គាម្សិលមិញ និងត្រូវសារព័ត៌មានអន្តរជាតិនានាចុះផ្សាយព្រោងព្រាតនៅថ្ងៃនេះ។ ក្រសួងសុខាភិបាល ជឿជាក់ថាបុរសវ័យ ៦៥ឆ្នាំ បានឆ្លងមេរោគ MERS ពេលធ្វើដំណើរកន្លែងលក់សត្វមួយនៅឧបទ្វីបអារ៉ាប់ កាលពីខែកុម្ភៈ។

បុរសរងគ្រោះដោយសារជំងឺ MERS ទីមួយរបស់ប្រទេសអាល្លឺម៉ង់ បានស្លាប់នៅក្រុង Ostercappeln បន្ទាប់ពីមិនអាចទ្រាំទ្រនឹងមេរោគផ្លូវដង្ហើមដ៏ធ្ងន់ធ្ងរនេះបាន។ គេនៅមិនទាន់ដឹងថា បុរសម្នាក់នេះបានចម្លងជំងឺទៅដល់អ្នកផ្សេងឬយ៉ាងណានោះទេ ប៉ុន្តែការធ្វើតេស្តលើមនុស្ស ២០០នាក់ បង្ហាញលទ្ធផលអវិជ្ជមាន។

រូបរាងមេរោគ MERS

ជំងឺផ្លូវដង្ហើម MERS មានវត្តមានដំបូងក្នុងឆ្នាំ២០១២ នៅតំបន់មជ្ឈិមបូព៌ា និងឆក់យកជីវិតមនុស្សអស់ជាង ៤០០នាក់ទូទាំងពិភពលោក ដោយសារគ្មានថ្នាំព្យាបាល។ បច្ចុប្បន្នជំងឺដ៏សាហាវនេះ កំពុងរីករាលដាលក្នុងប្រទេសកូរ៉េខាងត្បូង សម្លាប់មនុស្ស ១៩នាក់ និងចម្លងដល់មនុស្ស ១៥០នាក់ផ្សេងទៀត បន្ទាប់ពីអ្នកជំនួញម្នាក់ត្រលប់មកពីតំបន់មជ្ឈិមបូព៌ា ដោយមានជំងឺជាប់ខ្លួនកាលពីចុងខែឧសភា។

ចុចអាន៖ វិធីការពារជំងឺកំណាចថ្មីនៅកូរ៉េ MERS ដែលល្បីមិនទាន់មានថ្នាំព្យាបាល

ចុចអាន៖ ក្រសួងសុខាភិបាលព្រមានជំងឺផ្លូវដង្ហើមមជ្ឈិមបូព៌ានិងវិធានការត្រូវប្រុងប្រយ័ត្ន

ប្រែសម្រួល៖ គង់ វិសាល ប្រភព៖ channelnewsasia