ទឹកចិត្តឪពុកមានចំពោះកូន បើអ្នកបានដឹងនឹងស្រក់ទឹកភ្នែក
- 2015-06-19 17:58:48
- ចំនួនមតិ 0 | ចំនួនចែករំលែក 0
ទឹកចិត្តឪពុកមានចំពោះកូន បើអ្នកបានដឹងនឹងស្រក់ទឹកភ្នែក
ចន្លោះមិនឃើញ
ទិវាឪពុក នឹងចូលមកដល់ក្នុងថ្ងៃអាទិត្យខាងមុខ បន្ទាប់ពីទិវាម្ដាយរំលងផុតទៅកាលពីខែឧសភា។ ដើម្បីបង្ហាញថាគុណឪពុក និងក្ដីស្រលាញ់មានទំហំធំប៉ុនណា គេបានបង្កើតវីដេអូសាច់រឿងខ្លីមួយឡើង ធ្វើឲ្យអ្នកទស្សនាហើយរំជួលចិត្តស្ទើរស្រក់ទឹកភ្នែក។
សាច់រឿងទាំងមូល បង្ហាញពីឪពុកខំចិញ្ចឹមបីបាច់ថែរក្សាកូនម្នាក់ឯង ក្រោយម្ដាយបាត់បង់ជីវិតដោយសារជំងឺ។ ទឹកចិត្តឪពុកចង់ឲ្យកូនល្អ ណែនាំកូនប្រុសប្រឹងរៀនដើម្បីអនាគត ប៉ុន្តែកូនបែរជាខឹងឪពុក និងស្ដីតបវិញថាមិនមែនជាមនុស្សចិត្តល្អដូចម្ដាយ។
ឪពុកធ្លាប់ប្រាប់កូនថា មនុស្សស្រីជាអ្នកពូកែលាក់ពាក្យសម្ដីទុកក្នុងទ្រូង មិនងាយបញ្ចេញមកក្រៅឡើយព្រោះខ្លាចកូនពិបាកចិត្ត ប៉ុន្តែតាមពិតឪពុកជាមនុស្សដែលលាក់ទុកការលំបាកជាងមនុស្សស្រីទៅទៀត។
ជាមនុស្សប្រុសដែលចិញ្ចឹមកូនម្នាក់ឯង តែងពោលពាក្យថា ពុកមិនឃ្លានទេ ពុកមិនអស់សង្ឃឹមនឹងកូនទេ ពុកមិនខឹងកូនទេ...។ ក្រោមទឹកចិត្តឪពុកដ៏ល្អម្នាក់ កូនប្រុសបានទទួលអាហារូបករណ៍ទៅរៀននៅបរទេស។ ចំណែកឪពុកវិញ រស់នៅម្នាក់ឯងមែនពិត ក៏នៅតែពោលពាក្យថា មិនឯកាទេ និងមានក្ដីរីករាយជាមួយជីវិតប្រចាំថ្ងៃណាស់។
ថ្ងៃមួយ កូនបានធ្វើដំណើរមកលេងផ្ទះវិញដោយមិនប្រាប់ដំណឹងមុន និងធ្វើជាហៅទូរសព្ទសួរសុខទុក្ខឪពុកដែលនៅផ្ទះម្នាក់ឯង។ ឪពុកនៅតែប្រាប់កូនថា មានសុខភាពល្អ ស្រោចទឹកផ្ការាល់ថ្ងៃ ព្រមទាំងដើរហាត់ប្រាណអស់ ៥គីឡូម៉ែត្រ ប៉ុន្តែធាតុពិតសុខភាពលោកទ្រុឌទ្រោមណាស់ទៅហើយ និងងងឹតភ្នែកផង...។
ពេលកូនឃើញទិដ្ឋភាពជាក់ស្ដែងបែបនេះ ទើបដឹងពីទឹកចិត្តពិតរបស់ឪពុក។ លោកនិយាយថា មិនឃ្លានទេ ព្រោះចង់ទុកអាហារឆ្ងាញ់ៗឲ្យកូន។ លោកប្រឹងធ្វើការដោយគ្មានការនឿយហត់ ព្រោះចង់រកប្រាក់ឲ្យកូនរៀន។ លោកមិនដែលខឹងកូន ព្រោះលោកជាមនុស្សម្នាក់ដែលយល់ពីកូន និងអធ្យាស្រ័យជានិច្ច...។ នៅមានរឿងរ៉ាវជាច្រើនទៀត ដែលឪពុកធ្វើដើម្បីកូន ដោយមិនត្រូវការគុណសម្បត្តិ។
ចង់ដឹងថា សាច់រឿងយ៉ាងណា សូមទស្សនាវីដេអូ៖
ចុចអាន៖ អាចស្រក់ទឹកភ្នែក! ទឹកចិត្តឪពុកគថ្លង់រើសសំរាម ចិញ្ចឹមកូនស្រី
ដោយ៖ គង់ វិសាល ប្រភព៖ YouTube(Yosua Jimmy Agustio)