វិធីការពារជំងឺកំណាចថ្មីនៅកូរ៉េ MERS ដែលល្បីមិនទាន់មានថ្នាំព្យាបាល

2015-06-05 20:40:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីមេរោគ MERS កំពុងរីករាលដាលនៅកូរ៉េយ៉ាងសាហាវ នាយកដ្ឋានប្រយុទ្ធនឹងជំងឺឆ្លង CDC បានបង្ហាញពីវិធីការពារមេរោគដែលពុំទាន់មានថ្នាំព្យាបាលនេះ នៅលើគេហទំព័ររបស់ខ្លួន ដើម្បីសុវត្ថិភាព និងការពារកុំឲ្យក្លាយជាជនរងគ្រោះដោយសារមេរោគនេះ នៅពេលធ្វើដំណើរចេញទៅបរទេស និងត្រលប់មកវិញ ។

រូបភាព 3D បង្ហាញពីរូបរាងមេរោគ MERS

សូមអនុវត្តនូវវិធីដូចខាងក្រោម ដើម្បីការពារមេរោគ MERS៖

o ជៀសវាងប៉ះពាល់ជិតស្និទ្ធជាមួយអ្នកមានជំងឺផ្លូវដង្ហើមស្រួច

o លាងដៃឲ្យបានញឹកញាប់ (ជាមួយសាប៊ូនិងទឹក) ជាពិសេសបន្ទាប់ ពីប៉ះពាល់ដោយផ្ទាល់ជាមួយអ្នកជំងឺឬបរិស្ថានជុំវិញគាត់

o ប្រកាន់ខ្ជាប់នូវការអនុវត្តន៍អនាម័យនិងសុវត្ថិភាពម្ហូបអាហារ ដូចជា ជៀសវាងផលិតផលសត្វ ចម្អិនមិនឆ្អិនល្អ ក្នុងនោះមាន ទឹកដោះ និង សាច់

o ជៀសវាងប៉ះពាល់ជិតស្និទ្ធជាមួយ កសិដ្ឋានឬសត្វរស់ ដែលជាកន្លែងដែលគេដឹងថា មានវត្តមានវីរុសចរាចរ។ ជាអនុសាសន៍ត្រូវលាងដៃឲ្យបានទៀងទាត់មុនពេលនិងបន្ទាប់ពីការប៉ះសត្វ

បើសង្ស័យខ្លួនមានជំងឺនេះ សូមអញ្ជើញទៅព្យាបាលជំងឺជាបន្ទាន់ នៅមន្ទីរពេទ្យ និងសូមប្រាប់គ្រូពេទ្យអំពីប្រវត្តិការធ្វើដំណើរ ឬ ទូរស័ព្ទ រាយការណ៍មកលេខ ១១៥ ០១២៤៨៨៩៨១ ០៨៩៦៦៩៥៦៧ ។

ក្នុងគេហទំព័រដដែលនេះ ក៏បានបញ្ជាក់ថា រហូតដល់ថ្ងៃទី៥ ខែមិថុនា ឆ្នាំ២០១៥ ពុំទាន់រកឃើញករណីជំងឺ ផ្លូវដង្ហើមនៅមជ្ឈិមបូព៌ា (MERS) នៅក្នុងព្រះរាជាណាចក្រកម្ពុជាទេ។

ជំងឺផ្លូវដង្ហើម MERS មានពាក្យពេញ “Middle East Respiratory Syndrome” មានន័យថា “មេរោគផ្លូវដង្ហើមមជ្ឈិមបូព៌ា” ដែលផ្ទុះឡើងដំបូងក្នុងឆ្នាំ២០១២ នៅប្រទេសអារ៉ាប៊ីសាអ៊ូឌីត និងឆក់យកជីវិតមនុស្សទូទាំងពិភពលោកអស់ជាង ៤០០នាក់។

រោគសញ្ញានៃមេរោគ MERS គឺ ក្អក គ្រុន មានដង្ហើមខ្លីៗ ព្រមទាំងអាចឈានទៅដល់ការរលាកសួត និងខូចក្រលៀន។ មេរោគកំណាចនេះ អាចរីករាលដាលបានយ៉ាងស្រួលនៅក្នុងមន្ទីរពេទ្យ ហើយហានិភ័យនៃការឆ្លងមេរោគកាន់តែឆាប់រហ័ស នៅពេលអ្នកជំងឺចាប់ផ្ដើមចុះខ្សោយ និងក្អកកាន់តែច្រើន។ បច្ចុប្បន្ន ពុំមានថ្នាំព្យាបាល ឬវ៉ាក់សាំងការពារជំងឺផ្លូវដង្ហើម MERS ទេ៕

សូមអាន៖ និស្សិតខ្មែររៀននៅកូរ៉េ ខ្លាចជំងឺថ្មី MERS គ្មានថ្នាំព្យាបាល តែមិនអាចវិលមកខ្មែរវិញ

សូមអាន៖ ជំងឺសាហាវថ្មីនៅកូរ៉េ គ្មានថ្នាំព្យាបាលឆក់យកជីវិតមនុស្សទី៤

អត្ថបទ៖ លឹម សុនា